ជំងឺរំលាយអាហារមិនបានល្អ មិនត្រឹមតែកើតឡើងលើខ្លួនមនុស្សចាស់នោះទេ ថែមទាំងអាចកើតលើខ្លួនកូនក្មេងទៀតផង ដូចនេះប្រសិនជាអ្នកមិនចង់ឱ្យកូនមានជំងឺនេះ តើអ្នកគួរតែធ្វើដូចម្តេចទៅ?
បរិភោគឆ្អែតពេក
ការឱ្យកូនបរិភោគច្រើនពេកនឹងធ្វើឱ្យកូនមិនងាយរំលាយអាហារឡើយ ថែមទាំងអាចធ្វើឱ្យកូនអ្នកធាត់ទៀតផង ដូចនេះអ្នកត្រូវតែឱ្យគេបរិភោគតាមបរិមាណដែលកូនអាចទទួលយកបាន។
អាហារត្រជាក់
អ្នកមិនត្រូវយកអាហារដែលទើបនឹងយកចេញពីទូរទឹកកកមកឱ្យកូនបរិភោគភ្លាមនោះទេ ព្រោះវាអាចធ្វើឱ្យកូនអ្នកមិនងាយរំលាយអាហារបានឡើយ ដោយសារតែក្រពះកូននៅខ្សោយ ដូចនេះមុននឹងឱ្យកូនបរិភោគ អ្នកត្រូវតែកម្តៅជាមុនសិន។
មិនត្រូវមើលពោះ
នៅពេលដែលអ្នកបញ្ចុកបាយកូន អ្នកមិនត្រូវមើលតាមពោះកូន ហើយកំណត់ថាគេឆ្អែត ឬមិនឆ្អែតឡើយ ព្រោះនៅពេលដែលពោះបោងមិនបញ្ជាក់ថា កូនឆ្អែត ឬមិនឆ្អែតឡើយ ដូចនេះអ្នកអាចបញ្ចុកល្មម នោះដល់ពេលដែលកូនឃ្លាន កូននឹងយំប្រាប់អ្នកហើយ ដូចនេះអ្នកអាចបញ្ចុកគេទៀត។
ទម្លាប់ល្អក្នុងការរស់នៅ
អ្នកត្រូវតែបង្រៀនឱ្យកូនមានទម្លាប់ល្អក្នុងការរស់នៅ ដោយត្រូវតែមានរបៀបរស់នៅល្អ និងការបរិភោគល្អ ហើយត្រូវតែបត់ជើងធំឱ្យបានទៀងទាត់ ដូចនេះពោះវៀន និងក្រពះកូននឹងមានសុខភាពល្អ ជាហេតុដែលមិនងាយធ្វើឱ្យកូនមានជំងឺនេះឡើយ៕