មនុស្សទាំងអស់សុទ្ធតែមានអារម្មណ៍មិនល្អ កូនក្មេងក៏អញ្ចឹងដែរ។ ដោយសារតែកូនខ្វះភាពអត់ធ្មត់ ដូចនេះគេតែងតែរករឿងដែលធ្វើឲ្យអ្នកមានអារម្មណនឿហត់ជាខ្លាំង។ ហើយនៅពេលដែលកូនរករឿង អ្នកម្តាយមួយចំនួនបានប្រើរបៀបខុសដើម្បីដោះស្រាយ ដែលធ្វើឲ្យប៉ះពាល់ដល់ខ្លួនឯង និងកូន។ ដូចនេះតើអ្នកមិនអាចធ្វើអ្វីខ្លះ?
មិនអាចបញ្ចេញកំហឹង
នៅពេលដែលកូនរករឿង អ្នកមិនត្រូវមានអារម្មណ៍មួលម៉ៅដូចគេ ដោយនិយាយពាក្យគំរាមមួយចំនួន ឬស្រែកដាក់គេនោះទេ ព្រោះវាអាចធ្វើឲ្យគេគ្មានអារម្មណ៍សុវត្ថិភាពក្នុងខ្លួន ហើយខ្លាចអ្នកទៀតផង ដូចនេះគេអាចធ្វើរឿងមួយចំនួនដើម្បីសងសឹកអ្នកវិញ។
មិនត្រូវធ្វើជាទាសកររបស់អារម្មណ៍កូន
មានន័យថានៅពេលដែលកូនមានអារម្មណ៍មិនល្អ ហើយរករឿង អ្នកមិនត្រូវទិញរបស់មកលួងឲ្យគេបាត់នោះទេ ព្រោះវាអាចធ្វើឲ្យកូនធ្វើបែបនេះរហូតដើម្បីចង់បានរបស់ពីអ្នក។
មិនត្រូវនិយាយអប់រំកូន
នៅពេលដែលកូនពិបាកចិត្ត ឬខឹង អារម្មណ៍កូនទាំងមូលគឺផ្តោតទៅលើនោះទាំងអស់ហើយ ដូចនេះអ្នកមិនត្រូវនិយាយពាក្យអប់រំមួយចំនួនដាក់គេទេ ព្រោះគេស្តាប់មិនចូលត្រចៀកឡើយ ថែមទាំងអាចធ្វើឲ្យគេកាន់តែរករឿងទៀតផង។
មិនត្រូវនិយាយខ្លាំងៗ
នៅពេលដែលកូនកំពុងតែខឹង និងរករឿង ហើយអ្នកបែរជានិយាយពាក្យធ្ងន់ៗមួយចំនួនតបទៅកូនវិញ វានឹងបន្សល់ទុកពាក្យទាំងនោះនៅក្នុងចិត្តកូនជារៀងរហូត៕
រឿងដែលអ្នកមិនគួរធ្វើពេលកូនមានអារម្មណ៍មួលម៉ៅ
