នៅពេលដែលទារកទើបនឹងកើតត្អើក ធម្មតាឪពុកម្តាយតែងតែបារម្ភ ឬច្រឡំថាធ្វើអ្វីផ្សេងដើម្បីជួយគេ។ ប៉ុន្តែចូរយល់ថា ការត្អើកគឺជារឿងធម្មជាតិ ហើយកូនអ្នកកំពុងតែធ្វើរឿងនេះដូចតាំងពីគេនៅក្នុងពោះម្ល៉េះ (ចាប់ពីត្រីមាសទីពីរឡើងទៅ)។ ថ្វីបើរឿងនេះធ្វើឱ្យអ្នកបារម្ភមែននោះ តែវាមិនមែនជាបញ្ហាពិតប្រាកដចំពោះកូនអ្នកឡើយ។
អ្វីទៅជាការត្អើក?
វាគឺជាការកន្ត្រាក់របស់សាច់ដុំខ័ណ្ឌរវាងទ្រូង និងពោះ ដែលស្ថិតនៅក្រោមសួត និងមាននាទីក្នុងការធ្វើឱ្យដកដង្ហើមដែរ។ នៅពេលសាច់ដុំមួយនេះកន្ត្រាក់ វានឹងបត់ខ្សែសម្លេង ដូច្នេះទើបង្កើតបានជាសម្លេងត្អើកកើតឡើង។
ហេតុអ្វីបានជាអញ្ជឹង?
ការត្អើកមានហេតុផលរបស់វាច្រើនណាស់ តែភាគច្រើនកើតឡើងដោយសារការលេបខ្យល់ក្នុងពេលញ៉ាំអាហារ តឹងពោះ ឬអាចដោយសារបញ្ហាធ្ងន់ធ្ងរមួយចំនួនដែរដូចជា ជំងឺច្រាលទឹកអាស៊ីតពីក្រពះ ឬមានបញ្ហាផ្លូវដង្ហើម។
តើអ្នកគួរធ្វើអ្វីខ្លះទៅ?
- កុំភ័យអ្វីទាំងអស់
- ជាធម្មតា ការត្អើកនឹងបាត់ទៅវិញដោយខ្លួនឯង។ យ៉ាងណាមិញ ចូរផ្តល់ផាសុកភាពដល់កូន ដោយធ្វើឱ្យគេភើរ។
- ចូរពរកូនឡើង ហើយដាក់ចង្ការគេកល់លើស្មារបស់អ្នក។ អ្នកអាចម៉ាស្សាខ្នងរបស់គេពីក្រោមឡើងទៅលើដើម្បីជួយឱ្យគេភើរ។
- ក្នុងករណីដែលកូនត្អើកពេលកំពុងបៅ ចូរចំណាយពេលសម្រាកមួយភ្លេតសិន ហើយចាំឱ្យគេបៅម្តងទៀត។
- ដើម្បីបង្ការការត្អើកញឹកញាប់ ចូរឱ្យកូនបៅតិចៗ តែច្រើនដង។
- បើសិនជាបំបៅកូនដោយដបទឹកដោះគោ ចូរប្រាកដថា ឱ្យគេសម្រាកក្នុងរយៈពេល ២ ទៅ៣នាទីម្តង។
ពេលដែលត្រូវបារម្ភ
- ការត្អើកញឹកញាប់អាចជាសញ្ញារបស់ជំងឺច្រាលទឹកអាស៊ីតពីក្រពះ។ បើសិនជាកូនត្អើកញឹក ក្រោយពីបៅម្តងៗ ឬពីរ ទៅបីដង និងមានរយៈពេលច្រើនម៉ោងមែននោះ ចូរនាំគេទៅជួបគ្រូពេទ្យ។
- ការត្អើកញឹកញាប់បំផុតក៏អាចជាសញ្ញាបញ្ជាក់អំពីបញ្ហាផ្លូវដង្ហើមដែលត្រូវការយកចិត្តទុកដាក់ដែរ៕