នៅពេលដែលកូនក្តៅខ្លួន អ្នកពិតជាឈឺទាំងកាយ និងចិត្តដែរហើយ។ ប៉ុន្តែចូរចាំថា ការក្តៅខ្លួនគឺជារបៀបដែលរាងកាយប្រឆាំងនឹងការបង្ករោគ។ បើសិនជាកូនតូចអ្នកកំពុងតែក្តៅខ្លួនមែននោះ កុំបាច់បារម្ភអី។ ភាគច្រើន ការក្តៅខ្លួនគឺជាការបង្ករោគដោយវីរុស ដែលវានឹងបាត់ទៅវិញដោយខ្លួនឯង។ នេះមិនមែនមានន័យថា កូនអ្នកមិនត្រូវការយកចិត្តនោះទេ។ ខាងក្រោមនេះគឺជារឿងខ្លះៗដែលអ្នកគួរធ្វើនៅពេលកូនក្តៅខ្លួនខ្លាំង។
មិនត្រូវឱ្យគេប្រើថ្នាំផ្សះ
ភាគច្រើនក្មេងក្តៅខ្លួនខ្លាំងបំផុតគឺ ៣៧ ទៅ៣៨ អង្សាសេ និងមិនត្រូវការប្រើថ្នាំផ្សះឡើយ។ ការព្យាបាលអាការៈក្តៅខ្លួនជាមួយនឹងសេរ៉ូប៉ារ៉ានឹងមានប្រសិទ្ធភាពយ៉ាងល្អ ក្រោយពីពិគ្រោះជាមួយគ្រូពេទ្យរួច។ ចូរចាំថា ថ្នាំផ្សះប្រើបានទាល់តែគ្រូពេទ្យសង្ស័យទៅលើការបង្ករោគដោយបាក់តេរី និងបណ្តាលឱ្យក្តៅខ្លួន។
រក្សាអនាម័យដៃ
ការធ្វើបែបនេះនឹងប្រាកដថា អ្នកបានកាត់បន្ថយការបង្ករោគបានច្រើនបំផុត។ ការលាងសម្អាតដៃ ឬការប្រើទឹកលាងដៃមុនពេល និងក្រោយញ៉ាំអាហាររួចគឺជារឿងដ៏សំខាន់។
ត្រូវញ៉ាំអាហារស្រស់ៗជានិច្ច
ផ្លែឈើ ទឹកផ្លែឈើធ្វើដោយខ្លួនឯង និងអាហារចំអិនដោយខ្លួនឯងគឺជាជម្រើសដ៏ល្អបំផុតដើម្បីជួយបង្កើនមុខងារប្រព័ន្ធភាពស៊ាំរបស់កូនកាន់តែល្អជាងមុន។
ចៀសវាងការបង្ខំឱ្យកូនបៅបើគេរាក និងក្អួត
ស្ថិតក្នុងករណីនេះ ដើម្បីជំនួសនូវការបាត់បង់ជាតិទឹកយ៉ាងច្រើន អ្នកគួរតែឱ្យគេញ៉ាំទឹកណាដែលមានអេឡិចត្រូលីត្រខ្ពស់ ដូចជាទឹកអំបិល លាយស្ករដែលធ្វើឱ្យខ្លួនឯង ទឹកផ្លែឈើ ឬទឹកដែលអាលបង្គ្រប់ជាតិទឹកបានវិញ។
បន្ថែមប្រូបាយអូទិចក្នុងរបបអាហារ
ការធ្វើបែបនេះនឹងជួយដល់ការរំលាយអាហារ និងពង្រឹងដល់ប្រព័ន្ធភាពស៊ាំទៀត។
បញ្ចុះកម្តៅ
យកល្អគួរតែឱ្យក្មេងងូតទឹកក្តៅឧណ្ហៗ ឬប្រើកន្សែងត្រជាក់ស្អំខ្លួន។ អ្នកក៏អាចធ្វើបែបនេះម្តងទៀតនៅពេលក្តៅខ្លួនម្តងទៀត។
តាមដានទឹកនោម
បើសិនជាកូនអ្នកមិននោមរយៈពេល ៦ ទៅ ៦ម៉ោង វាអាចជាសញ្ញានៃជំងឺខ្សោះជាតិទឹកហើយ។ ដូច្នេះការព្យាបាលអាចនឹងតម្រូវឱ្យដាក់សេរ៉ូមតាមសរសៃហើយ។
ចៀសវាងការឱ្យទឹក ឬអាហារក្រោយពីគេក្អួតរួច
ចូររងចាំយ៉ាងហោចណាស់ ៣០នាទីសិនមុនពេលឱ្យអាហារ ឬទឹកទៅកូនញ៉ាំបន្ទាប់ពីក្អួតរួច។
រកមើលសញ្ញាផ្សេងៗ
បើសិនជាការក្តៅខ្លួនរបស់កូនមិនថយចុះក្នុងរយៈពេល ៣ថ្ងៃ និងមិនស្រួល ព្រមទាំងក្អួតយ៉ាងហោចណាស់ ៥ ទៅ៦ដងក្នុងមួយថ្ងៃ អ្នកប្រហែលជាត្រូវនាំគេទៅជួបពេទ្យកុមារហើយ។ ការធ្វើតេស្តឈាម ឬទឹកនោមអាចជារឿងសំខាន់៕