ជាញឹកញយ មនុស្សជាច្រើនផ្ដោតសំខាន់លើការដុតរំលាយកាឡូរីតាមរយៈការហាត់ប្រាណ រហូតដល់ភ្លេចគិតថារាងកាយក៏មានសមត្ថភាពក្នុងការដុតបំផ្លាញកាឡូរីដោយខ្លួនឯងបាន! ហើយប្រសិទ្ធិភាពនៃការដុតបំផ្លាញ ឬល្បឿននៃការរំលាយអាហារនៃរាងកាយ គឺពឹងផ្អែកលើអ្នកខ្លួនឯងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) រាល់កោសិកាតូចៗនៅក្នុងរាងកាយដើរតួយ៉ាងសំខាន់ជាមួយដំណើរការនៃការរំលាយអាហារ (ដំណើរការបម្លែងអាហារទៅជាថាមពល)។ រាងកាយរំលាយអាហារបានលឿនប៉ុណ្ណា កាឡូរីក៏ត្រូវបានដុតបំផ្លាញច្រើនប៉ុននោះដែរ។ ខាងក្រោមវេបសាយសុខភាព Health.com.kh នឹងបង្ហាញឲ្យដឹងពីទម្លាប់មួយចំនួនដែលពន្យឺតការរំលាយអាហារនាំឲ្យឡើងទម្ងន់ ហើយអ្នកគួរបញ្ឈប់ ឬផ្លាស់ប្ដូរភ្លាម ៖
១. ទទួលទានមិនទៀង
ការស្រាវជ្រាវជាច្រើនបង្ហាញថា ការទទួលទានមិនទៀងម៉ោងអាចនាំឲ្យឡើងទម្ងន់។ រាងកាយរបស់អ្នកមិនដឹងទេថា នៅពេលណាវាមានឱកាសទទួលបានអាហារបន្ថែម ហើយវាក៏ព្យាយាមបន្ថយល្បឿននៃដំណើរការគ្រប់យ៉ាង ដើម្បីបង្ការទុកមុន។
២. គេងមិនគ្រប់
វាមិនមែនជារឿងគួរឲ្យភ្ញាក់ផ្អើលអ្វីទេ នៅពេលដែលអ្នកមិនបានគ្រប់គ្រាន់គ្មានកម្លាំងថាមពលច្រើន ហើយនេះមានន័យថា រាងកាយរបស់ពួកគេនឹងធ្វើការដុតបំផ្លាញការឡូរីបានតិចក្នុងមួយថ្ងៃ។ ដូច្នេះចូរព្យាយាមគេងឲ្យបានគ្រប់គ្រាន់។
៣. ទទួលទានមិនបានគ្រប់គ្រាន់
ប្រសិនបើអ្នកកាត់បន្ថយកាឡូរីច្រើនពេក រាងកាយនឹងធ្លាក់ចូលក្នុងស្ថានភាពឃ្លានខ្លាំង ហើយពន្យឺតល្បឿននៃការរំលាយអាហារ។ ការតាមដានការទទួលកាឡួរីរបស់អ្នក គឺចាំបាច់ណាស់ ប្រសិនបើអ្នកចង់ស្រកទម្ងន់ ប៉ុន្តែកុំធ្វើជ្រុលពេក។ ការកាត់បន្ថយកាឡូរីត្រឹមតែ ២០០ គីឡូកាឡូរី គឺប្រសើរបំផុតចំពោះការស្រកទម្ងន់បានត្រឹមត្រូវ ហើយរក្សាបាននូវសុខភាពល្អ។
៤. អង្គុយយូរពេក
ការអង្គុយយូរពេក គឺអាចប៉ះពាល់ដល់ដំណើរការនៃការរំលាយអាហារ។ ការសិក្សាស្រាវជ្រាវជាច្រើនបានអះអាងនូវចំណុចនេះ ហើយក៏មានក្រុមហ៊ុនជាច្រើនជម្រុញឲ្យបុគ្គលិកធ្វើការ ពត់ពែនខ្លួន, ងើបឈរ ឬធ្វើចលនាធម្មតាណាមួយក៏បាន រាល់ ៣០ នាទីម្ដង។
៥. មិនទទួលបានជាតិកាល់ស្យូមគ្រប់គ្រាន់
ការទទួលបានជាតិកាល់ស្យូមគ្រប់គ្រាន់ គឺសំខាន់ណាស់ចំពោះការគ្រប់គ្រងចាត់ចែងការរំលាយអាហារ។ បើទោះជាអ្នកមិនចូលចិត្តទឹកដោះគោ ឬអ្នកចាញ់ឡាក់តូសក៏ដោយ ក៏វាមិនមែនជាបញ្ហាដែរ នៅមានអាហារច្រើនផ្សេងទៀតដែលមានផ្ទុកជាតិកាល់ស្យូមខ្ពស់។
៦. ខ្សោះជាតិទឹក
រាល់ដំណើរការគ្រប់យ៉ាងក្នុងរាងកាយ គឺអាស្រ័យលើទឹក។ ប្រសិនបើរាងកាយខ្សោះជាតិទឹកនោះ គឺគ្មានអ្វីដំណើរការបានល្អឡើយ។ ការសិក្សាស្រាវជ្រាវមួយបានរកឃើញថាការទទួលទានទឹកប្រហែលកន្លះលីត្រអាចបង្កើនអាត្រានៃការរំលាយអាហារបានដល់ទៅ ៣០ភាគរយ។
៧. កង្វះប្រូតេអ៊ីន
ប្រូតេអ៊ីន គឺដើរតួនាទីយ៉ាងសំខាន់នៅក្នុងការទទួល និងរក្សាបាននូវទម្ងន់ដ៏ល្អឥតខ្ចោះ។ ប្រូតេអ៊ីនជួយបង្កើនលឿននៃការដុតរំលាយអាហារ ហើយថែមទាំងធ្វើឲ្យមានអារម្មណ៍ថាឆ្អែតបានយូរទៀតផង។