ការស្វែងយល់ពីចំណង់ចំណូលចិត្តរបស់កូនក្មេងគឺជាអ្វីដែលអ្នកត្រូវតែធ្វើជាចាំបាច់ ព្រោះបើអ្នកដឹងថាគេចូលចិត្តលេងអ្វី នោះអ្នកនឹងមិនចាំបាច់ចំណាយលុយជាច្រើនក្នុងការទិញរបស់ច្រើនឲ្យកូនលេងឡើយ ដូចនេះតើកូនក្មេងដែលមានអាយុពី៣ទៅ៦ឆ្នាំលេងអ្វីបានយូរជាងគេ ហើយមិនងាយធុញនោះ?
ដីឥដ្ឋ
ដីឥដ្ឋគឺជារបស់ដែលអាចបង្កើនគំនិតច្នៃប្រឌិតរបស់កូន ព្រោះនៅពេលដែលកូនលេង គេនឹងយកវាមកធ្វើជាទង្រង់ខុសៗគ្នា ប៉ុន្តែមុននឹងអ្នកទិញ អ្នកត្រូវតែមើលពីសារធាតុផ្សំរបស់វា ចៀសវាងធ្វើឲ្យកូនមានគ្រោះថ្នាក់ អ្នកក៏អាចធ្វើដីឥដ្ឋឲ្យកូនលេងដោយខ្លួនឯងដែរ ដោយអ្នកអាចស្វែងរកវិធីធ្វើតាមGoogleបាន នោះកូននឹងមានសុវត្ថិភាពក្នុងការលេង។
ក្តាររៀបA B C
ក្តាររៀបនេះមិនត្រឹមតែអាចធ្វើឲ្យកូនលេងបានយូរនោះទេ ថែមទាំងអាចជួយបង្រៀនកូនឲ្យចេះតួអក្សរនោះទៀតផង ដោយអ្នកអាចលេងជាមួយគេបាន ហើយបែងចែកតួអក្សរ ហើយប្រកួតរៀបជាមួយកូន នោះគេនឹងលេងដោយសប្បាយជាមិនខាន។
សង់ផ្ទះ
កូនក្មេងភាគច្រើនសុទ្ធតែចូលចិត្តល្បែងសង់ផ្ទះនេះ មិនថាក្មេងស្រី ឬប្រុសឡើយ ហើយក៏ជាល្បែងដែលគេលេងបានយូរ ហើយមិនធុញដែរ ម្យ៉ាងទៀតវានឹងជួយកូនឲ្យមានគំនិតច្នៃប្រឌិតកាន់តែខ្ពស់។
សំភារៈផ្ទះបាយជ័រ
សំភារៈផ្ទះបាយគឺជាចំណូលចិត្តរបស់កូនគ្រប់រូប ព្រោះនៅពេលដែលគេលេងជាមួយកូនក្មេងដទៃ គេអាចធ្វើជាអ្នកលក់ និងទិញ ដូចនេះគេនឹងអង្គុយលេងបានយូរណាស់ ដោយមិនរករឿងអ្នកឡើយ ដូចនេះអ្នកអាចបំពេញការងាររបស់អ្នកបាន ប៉ុន្តែត្រូវតែទិញរបស់ដែលធំៗ មិនត្រូវទិញអាតូចឡើយ ព្រោះកូនអាចលេបចូលក្នុងពោះបាន នោះវានឹងមានគ្រោះថ្នាក់ខ្លាំងណាស់។
គំនូរ
ការផាត់គំនូរផ្សេងៗក៏ជាចំណូលចិត្តរបស់ពួកគេដែរ ដូចនេះអ្នកអាចទិញឲ្យគេផាត់បាន នោះគេនឹងអាចអង្គុយស្ងៀមបានប្រហែល១៥ទៅ២០នាទី៕