Join with Health.com.kh on Telegram

តើ​អ្នក​មាន​ដឹង​ទេ​ថា ហេតុអ្វី​បានជា​អ្នក​ចេះ​តែ​ឈឺក្បាល​មិន​ព្រម​ឈប់​នោះ ? ពេលខ្លះ​ក្រៅពី​ជំងឺ​ប្រចាំកាយ វា​អាច​នឹង​មាន​នូវ​កត្តា​ផ្សេងៗ​ជាច្រើន​ទៀត ដែល​អាច​ធ្វើអោយ​អ្នក​ជួប​នូវ​បញ្ហា​នេះ​បាន ។ សូម​ក្រលេក​មើល​ពី​មូលហេតុ​មួយចំនួន​ខាងក្រោម​នេះ ដែល​គេ​ជឿថា វា​សុទ្ធតែ​អាច​ធ្វើអោយ​អ្នក​ឈឺ​ក្បាល​បាន ៖

១.​ចៅហ្វាយ​របស់​អ្នក​
​ជា​ការពិត​ណាស់ ថ្នាក់លើ ឬ ប្រធាន​របស់​អ្នក គឺ​ពិតជា​អាច​ដាក់បន្ទុក​កា​ងារ អោយ​អ្នក​ឈឺ​ក្បាល​បាន ។ មិន​ថា អ្វី​ក៏ដោយ អោយ​តែ​បាន​ដាក់​សម្ពាធ​ទៅដល់​ផ្លូវចិត្ត និង អារម្មណ៍​របស់​អ្នក វា​សុទ្ធតែ​អាច​ធ្វើអោយ​អ្នក ងាយ​រង​នឹង​មាន​ឱកាស ប្រឈម​នឹង​ការ​មាន​សម្ពាធ​នៅក្នុង​ក្បាល ឬ មាន​អា​ការៈឈឺ​ក្បាល​ប្រកាំង​បាន​។ នៅពេល​ដែល​អ្នក​មិន​អាច ធ្វើតាម​នូវ​រាល់​តម្រូវការ​របស់​ចៅហ្វាយនាយ នោះ​អ្នក​ប្រាកដជា​ជួប​នឹង បញ្ហា​នេះ ជាក់​ជា​មិនខានឡើយ​។​

២. កត្តា​អាកាសធាតុ​
​នៅពេល​ដែល​មាន​បម្រែលបម្រូល​អាកាសធា​តុជា​ប្រចាំ នោះ​វា​ក៏​នឹង​ងាយ​ធ្វើអោយ​អ្នក​រង​នូវ​ការឈឺ ក្បាល​លក្ខណៈ​ប្រកាំង​បាន​ផងដែរ​។ មិន​ថា អាកាសធាតុ​ប្រែប្រួល​ពី​ត្រជាក់​ទៅ​ក្តៅ ឬ ពី​ក្តៅ ទៅ​ត្រជាក់ សុទ្ធ​តែ​អាច​ធ្វើអោយ​អ្នក ឈឺ​ក្បាល​បាន​ដូចគ្នា ។ ដោយសារ​តែ​យើង​មិន​អាច​គេច​ពី​បញ្ហា​នេះ​បាន នោះ​អ្នក គួរ​ធ្វើ​ការការពារ​ខ្លួន​អ្នក អោយបាន​ល្អ​ពី​ការ​ប្រឈម​នឹង កម្តៅថ្ងៃ​ក្តៅ​ខ្លាំង ដោយ​ការពាក់​វ៉ែនតា​ការពារ​ពន្លឺ​, ពាក់មួក ,​ព្យាយាម​ស្ថិតនៅក្នុង​ម្លប់​អោយបាន​ច្រើន និង​ជា​ពិសេស​នោះ ត្រូវ​បង្គ្រប់​សារធាតុ​រាវ​អោយបាន​គ្រប់គ្រាន់​។​

៣.​ក្លិន​
​មិន​ថា​ក្លិន​ប្រភេទ​ណា​នោះ​ទេ បើ​ទោះ​ជា​ខ្លាំង ឬ ខ្សោយ​សុទ្ធតែ​អាច​ជះឥទ្ធិពល​លើ​អ្នក បាន​ដូចគ្នា ។ គឺ​ដោយសារតែ​វា​អាច​ជះ​ឥទ្ធិពល​រំខាន​ដល់ ប្រព័ន្ធ​ប្រសាទ​របស់​យើង​បាន​។ មូលហេតុ​ជា​ឬ​សគល់​ចំបង​នោះ មានដូចជា​ក្លិន​ទឹក​ថ្នាំលាប​ផ្ទះ​,​ក្លិន​ទឹកអប់​, ឬ ប្រភេទ​ក្លិន​ផ្កា​ជាក់លាក់​ណាមួយ ដែល​អ្នក​មិន​អាច​ទទួលយកបាន​។​

៤. គ្រឿង​តុបតែង​សក់​
​វិធី​នៃ​ការតុបតែង​សក់ ឬ ការប្រើ​ដង្កៀប​នៅលើ​សក់ សុទ្ធ​តែ​អាច​ដាក់​សម្ពាធ​ដល់​ក្បាល​របស់​អ្នក​។ ការចង​សក់​តឹង​ពេក អាច​នឹង​ធ្វើអោយ​ស​សៃឈាម និង ជាលិកា​នៅលើ​ស្បែក​ក្បាល​រួម​ចង្អៀត ដែល​នឹង បង្ក​អោយ​អ្នក​ឈឺក្បាល​បាន​ផង​ដែរ​។ ម្យ៉ាងវិញទៀត ការប្រើ​ដង្កៀប​កៀប​សក់​, ការ​ក្រង​សក់ ឬ ការ​ពាក់មួក​តឹង​ណែន គឺ​សុទ្ធតែ​អាច​បង្ក​បាន​នូវ​បញ្ហា​ដូចគ្នា​ន​នេះដែរ​។ ប្រសិនបើ​បញ្ហា​ឈឺ​ក្បាល​កើតមាន នោះ​អ្នក គួរ​ធ្វើការ​ដោះ​វា​ចេញ និង ធ្វើ​ម៉ាស្សា​ដល់​ស្បែក​ក្បាល​របស់​អ្នក អោយបាន​ល្អ​។​

៥.​ការធ្វើ​លំ​ហាត់ប្រាណ​
​ការធ្វើ​លំ​ហាត់ប្រាណ ក្នុង​កម្រិត​ខ្លាំងក្លា​ពេក ក៏​អាច​ធ្វើអោយ​អ្នក​ឈឺក្បាល​បាន​ផង​ដែរ ។ អា​ការៈនេះ ហាក់​នឹង​ងាយ​កើតមាន ចំពោះ​ក្រុម​មនុស្ស​ដែល​ឆាប់​ប្រឈម​នឹង​ជំងឺ​ឈឺក្បាល​ប្រកាំ​ង​។​

៦. ការដាក់​ស្ថានភាព​ដងខ្លួន​មិន​បាន​ត្រឹមត្រូវ​
​ការដាក់​ស្ថានភាព​ដងខ្លួន មិន​ត្រឹមត្រូវ​ល្អ ខណៈពេល​ដែល​អ្នក​កំពុង​អង្គុយ​ធ្វើការ ឬ រៀន​នៅ​ក្នុង​ថ្នាក់​នោះ ក៏​អាច​ធ្វើអោយ​អ្នក​មាន​អា​ការៈឈឺ​ក្បាល​បាន​ផង​ដែរ ។ ឧទាហរណ៍​ការ អង្គុយ​កោង​ខ្នង​, ការនិយាយ​ទូរ​សព្ទ​ដោយ​ប្រើ​ស្មារ កៀប​នឹង​ត្រចៀក ,​ការ​ប្រឹង​សម្លឹង​កញ្ចក់​កុំព្យូទ័រ​ដែល​នៅ​ជិត ឬ ឆ្ងាយ​ពេក គឺ​សុទ្ធតែ​ជា​មូលហេតុ​ដែល​អាច​នាំអោយ​អ្នក​ឈឺក្បាល​បាន​។​

៧. ការ​មិន​ទទួល​ទាន​អាហារ​នា​ពេល​ណាមួយ​
​ប្រសិនបើ​អ្នក​មិន​ព្រម​ធ្វើការ​ទទួលទាន​អាហារ ក្នុងពេល​ណាមួយ នោះ​ក្បាល​របស់​អ្នក​នឹង​ចាប់ផ្តើម​ឈឺ មុនពេល​ដែល​អ្នក​ចាប់​ស្រេកឃ្លាន​។ បញ្ហា​នេះ​កើតឡើង​បាន​ដោយសារ​តែ​ជាតិ​ស្ករ នៅក្នុង​ឈាម​អ្នក​ចុះ​ទាប​។​

៨.​ការជក់បារី​
​ការជក់បារី​មិន​ត្រឹមតែ​អាច​ប៉ះពាល់​ដល់​អ្នក​ជក់​នោះទេ សូម្បី​តែ​អ្នក​ដែល​ហិត​ផ្សែង​វា ក៏​អាច​នឹង​ប្រឈម​នឹង​បញ្ហា​នេះ​បាន​ផង​ដែរ​។ វា​អាច​ធ្វើអោយ​យើង​ឈឺក្បាល​បាន ដោយសារ​តែ​វា​បានធ្វើអោយ ស​សៃឈាម​រួម​តូច​។ ដូច្នេះ​ការបញ្ឈប់​ការជក់បារី ឬ ស្ថិត​អោយ​ឆ្ងាយ​ពី​ក្រុម​អ្នក​ជក់បារី គឺ​អាច​បង្ការ​បញ្ហា​នៃ​ការឈឺ​ក្បាល​នេះ​បាន​។​

៩. សារជាតិ​កាហ្វេ​អ៊ី​ន​
​ជា​ការពិត ការ​ទទួលទាន​នូវ​សារជាតិ​កាហ្វេ​អ៊ី​ន ក្នុង​កម្រិត​សមស្រប វា​អាច​នឹង​ផ្តល់​អត្ថប្រយោជន៍​ដល់​អ្នក តែ​ប្រសិនបើ​អ្នក​ទទួល​ទាន​វា​ច្រើន​ជ្រុល នោះ​វា​នឹង​ធ្វើអោយ​អ្នក​មាន​អា​ការៈឈឺ​ក្បាល​បាន ជាក់​ជា​មិនខានឡើយ​៕