ក្អួតឈាម( hematemesis )គឺសំដៅទៅលើបរិមាណនៃឈាមដែលមាននៅក្នុងកំអួតដែលអ្នកបានក្អួត។ មានឈាមតិចតូច ឬមានស្នាមនៃឈាមនៅក្នុងអ្វីដែលអ្នកបានស្ដោះ ឬក៏ក្អកចេញមកគឺជាទូទៅមិនត្រូវបានចាត់ទុកថាជាការក្អួតឈាមនោះឡើយ។ ឈាមមាននៅក្នុងកំអួត អាចនឹងមានពណ៌ក្រហមស្រស់ ឬអាចជាពណ៌ខ្មៅ ឬត្នោតចាស់ដូចកាហ្វេ។ ខណៈដែលការក្អួតមកមានឈាមអាចត្រូវបានបង្កឡើងដោយការលេបឈាមចូលទៅដូចជាការឈាមច្រមុះ ឬការប្រឹងក្អកខ្លាំង តែការក្អួតឈាមពិតប្រាកដជាធម្មតាគឺជាការស្តែងនៃលក្ខខណ្ឌធ្ងន់ធ្ងរមួយចំនួនបន្ថែមទៀតហើយដែលតម្រូវអោយមានការយកចិត្តទុកដាក់ពីគ្រូពេទ្យជាបន្ទាន់។ មានការហូរឈាមនៅក្នុងផ្នែកខាងលើនៃបំពង់រំលាយអាហារ( មាត់ បំពង់អាហារ ក្រពះ និងពោះវៀនតូចផ្នែកខាងលើ)ដែលបណ្តាលមកពីការមានដំបៅ(peptic Ulcer) ឬមានការរហែកសរសៃឈាមគឺជាមូលហេតុជាទូទៅមួយនៃការក្អួតឈាម។
សូមស្វែងរកជំនួយសង្គ្រោះបន្ទាន់ ប្រសិនបើ ក្អួតឈាមបណ្តាលអោយមានការវិលមុខបន្ទាប់ពីងើបឈរ ដកដង្ហើមញាប់ ឬមានសញ្ញាផ្សេងទៀតនៃការខ្វះឈាមទៅចិញ្ចឹមកោសិកា។ ខាងក្រោមនេះគឺជាមូលហេតុផ្សេងទៀតនៃការក្អួត ឈាម៖
- ជំងឺខ្សោយថ្លើមស្រួចស្រាវ
- ជំងឺរលាកថ្លើមដោយសារជាតិអាល់កុល(ស្រា)
- ការប្រើប្រាស់ថ្នាំAspirin
- មានដុំសាច់ស្លូតនៅក្នុងក្រពះ ឬបំពង់អាហារ
- ជំងឺក្រិនថ្លើម
- ជំងឺនៃសរសៃឈាមដែលទៅចិញ្ចឹមបំពង់រំលាយអាហារ
- ការរលាកនៅក្នុងផ្នែកដំបូងនៃពោះវៀនតូច
- ជំងឺមហារីកបំពង់អាហារ(Esophagus)
- សរសៃឈាមវ៉ែនរីកនៅក្នុងបំពង់អាហារ(Esophageal Varices)
- ជំងឺរលាកក្រពះ
- ការប្រើប្រាស់ថ្នាំប្រឆាំងនឹងការរលាកមិនមែនជាស្តេរ៉ូអ៊ីត( NSAIDs )
- មហារីកលំពែង
- ជំងឺរលាកលំពែង
- ដំបៅក្រពះ(Peptic Ulcer)
- លើសសម្ពាធឈាមក្នុងសសៃវ៉ែនចាក់ចូលក្នុងថ្លើម(Portal Vein HTN)
- ក្អួតខ្លាំងពេក ឬក៏យូរពេក
- ជំងឺមហារីកក្រពះ
សូមរកការសង្គ្រោះបន្ទាន់ ប្រសិនបើក្អួតឈាមបណ្តាលអោយមានរោគសញ្ញានៃការខ្វះឈាមទៅចិញ្ចឹមកោសិកា(Shock)ដែលមានដូចជា៖
- ដកដង្ហើមញាប់
- វិលមុខ ឬមានអារម្មរណ៏ថាស្រាលក្បាលបន្ទាប់ពីងើបឈរ
- ស្រវាំងភ្នែក
- ដួលសន្លប់
- មានភាពភ័ន្តភាំង
- ចង្អោរ
- ត្រជាក់សាច់ ប្រឺសម្បុរ ស្លេកស្លាំង
- ថយចុះបរិមាណទឹកនោម
សូមស្វែងរកការថែទាំវេជ្ជសាស្ត្រពីគ្រូពេទ្យជាបន្ទាន់។ ស្នើរអោយនរណាម្នាក់នាំអ្នកទៅកាន់បន្ទប់សង្គ្រោះបន្ទាន់ប្រសិនបើអ្នកសម្គាល់ឃើញមានឈាមក្នុងកំអួត ឬចាប់ផ្តើមក្អួតឈាម។ វាជារឿងសំខាន់ដើម្បីកំណត់អោយបានឆាប់ពីមូលហេតុនៃការហូរឈាម និងបងា្ករការបាត់បង់ឈាមធ្ងន់ធ្ងរបន្ថែមទៀត រួមទាំងផលវិបាកផ្សេងៗទៀតផងដែរ៕