Join with Health.com.kh on Telegram

រោគ​សញ្ញា​របស់​ជំងឺ​រលាក​សួត​អាច​នឹង​ប្រែប្រួល​ពី​តិចតួច​ទៅ​ធ្ងន់ធ្ងរ អាស្រ័យ​តាម​កត្តា​ជា​ច្រើន​ដូច​ជា ប្រភេទ​មេរោគ អាយុ និង​សុខភាព​ទូទៅ​។ រោគ​សញ្ញា​តិចតួច​អាច​ស្រ​ដៀង​គ្នា​នឹង​អ្នកមាន​ជំងឺ​ផ្តាសាយ​ដែរ ប៉ុន្តែ​យូរ​ជាង​។

រោគ​សញ្ញា​ដែល​អាច​គិតដល់​ថា​អ្នកមាន​ជំងឺ​រលាក​សួត​នោះ​មាន​ដូច​ជា​៖
• បែកញើស ក្តៅខ្លួន និង​គ្រុនញាក់
• ក្អកមាន​ស្លេស
• ឈឺទ្រូង​ពេល​ដកដង្ហើម ឬ​ក្អក
• ពិបាក​ដកដង្ហើម
• អស់កម្លាំង
• ចង្អោរ ក្អួត ឬ​រាក

ចំពោះ​ទារក​ទើបនឹង​កើត​មិន​អាច​បង្ហាញ​ជា​សញ្ញា​អ្វី​ទាំងអស់​។ ឬ​ពួក​គេ​អាច​នឹង​ក្អួត ក្តៅខ្លួន និង​ក្អក គេង​មិនកើត និង​អស់កម្លាំង ឬ​ពិបាក​ដកដង្ហើម និង​ញ៉ាំ​អាហារ​។

អ្នក​ដែល​មាន​អាយុ​ច្រើន​ជាង ៦៥​ឆ្នាំ និង​មាន​សុខភាព​មិនល្អ ឬ​មាន​ប្រព័ន្ធ​ភាពស៊ាំ​ចុះ​ខ្សោយ​ប្រហែលជា​មាន​សីតុណ្ហភាព​ទាប​ជាង​ធម្មតា​វិញ​។ ចំពោះ​មនុស្ស​ចាស់​ដែល​មាន​ជំងឺ​រលាក​សួត ពេល​ខ្លះ​អាច​នឹង​មានការ​ប្រែប្រួល​ខាង​ផ្លូវចិត្ត​ភ្លាម​ៗ​។

ពេល​ដែល​គួរ​ជួប​គ្រូពេទ្យ
ចូរ​ទាក់ទង​គ្រូពេទ្យ​បើសិនជា​អ្នកមាន​បញ្ហា​ពិបាក​ដកដង្ហើម ឈឺទ្រូង ក្តៅខ្លួន ៣៩​អង្សា​ឡើង​ទៅ ឬ​ក្អក​ជាប់ ជា​ពិសេស​ក្អកមាន​ធ្លាក់​ខ្ទុះ​ចេញ​តែ​ម្តង​។
វា​ពិតជា​សំខាន់​ណាស់​ដែល​មនុស្ស​ដែល​ប្រឈម​មុខ​ខ្ពស់​ខាងក្រោម​នេះ​ត្រូវ​ជួប​គ្រូពេទ្យ​ពិនិត្យ​៖
• ក្មេង​អាយុ​តិច​ជាង ២​ឆ្នាំ ហើយ​មាន​រោគ​សញ្ញា
• មនុស្ស​ចាស់​អាយុ​ច្រើន​ជាង ៦៥​ឆ្នាំ
• អ្នកមាន​ជំងឺ ឬ​ប្រព័ន្ធ​ភាពស៊ាំ​ចុះ​ខ្សោយ
• កំពុង​តែ​ព្យាបាល​ជំងឺមហារីក ឬ​ប្រើ​ថ្នាំ​ដើម្បី​ទប់​ប្រព័ន្ធ​ភាពស៊ាំ

សម្រាប់​មនុស្ស​ចាស់ និង​អ្នកជំងឺ​ខ្សោយបេះដូង ឬ​អ្នកមាន​បញ្ហា​សួត​រ៉ាំរ៉ៃ​មួយ​ចំនួន ជំងឺ​រលាក​សួត​អាច​ក្លាយទៅជា​ជំងឺ​គម្រាម​គំ​ហែង​ដល់​អាយុជីវិត​ពួក​គេ​បាន​យ៉ាង​លឿន​៕