នៅពេលកូនៗរបស់អ្នកស្រេកទឹក ពួកគេងាយនឹងអស់កម្លាំងយ៉ាងខ្លាំង។ ជាការពិតការសិក្សាបង្ហាញថា ការមិនបំពេញបន្ថែមទឹកដាក់ឱ្យរាងកាយបានគ្រប់គ្រាន់ទេ គឺជាមូលហេតុទីមួយនៃការហេវហត់អស់កម្លាំង។ យោងតាមការលើកឡើងរបស់លោកវេជ្ជបណ្ឌិត F. Batmangheldj បានឱ្យដឹងថា ទឹកគឺជាប្រភពថាមពលចម្បងនៅក្នុងរាងកាយ។
នៅក្នុងការសិក្សាមួយបានបង្ហាញថា កុមារងាយនឹងអស់កម្លាំង ហើយរៀនមិនចូល នៅពេលដែលសាលារៀនរបស់ពួកគេមិនអនុញ្ញាតឱ្យផឹកទឹកនៅពេលម៉ោងរៀន។ ជាធម្មតា ក្មេងនៅសាលាត្រូវការផឹកទឹកពេលម៉ោងរៀន ដោយសារតែទឹកមានអត្ថប្រយោជន៍ដល់សុខភាពរបស់ពួកគេដូចជា៖
- រក្សាខួរក្បាលរបស់ពួកគេឱ្យមានភាពរស់រវើក និង ធ្វើការបានល្អ
- ទឹកផ្តល់ថាមពលភ្ញោចដល់មុខងារខួរក្បាល ជាពិសេសទៅលើការគិត
- ជាតម្រូវការចាំបាច់សម្រាប់ការផ្តោតអារម្មណ៍
- ទឹកក៏អាចជួយការពារជម្ងឺឱនភាពនៃការយកចិត្តទុកដាក់ចំពោះកុមារ (និងមនុស្សធំ)។ ជាការពិត ក្មេងដែលផឹកទឹកច្រើនការយកចិត្តទុកដាក់របស់ពួកគេនឹងកើនឡើង។
- ទឹកធ្វើឱ្យភាពស៊ីគ្នារវាងចិត្តនិងរាងកាយ។
ជាទូទៅ បរិមាណដែលកុមារត្រូវការផឹក អាចខុសគ្នាយ៉ាងខ្លាំងអាស្រ័យលើអាយុនិងភេទ ក៏ដូចជាអាកាសធាតុនិងសកម្មភាពរាងកាយ។ អាជ្ញាធរសុវត្ថិភាពចំណីអាហារអឺរ៉ុប (EFSA) មានគោលការណ៍ណែនាំអំពីតម្រូវការទឹករបស់កុមារ។ ជាទូទៅកុមារអាយុពី៤ឆ្នាំទៅ៨ឆ្នាំ មិនថាជាកុមារាឬកុមារី គួរទទួលទានទឹកមួយថ្ងៃឱ្យបានចន្លោះពី១.១លីត្រ ទៅ ១.៣លីត្រ។ ចំណែកឯនៅអាយុពី៩ឆ្នាំទៅ១៣ឆ្នាំ កុមារីត្រូវការទឹកប្រហែលពី ១.៣លីត្រ ទៅ ១.៥លីត្រ ខណៈដែលកុមារានៅអាយុដូចគ្នា ត្រូវការទឹកប្រហែលពី ១.៥លីត្រ ទៅ ១.៧លីត្រ ក្នុងមួយថ្ងៃ៕