ការដើរខ្យល់ ឬ ផោម គឺជារឿងធម្មតា។ ជាទូទៅមនុស្សយើងផោមជាមធ្យម ១៤ដងក្នុងមួយថ្ងៃ។ ៩៩%នៃផោមទាំងនេះ គឺមិនមានក្លិននោះទេ។ តែពេលខ្លះ វាភាយក្លិនមកធ្វើឱ្យយើងទ្រាំហិតមិនបាន។ តើអ្នកឆ្ងល់ទេ ថាតើហេតុអ្វីបានជាផោមពេលខ្លះមានក្លិនស្អុយស្ទើរទ្រាំមិនបាន?
![](https://www.health.com.kh/wp-content/uploads/2021/07/image-21.png)
វេជ្ជបណ្ឌិត Patricia Raymond ឯកទេសខាងក្រពះពោះវៀននិងជំនួយការសាស្រ្តាចារ្យផ្នែកវេជ្ជសាស្ត្រនៅរដ្ឋ Virginia Beach បានមានប្រសាសន៍ថា មូលហេតុនៃក្លិនពិបាកច្រមុះនេះ គឺមកពីការដុះមេរបស់មេរោគនៅក្នុងពោះវៀន។ ខាងក្រោមនេះ ជាមូលហេតុ៣យ៉ាង ដែលធ្វើឱ្យផោមរបស់យើងមានក្លិនអាក្រក់៖
១. បាក់តេរីនៅក្នុងពោះវៀនរបស់អ្នក
វេជ្ជបណ្ឌិត Raymond បានលើកឡើងថា អំឡុងពេលរំលាយអាហារបាក់តេរីពោះវៀន បង្កើតសមាសធាតុដែលមានជាតិស្ពាន់ធ័រ ហើយវាស្ថិតនៅក្នុងជាទម្រង់អ៊ីដ្រូសែនស៊ុលភីត។ សារធាតុនេះហើយ ដែលជាអ្នកបង្កើតក្លិននៅក្នុងផោមរបស់យើងឱ្យស្អុយរលួយ។
![](https://www.health.com.kh/wp-content/uploads/2021/07/image-22.png)
២. អាហារដែលសំបូរទៅដោយស្ពាន់ធ័រ
អាហារដែលមានជាតិស្ពាន់ធ័រខ្ពស់ ធ្វើឱ្យផើមរបស់យើងមានក្លិនដូចពងទាស្អុយ។ វាមានដូចជា ផ្កាខាត់ណាខៀវ ស្ពៃខៀវ ផ្កាខាត់ណាស ស្ពៃក្តោប ខ្ទឹម ខ្ទឹមបារាំង ឈីស ពងទា សាច់ ស្រាបៀរ និង ស្រាជាដើម។
៣. បញ្ហាទល់លាមក
ហេតុផលនេះ មិនចាំបាច់ពន្យល់ច្រើននោះទេ។ ជាធម្មតា លាមកគឺមិនដែលមានក្លិនល្អនោះទេ។ ចុះប្រសិនបើវានៅក្នុងពោះរៀនរបស់យើងយូរជាងធម្មតាវិញ? វាគឺប្រាកដណាស់នឹងធ្វើឱ្យផោមរបស់យើង មានក្លិនដូចលាមកអ៊ីចឹង៕