Join with Health.com.kh on Telegram

​គ្រួស​ក្នុង​ថង់ទឹកប្រមាត់​គជា​ការ​កក​ដ៏​រឹង​នៃ​ទឹក​សម្រាប់​រំលាយ​អាហារ​ដែល​កើតមាន​នៅក្នុង​ថង់​ទឹកប្រមាត់​។ ថង់ទឹកប្រមាត់​របស់​អ្នក​មាន​ទំហំ​ទ​តូច ដូច​ផ្លែង​បឺរ និង​ស្ថិតនៅ​ខាងស្តាំ​នៃ​ពោះ នៅ​ពីក្រោម​ថ្លើម​។ ថង់ទឹកប្រមាត់​មាន​នាទី​ស្តុក​ទឹក​សម្រាប់​រំលាយ​អាហារ​មួយ​ប្រភេទ​ឈ្មោះថា ទឹក​ប្រមាត់ ដែល​វា​នឹង​ត្រូវ​បញ្ចេញ​មក​នៅក្នុង​ពោះវៀនតូច​របស់​អ្នក​។​
 

​គ្រួស​ក្នុង​ថង់ទឹកប្រមាត់​ជា​មធ្យម​ពី​ប៉ុន​គ្រាប់​ខ្សាច់ ដល់​ប៉ុន​គ្រាប់​វាយ​កូន​ហ្គោល​។ មនុស្ស​មួយចំនួន​មាន​គ្រួស​ក្នុង​ថង់ទឹកប្រមាត់​តែ​មួយ​គ្រាប់​ទេ តែ​អ្នក​ខ្លះ​ទៀត​បែរជា​មាន​ច្រើន​ទៅវិញ​។​

រោគសញ្ញា​
​គ្រួស​ក្នុង​ថង់ទឹកប្រមាត់​ប្រហែល​មិន​បង្គ​រោគសញ្ញា​អ្វី​ទេ​។ ប្រសិនបើ​គ្រួស​នោះ​ធ្លាក់​ចូលទៅក្នុង​បំពង់​របស់​វា ហើយ​បង្ក​ជា​ការស្ទះ រោគសញ្ញា​ប្រហែលជា​មាន​ដូចជា​៖
– ឈឺចាប់​ខ្លាំង និង​ភ្លាមៗ​នៅ​តំបន់​ខាងស្តាំ​ង​ខាងលើ​នៃ​ពោះ​
– ឈឺចាប់​ខ្លាំង និង​ភ្លាមៗ​នៅ​ចំ​កណ្តាល​ពោះ ក្រោម​ឆ្អឹងជំនី​
– ឈឺ​ខ្នង​ចន្លោះ​ឆ្អឹងស្លាបប្រចៀវ​
– ឈឺ​នៅ​ស្មា​ខាងស្តាំ​
​ការឈឺចាប់​ដោយ​សារ​គ្រួស​ក្នុង​ថង់ទឹកប្រមាត់​ប្រហែលជា​ពី​ច្រើន​នាទី ទៅ​ពីរ​បី​ម៉ោង​។​
​ពេល​ត្រូវ​ជួប​គ្រូពេទ្យ​
​ចូរ​ណាត់​ជួប​ជាមួយ​គ្រូពេទ្យ​របស់​អ្នក​ទៅ​ប្រសិនបើ​អ្នក​មាន​រោគសញ្ញា​ទាំងឡាយណា​ដែល​ធ្វើអោយ​អ្នក​បារម្ភ​។​
​ចូរ​ស្វែងរក​សេវា​ជួយសង្គ្រោះ​ភ្លាមៗ​ប្រសិនបើ​អ្នក​មាន​រោគសញ្ញា​នៃ​ផលវិបាក​របស់​គ្រួស​ក្នុង​ថងទឹកប្រមាត់​ធ្ងន់ធ្ងរ​ដូចជា​៖
– ឈឺពោះ​ខ្លាំង​ដែល​ធ្វើ​អ្នក​មិន​អាច​អង្គុយ​នៅ​ស្ងៀម​បាន​
– ស្បែក​លឿង និង​ភ្នែក​លឿង​
– ក្តៅខ្លួន​ខ្លាំង ព្រមទាំង​ញាក់​
 

​មូលហេតុ
​វា​មិន​មាន​អ្វី​ច្បាស់លាស់​ទេ​ដែល​ថា​តើ​គ្រួស​ក្នុង​ថង់ទឹកប្រមាត់​បណ្តាលមកពី​មូលហេតុ​អ្វី​។ គ្រួ​ពេទ្យ​គិត​ថា​គ្រួស​ក្នុង​ថង់ទឹកប្រមាត់​ប្រហែល​ជា​បណ្តាលមកពី​៖
– ទឹកប្រមាត់​របស់​អ្នក​មានកូ​ឡេ​ស្តេ​រ៉ុល​ច្រើនពេក​។ ជាធម្មតា ទឹកប្រមាត់​របស់​អ្នក​ផ្ទុក​ទៅ​ដោយ​សារធាតុ​គីមី​គ្រប់​គ្រាន់​ក្នុង​ការរំលាយកូឡេ​ស្តេ​រ៉ុល​ដើម្បី​ដែល​បញ្ចេញចោល​ដោយ​ថ្លើម​។ ប៉ុន្តែ​ប្រសិនបើ​ថ្លើម​របស់​អ្នក​បញ្ចេញ​កូ​ឡេ​ស្តេ​រ៉ុល​ច្រើន​ជាង​ទឹកប្រមាត់​អាចរំលាយ​បាន កូ​ឡេ​ស្តេ​រ៉ុលដ៏​ច្រើន​ប្រហែល​បង្កើតបាន​ជាគ្រី​ស្តាល់ និង​គ្រួស​។​
– ទឹកប្រមាត់​ផ្ទុក​ទៅ​ដោយ​សារធាតុ Bilirubin ដ៏​ច្រើន​។ សារធាតុ Bilirubin គឺជា​ធាតុគីមី​មួយ​ប្រភេទ​ដែល​ត្រូវបាន​ផលិត​ឡើង​នៅ​ពេល​រាងកាយ​របស់​អ្នកធ្វើការ​បំបែក​គ្រាប់​ឈាមក្រហម​។ មាន​បញ្ហា​ជាច្រើន​ដែល​ធ្វើអោយ​ថ្លើម​របស់​អ្នក​នោះ​ផលិត Bilirubin ច្រើន​ដូចជា ជំងឺ​ក្រិន​ថ្លើម ការបង្ក​រោគ​នៅ​ក្នុង​ផ្លូវ​ទឹកប្រមាត់ និង​ជំងឺ​ឈាម​មិន​ធម្មតា​។ ការ​ដែល​មាន Bilirubin ច្រើន​ធ្វើអោយ​កើត​គ្រួស​ក្នុង​ទឹកប្រមាត់​បាន​។​
– ថងទឹកប្រមាត់​របស់​អ្នក​មិន​អាច​បញ្ចេញ​ទឹកប្រមាត់​អស់​។ ប្រសិនបើ​ថងទឹកប្រមាត់​មិន​អាច​បញ្ចេញ​ទឹកប្រមាត់​អស់ ឬ​គ្រប់គ្រាន់​ទេ ទឹកប្រមាត់​ប្រហែលជា​មាន​កំហាប់​ខា​ប់ ហើយ​វា​នឹង​នាំអោយ​មាន​គ្រួស​ក្នុង​ថងទឹកប្រមាត់​បាន​។​
​ប្រភេទ​គ្រួស​ក្នុង​ថង់ទឹកប្រមាត់​
​ប្រភេទ​គ្រួស​ក្នុង​ថង់ទឹកប្រមាត់​មានដូចជា​៖
– គ្រួស​កូ​ឡេ​ស្ទើ​រ៉ុល​៖ គ្រួស​ក្នុង​ថងទឹកប្រមាត់​ដែលមាន​ជា​ញឹកញាប់​បំផុត​នោះ​ឈ្មោះថា គ្រួកូ​ឡេ​ស្ទើ​រ៉ុល ដែល​ច្រើន​តែ​មាន​ពណ៌​លឿង​។ គ្រួស​ទាំងនេះ​ត្រូវបាន​ផ្សំ​ឡើង​ដោយ​កូ​ឡេ​ស្តេ​រ៉ុល​ដែល​មិន​រលាយ ប៉ុន្តែ​ប្រហែលជា​មាន​ធាតុ​ផ្សំ​អ្វី​ផ្សេង​ទៀត​។​
– គ្រួស​ពណ៌​៖ ពណ៌​របស់​គ្រួស​ប្រភេទ​នេះ​គឺ ក្រមៅ ឬ​ខ្មៅ ដែល​កើតឡើង​នៅពេល​ទឹកប្រមាត់​មាន​ផ្ទុក​ទៅ​ដោយ​សារធាតុ Bilirubin ច្រើនពេក​។​
 

​កត្តា​ប្រឈមមុខ​
​កត្តា​ដែល​ធ្វើអោយ​ប្រឈម​នឹង​គ្រួស​ក្នុង​ថង​ប្រមាត់​ច្រើន​នោះ​មាន​៖
– មនុស្ស​ស្រី​
– អាយុ​ចាប់ពី ៦០​ឆ្នាំ​ឡើង​ទៅ​
– ជនជាតិ​អាមេរិក​កាត់​ឥណ្ឌា​
– ជនជាតិ​ម៉ិចស៊ីកូ​កាត់​អាមេរិក​
– មនុស្ស​ធាត់ ឬ​ធាត់​ជ្រុល​
– មាន​ផ្ទៃពោះ​
– ចូលចិត្ត​ញ៉ាំ​អាហារ​មាន​ជាតិ​ខ្លាញ់​ខ្ពស់​
– ចូលចិត្ត​ញ៉ាំ​អាហារ​មានកូ​ឡេ​ស្តេ​រ៉ុល​ខ្ពស់​
– មិនសូវ​ញ៉ាំ​អាហារ​មាន​ជាតិ​សរសៃ​
– គ្រួសារ​ធ្លាប់មាន​ប្រវត្តិ​ជំងឺ​គ្រួស​ក្នុង​ថង​ទឹកប្រមាត់​
– មាន​ជំងឺ​ទឹកនោម​ផ្អែម​
– ប្រើ​ថ្នាំ​បញ្ចុះ​កូ​ឡេ​ស្តេ​រ៉ុល​
– ប្រើ​ថ្នាំ​ដែល​មាន​សារធាតុ Estrogen ដូចជា​ការព្យាបាល​ដោយ​ប្រើ​អ័រម៉ូន​ជំនួស ឬ​ថ្នាំ​ពន្យា​កំណើត​
 

​រោគ​វិនិច្ឆ័យ
​ការ​ធ្វើ​តេស្ត និង​ដំណើរការ​ផ្សេងៗ​ដើម្បី​រក​រោគវិនិច្ឆ័យ​ជំងឺ​គ្រួស​ក្នុង​ថង់ទឹកប្រមាត់​មាន​៖
– តេស្ត​បង្កើតជា​រូបភាព​របស់​ថង់ទឹកប្រមាត់​៖ គ្រូពេទ្យ​ប្រហែលជា​ណែនាំ​អោយ​ថត​អេកូ​ពោះ និង CT Scan ដើម្បី​បង្កើត​ជា​រូបភាព​ថងទឹកប្រមាត់​។ រូបភាព​ទាំងនេះ​អាច​វិភាគ​ដឹង​អំពី​រោគសញ្ញា​របស់​គ្រួស​ក្នុង​ថងទឹកប្រមាត់​។​
– តេស្ត​រកមើល​គ្រួស​នៅក្នុង​បំពង់​បង្ហូរ​ទឹកប្រមាត់​៖ តេស្ត​ដែល​ប្រើ​ការបំពាក់​ពណ៌​ពិសេស ទៅលើ​បំពង់​បង្ហូរទឹក​ប្រមាត់​ដើម្បី​មើល​ឃើញ​ជា​រូបភាព​ប្រហែលជា​ជួយ​អោយ​គ្រូពេទ្យ កំណត់​បាន​ថា​តើ​គ្រួស​នោះ​បណ្តាលអោយ​ស្ទះ ឬក៏​អត់​។ តេស្ត​ទាំងនេះ​ប្រហេលជា​មាន Hepatobiliary Iminodiacetic Acid (HIDA) Scan, Magnetic Resonance Imaging (MRI) ឬ Endoscopic Retrograde Cholangiopancreatography (ERCP)​។ គ្រួស​ក្នុង​ថងទឹកប្រមាត់​ដែល​រកឃើញ​ដោយ ERCP អាច​យក​វា​ចេញ​បាន​ផង​ដែរ​។​
– តេស្ត​ឈាម​រក​មើល​ផលវិបាក​៖ តេស្ត​ឈាម​ប្រហែល​ជា​ប្រាប់​អោយដឹង​ពី​ការបង្ក​រោគ ជំងឺ​លឿង រលាក​លំពែង ឬ​ផលវិបាក​ផ្សេងៗ​ទៀត​ដែល​បណ្តាល​មកពី​គ្រួស​ក្នុង​ថង់​ទឹកប្រមាត់​។​
 

​ការព្យាបាល​
​គ្រូពេទ្យ​ប្រហែលជា​ណែនាំ​អោយ​អ្នកដឹង​អំពី​រោគសញ្ញា​នៃ​ផលវិបាក​គ្រួស​ក្នុង​ថង់​ប្រមាត់​ដូចជា ការឈឺចាប់​ខ្លាំងក្លា​ក្នុង​ពោះ​ខាងលើ និង​ខាងស្តាំ​។ ប្រសិនបើ​សញ្ញរ​បស់​គ្រួសក្នុង​ថងទឹកប្រមាត់​កើត​មាន​ក្នុងពេលអនា​គ​ត អ្នក​អាច​មាន​ការព្យាបាល​បាន​។ ប៉ុន្តែ​មនុស្ស​ភាគច្រើន​ដែល​មាន​គ្រួស​ក្នុង​ថង់ទឹកប្រមាត់​មិន​បង្ក​ជា​រោគសញ្ញា ហើយក៏​មិន​បាច់​មាន​ការព្យាបាល​ដែរ​។​


​ជម្រើស​ព្យាបាល​សម្រាប់​គ្រួស​ក្នុង​ថង់ទឹកប្រមាត់​មាន​៖
– វះកាត់​ថងទឹកប្រមាត់​ចោល​៖ គ្រូពេទ្យ​ប្រហែលជា​ណែនាំ​អោយ​កាត់​ថង់ទឹកប្រមាត់​របស់​អ្នកចោល ដើម្បី​កុំអោយ​គ្រួស​នោះ​កើតឡើង​ម្តង​ទៀត​។ នៅពេល​ថង់ទឹកប្រមាត់​ត្រូវ​បាន​កាត់ចោល ទឹកប្រមាត់​ត្រូវ​ហូរ​ចូល​ពី​ថ្លើម ទៅ​ពោះវៀនតូច​ដោយផ្ទាល់ ចៀស​ជាង​ស្តុក​ទុក​ក្នុង​ថងទឹកប្រមាត់​។ អ្នក​មិន​បាច់​ត្រូវការ​ថង់ទឹកប្រមាត់​ដើម្បី​រស់​នោះ​ទេ ហើយ​ថង់ទឹកប្រមាត់​ដែល​កាត់ចោល​មិន​ប៉ះពាល់​លើ​សម្តត្ថភាព​របស់​អ្នក​ក្នុង​ការរំ​លាយ​អាហារ​ឡើយ ប៉ុន្តែ​វា​អាច​បណ្តាល​អោយ​រាគ​រុស​ជា​លក្ខណៈ​បណ្តោះអាសន្ន​។​
– ការប្រើប្រាស់​ថ្នាំ​ដើម្បី​រំលាយ​គ្រួស​នោះ​៖ ការប្រើ​ថ្នាំ​ត្រូវ​ធ្វើ​ទៅ​តាម​មាត់​ដើម្បីអោយ​ថ្នាំ​នោះ​ទៅ​រំលាយ​គ្រួស​នោះបាន​។ ប៉ុន្តែ​វា​ប្រហែល​ត្រូវ​ចាយ​ពេលវេលា​ច្រើន​ឆ្នាំ​ដើម្បី​រំលាយ​គ្រួស​ក្នុង​ថង​ទឹកប្រមាត់​។ ការប្រើប្រាស់​ថ្នាំ​សម្រាប់​ព្យាបាល​គ្រួស​ក្នុង​ថងទឹកប្រមាត់​កម្រ​នឹង​ប្រើ​ណាស់ ហើយ​វា​ប្រើ​សម្រាប់​ត្រៀម​ទុក​មនុស្ស​ដែល​មិន​អាច​ធ្វើ​ការវះកាត់​បាន​។​
 

​ផលវិបាក​
ផលវិបាក​របស់​គ្រួស​ក្នុង​ថង់ទឹកប្រមាត់​មាន​៖
– រលាក​ថង់ទឹកប្រមាត់​៖ គ្រួស​ក្នុង​ថងទឹកប្រមាត់​ដែល​ក្លាយទៅជា​ស្ទះ​នៅក្នុង​ករ​របស់​ថង់ទឹកប្រមាត់​អាច​ធ្វើអោយ​មាន​ការ​រលា​ក​បាន​។ ការ​រលាក​ថង់ទឹកប្រមាត់​អាច​បណ្តាល​អោយ​ឈឺចាប់​ធ្ងន់ធ្ងរ និង​ក្តៅខ្លួន​។​
– ស្ទះ​បំពង់​ទឹក​ប្រមាត់​៖ គ្រួស​ក្នុង​ថង់ទឹកប្រមាត់​អាចធ្វើអោយ​ស្ទះ​ដល់​បំពង់​បង្ហូរទឹក​ប្រមាត់​ដែល​ចេញពី​ថង​ទឹកប្រមាត់ ឬ​ថ្លើម​ទៅ​ពោះវៀនតូច​។ ជំងឺ​លឿង និង​ការបង្ក​រោគ​នៅក្នុង​បំពង់​ផ្លូវ​ទឹកប្រមាត់​អាច​នឹង​កើតឡើង​។​
– ស្ទះ​នៅ​បំពង់​ទឹកប្រមាត់​ចូល​ក្នុង​លំពែង​៖ បំពង់​ចូលក្នុង​លំពែង​គឺជា​បំពង់​ដែល​រត់​ពី​លំពែង​ចូលទៅ​ក្នុង​បំពង់​ទឹក​ប្រមាត់​។ រស់​លំពែង ដែល​សម្រាប់​បន្ថែម​នូវ​ការរំលាយ​អាហារ ហូរ​ចេញ​ទៅ​តាម​បំពង់​ចូលក្នុង​លំពែង​។ គ្រួស​ក្នុង​ថង​ទឹកប្រមាត់​អាច​បណ្តាល​អោយ​ស្ទះ​ដល់​បំពង់​ចូល​ក្នុង​ថង់ទឹកប្រមាត់ ដែល​អាច​នឹង​បង្ក​ជាការ​រលាក​លំពែង​បាន​។ ការ​រលាក​លំពែង​ធ្វើ​អោយ​ឈឺចាប់​ក្នុង​ពោះ​ខ្លាំង និង​តែងតែ​ទាមទារ​នូវ​ការបញ្ចូល​ទៅ​មន្ទីរពេទ្យ​។​
– មហារីក​ថង់ទឹកប្រមាត់​៖ មនុស្ស​ដែល​មាន​ប្រវត្ត​គ្រួសក្នុង​ថង់ទឹកប្រមាត់​មាន​ការប្រឈមមុខខ្ព​ស់​នឹង​មហារីក​ថង់ទឹកប្រមាត់​។ ប៉ុន្តែ​មហារីក​ថង់ទឹកប្រមាត់​វា​កម្រ​នឹង​កើត​មាន​ណាស់ ដូច្នេះ​ទោះបីជា​ការ​ប្រឈម​នឹង​មហារីក​ត្រូវបាន​កើន​ឡើង​ក៏​ដោយ ក៏​មហារីក​ថងទឹកប្រមាត់​នៅតែ​មាន​សភាព​តិចតួច​ដដែល​។​
 

​ការបង្ការ​
​ចំពោះ​ជំងឺ​គ្រួស​ក្នុង​ថង់ទឹកប្រមាត់​យើង​គ្មាន​មធ្យោបាយ​ណាមួយ​ដែល​ធានា​ថា​អាច​បង្ការ​ជំងឺ​នេះ​បានឡើយ​។ ប៉ុន្តែ​អ្នក​អាច​កាត់បន្ថយ​ការ​ប្រឈម​នឹង​ជំងឺ​គ្រួស​ក្នុង​ថងទឹកប្រមាត់​ដែល​បង្ក​ជា​រោគសញ្ញា​បាន​។​
 
​រក្សា​ទម្ងន់​អោយមាន​សុខភាព​ល្អ​
​ចូរ​រក្សា​ទម្ងន់​អោយ​នៅតែ​មាន​សុខភាព​ល្អ​ជា​និច្ច​។ បើសិន​ជា​អ្នក​ត្រូវតែ​សម្រក​ទម្ងន់ ចូរ​ធ្វើ​វា​ដោយ​យឺត និង​សម​ហេតុផល​។ នៅ​ពេល​អ្នក​ស្រក​ទម្ងន់​តាមរយៈ​រប​ប​អាហារ នោះ​អ្នកនឹង​ឡើង​ទម្ងន់​វិញ ដូច្នេះ​នៅ​តែ​ប្រឈម​កាន់តែ​ខ្ពស់​នឹង​ជំងឺ​គ្រួស​ក្នុង​ថង់ទឹកប្រមាត់​ដដែល ជាពិសេស​បើសិន​អ្នក​ជា​មនុស្ស​ស្រី​។ បើសិន​ជា​ត្រូវ​ប្រើ​របប​អាហារ​មែន ចូរ​កំណត់​គោលដៅ​អោយ​ស្រក​ទម្ងន់​ពី ០,៥​គីឡូក្រាម ទៅ ០,៧​គីឡូក្រាម ក្នុង​មួយ​សប្តាហ៍​។​
 
​ញ៉ាំ​អាហារ​អោយ​ទៀងទាត់ និង​រក្សា​តុល្យភាព​អាហារ​
​មិន​ត្រូវ​ព្យាយាម​បង្អត់អាហារ​ឡើយ ហើយ​ត្រូវ​ញ៉ាំ​អាហារ​អោយ​ទៀងទាត់​។ ចូរ​ញ៉ាំ​អាហា​រណា​ដែល​មាន​ជាតិ​ខ្លាញ់​មួយចំនួន (​ដែល​ធ្វើអោយ​រសក្នុង​ថងទឹកប្រមាត់​ចេញ​អស់​)​។ ករណី​នេះ​អាច​ជួយ​បង្ការ​ជំងឺ​គ្រួស​ក្នុង​ថងទឹកប្រមាត់​បាន​។ ចូរ​ញ៉ាំ​គ្រាប់​ធញ្ញជាតិ និង​អាហារ​មាន​ជាតិ​សរសៃ​អោយបាន​ច្រើន​។ ហើយ​ចូរ​ប្រាកដ​ថា​អ្នក​បាន​ញ៉ាំ​ងា​ហារ​ដែល​មាន​ជាតិ​កាលស្យូម​ជា​ញឹកញាប់ (​អាហារ​ធ្វើ​ពី​ទឹកដោះគោ និង​មាន​ពណ៌​បៃតង​, បន្លែ​ពណ៌​បៃតង​)​។ កាត់បន្ថយ​ខ្លាញ់​ប្រភេទ​Saturated Fat (​ខ្លាញ់​សត្វ​) និង​អាហារ​មាន​ជា​តិកូ​ឡេ​ស្ទើ​រ៉ុល​ខ្ពស់​។​
 
​ការ​ហាត់ប្រាណ​ជា​ទៀងទាត់​
​បើសិន​ជា​អ្នក​ហាត់ប្រាណ​បាន​ច្រើន អ្នក​ប្រហែលជា​អាច​កាត់បន្ថយ​ការ​ប្រឈម​នឹង​ជំងឺ​គ្រួស​ក្នុង​ថង់ទឹកប្រមាត់​បាន​។ ជាមួយនឹង​ការ​ញ៉ាំ​របប​អាហារ​មាន​ជាតិ​ខ្លាញ់​ទាប ការ​ហាត់ប្រាណ​ក៏​ជា​វិធី​ដ៏​មាន​ប្រសិទ្ធភាព​ក្នុង​ការជួយ​អោយ​អ្នក​ស្ថិត​ក្នុង​ទម្ងន់​ដ៏​មាន​សុខភាព និង​កាត់បន្ថយ​កម្រិត​កូ​ឡេ​ស្តេ​រ៉ុល ព្រមទាំង​ខ្លាញ់ Triglyceride ទៀតផង​។​
 
​ការសម្រេចចិត្ត​ត្រូវ​ប្រើ Estrogen
​អំណះអំណាង​មួយចំនួន​បង្ហាញ​អោយដឹងថា ការប្រើ​អ័រម៉ូន​ដូចជា Estrogen ក្រោយ​ពី​រ៉ាំ​ង​រដូវ​រួច ឬ​កំពុង​ប្រើ​ថ្នាំ​ពន្យា​កំណើត​ក្នុង​កម្រិត​ខ្ពស់​ប្រហែល​ជា​ប្រឈម​មុខ​កាន់តែ​ខ្ពស់​ទៅ​នឹង​ជំងឺ​គ្រួស​ក្នុង​ថងទឹកប្រមាត់​បាន​។ បើសិន​ជា​អ្នក​កំពុង​ប្រើ​អ័រម៉ូន​អស់ទាំង​នេះ ចូរ​ទៅ​ពិគ្រោះ​ជាមួយ​គ្រូពេទ្យ​អំពី​រឿង​នេះ​ទៅ​៕