របបអាហារអាចជះឥទ្ធិពលគួរឱ្យកត់សម្គាល់លើភាពស្ត្រេសដែលជួយឱ្យធូរស្បើយ ឬធ្ងន់ធ្ងរឡើង។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើអាហារអ្វីខ្លះអាចជួយប្រឆាំងនឹងភាពស្ត្រេស? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលអ្នកគួរទទួលទានដើម្បីទប់ទល់ជាមួយភាពតានតឹងក្នុងអារម្មណ៍ ៖
១. ត្រីសម្បូរខ្លាញ់
ជាប្រភពដ៏ប្រសើរនៃប្រូតេអ៊ីននិងអាស៊ីតខ្លាញ់អូមេហ្គា ៣ ដែលល្អសម្រាប់សុខភាពរាងកាយ រួមទាំងអារម្មណ៍។ ត្រីសម្បូរខ្លាញ់ក៏អាចបង្កើនកម្រិតអ័រម៉ូនរីករាយ serotonin នៃខួរក្បាលដែលប្រយុទ្ធប្រឆាំងនឹងភាពស្ត្រេស។
២. អាហារសម្បូរសារធាតុប្រឆាំងអុកស៊ីតកម្ម
សារធាតុប្រឆាំងអុកស៊ីតកម្មជួយជួសជុលរាងកាយនិងកម្ចាត់រ៉ាឌីកាល់សេរីចេញពីប្រព័ន្ធរាងកាយ។ វាអាចកម្ចាត់នូវរាល់ជាតិពុលក្នុងរាងកាយ ព្រមទាំងជួយគ្រប់គ្រងរោគសញ្ញានៃភាពស្ត្រេសផងដែរ។ បន្លែផ្លែឈើជាប្រភពដ៏ល្អបំផុតមួយនៃសារធាតុប្រឆាំងអុកស៊ីតកម្មដែលរាងកាយត្រូវការ។
៣. ប្រូតេអ៊ីន
ការរួមបញ្ចូលអាហារសម្បូរប្រូតេអ៊ីនក្នុងរបបអាហារប្រចាំថ្ងៃអាចជួយរក្សាតុល្យភាពនៃកម្រិតជាតិស្ករក្នុងឈាម ខណៈដែលការឡើងចុះនៃកម្រិតជាតិស្ករក្នុងឈាមក៏ជាមូលហេតុនៃបញ្ហាអារម្មណ៍ប្រែប្រួលផងដែរ។ ហើយអ្នកនឹងមានអារម្មណ៍កាន់តែស្ត្រេសខ្លាំងនៅពេលកម្រិតនៃជាតិស្ករក្នុងឈាមធ្លាក់ចុះ។ ការទទួលទានប្រូតេអ៊ីននៅពេលព្រឹកអាចជួយរក្សាតុល្យភាពនៃកម្រិតជាតិស្ករក្នុងឈាមបានពេញមួយថ្ងៃ។
៤. ជ្រើសរើសអាហារសម្រន់សុខភាពល្អ
ជំនួសឱ្យការញ៊ាំនំស្រួយ នំកញ្ចប់ ឬដំឡូងបំពងស្រួយៗ ចូរជ្រើសរើសអាហារសម្រន់ដែលមានសុខភាពល្អដូចជាគ្រាប់ធញ្ញជាតិ ផ្លែឈើ និងសូកូឡាខ្មៅជាដើមជំនួសវិញ។ អាហារដែលមានផ្ទុកជាតិស្ករនិងខ្លាញ់ខ្ពស់អាចជះឥទ្ធិពលលើអារម្មណ៍របស់អ្នកគួរឱ្យកត់សម្គាល់។ ម្យ៉ាងវិញទៀតអាហារមួយចំនួនដូចជាអាហារចៀនបំពងដែលសម្បូរខ្លាញ់មិនល្អថែមទាំងបង្កើនកម្រិតនៃភាពស្ត្រេសទៀតផង។
សម្គាល់៖ អ្នកចាំបាច់គួរព្យាយាមចំណាយពេលធ្វើលំហាត់ប្រាណ ឬសមាធិផង ដើម្បីអាចបន្ថយភាពស្ត្រេសបានកាន់តែប្រសើរ។ លំហាត់ប្រាណ និងការចំណាយពេលតាំងអារម្មណ៍សមាធិជាវិធីសាស្ត្រដ៏ល្អដើម្បីទប់ទល់ភាពស្ត្រេសនិងជំងឺធ្លាក់ទឹកចិត្ត។ ប្រសិនបើអ្នកមិនធ្វើលំហាត់ប្រាណជាប្រចាំខួរក្បាលមិនអាចបញ្ចេញនូវអ័រម៉ូនរីករាយគ្រប់គ្រាន់ឡើយ៕