Join with Health.com.kh on Telegram

ជំងឺមហារីក​គ្រាប់​ឈាមស​កើត​ចេញពី​ខួរឆ្អឹង​ដែល​ជា​ជាលិការ​ទន់​ៗ​នៅ​ខាងក្នុង​ឆ្អឹង​។ ខួរឆ្អឹង​គឺជា​កន្លែង​ផលិត​គ្រាប់​ឈាម​។ នៅ​ពេល​មាន​សុខភាព​ល្អ ខួរឆ្អឹង​មាន​នាទី​ផលិត​៖

  • ​កោសិការ​គ្រាប់​ឈាម​ស សម្រាប់​ជួយ​ប្រឆាំង​នឹង​ការបង្ក​រោគ​
  • ​កោសិការ​គ្រាប់​ឈាម​ក្រហម សម្រាប់​ដឹកនាំ​អុកស៊ីសែន​ចែកចាយ​គ្រប់​កន្លែង​ទាំងអស់​នៃ​រាងកាយ​
  • ​ផ្លាកែ​ត​សម្រាប់​ជួយ​អោយ​ឈាម​កក​។​

នៅ​ពេល​មាន​ជំងឺមហារីក​គ្រាប់​ឈាមស ខួរឆ្អឹង​ចាប់ផ្តើម​បង្កើត​កោសិការ​គ្រាប់​ឈាមស​ដែល​មិនធម្មតា​ជា​ច្រើន​។ កោសិការ​ទាំងនេះ​មិន​អាច​បំពេញ​មុខងារ​ដូច​កោសិការ​គ្រាប់​ឈាមស​ធម្មតា​បាន​ទេ​, លូតលាស់​លឿន​ជាង​កោសិការ​ធម្មតា និង​មិន​អាច​បញ្ឈប់​ការ​លូតលាស់​នោះ​បាន​ឡើយ​។

រោគ​សញ្ញា​របស់​ជំងឺ​នេះ​អាស្រ័យ​ទៅ​តាម​ប្រភេទ​របស់​ជំងឺ​នេះ​ដែរ ប៉ុន្តែ​រោគ​សញ្ញា​ដែល​គេ​ជួប​ប្រទះ​ជា​ញឹកញាប់​មាន​ដូច​ជា​៖

  • ​ក្តៅខ្លួន និង​បែកញើស​ពេលយប់​
  • ​ឈឺក្បាល​
  • ​ជាំ​ស្បែក ឬ​ងាយ​នឹង​ហូរឈាម​
  • ​ឈឺ​សន្លាក់ ឬ​ឆ្អឹង​
  • ​ហើម​ពោះ ឬ​ឈឺពោះ​ដោយសារ​តែ​អណ្តើក​រីក​ធំ​
  • ​ហើម​កូនកណ្តុរ​នៅ​ឃ្លៀក​, ក ឬ​គ្រលាន​
  • ​ឧស្សាហ៍​ឈឺ​ច្រើនដង​
  • ​មាន​អារម្មណ៍​ថា​អស់កម្លាំង​ខ្លាំង​
  • ​ស្រក​ទម្ងន់ និង​មិន​ឃ្លាន​អាហារ​៕