Join with Health.com.kh on Telegram

រាជធានីភ្នំពេញ ៖ សក់ជ្រុះ គឺជាបញ្ហាចោទខ្លាំង ដោយសារតែវាអាចធ្វើឱ្យអ្នកទំពែកបានក្នុងរយៈពេលខ្លី ប្រសិនបើមិនបានរកដំណោះស្រាយត្រឹមត្រូវ ។ វិធីដោះស្រាយមានច្រើន ដែលក្នុងនោះអ្នកក៏អាចសាកទទួលទានអាហារមួយចំនួន ដើម្បីដោះស្រាយបញ្ហានេះ ។ នេះបើតាមការពន្យល់របស់វេជ្ជបណ្ឌិតនង រស្មី ជាគ្រូពេទ្យឯកទេសរោគសើស្បែក នៃកម្មវិធី ទៅពេទ្យ ដែលជាកម្មវិធីពិគ្រោះ និងព្យាបាលជំងឺអនឡាញ ។

វេជ្ជបណ្ឌិត នង រស្មី ឱ្យដឹងទៀតថា ថ្ងៃនេះអ្នកនឹងបានស្គាល់អាហារ ៤ មុខ ដែលអ្នកគួរទទួលទាន ដើម្បីដោះស្រាយបញ្ហាសក់ជ្រុះរបស់អ្នក ។

១. ការ៉ុត ៖ ការ៉ុតសម្បូរទៅដោយសារធាតុ beta-carotene ដែលបំលែងជាវីតាមីន A នៅពេលរំលាយ ។ វាជាការសំខាន់ណាស់ក្នុងការកត់ចំណាំថា គ្មានកោសិកាណាក្នុងរាងកាយអាចដំណើរការមុខងារដោយគ្មានវីតាមីន A ឡើយ ។ កង្វះវីតាមីន A អាចនាំឱ្យស្បែកក្បាលស្ងួតរមាស់ និងឡើងអង្គែ ។ សក់នឹងមានសុខភាពល្អជាងមុន ហើយកាត់បន្ថយការជ្រុះ ដោយសារតែវីតាមីននេះ ។ ជម្រើសនៃបន្លែផ្លែឈើផ្សេងទៀតដែលមានផ្ទុកវីតាមីន A គឺដំឡូងផ្អែម ដំឡូងជ្វា ល្ពៅ និងស្វាយ ។

២. ស៊ុតមាន់-ទា ៖ វាជាប្រភពដ៏ល្អបំផុតនៃជាតិស័ង្កសី ស៊ុលផួរ ជាតិដែក និងសេឡេញ៉ូម ដែលសុទ្ធតែចាំបាច់សម្រាប់សុខភាពស្បែកក្បាល និងការលូតលាស់នៃសក់ ។ កង្វះសារធាតុទាំងប៉ុន្មានមុខដូចបានរៀបរាប់នេះអាចបណ្ដាលឱ្យស្បែកក្បាលស្ងួតរបក និងជ្រុះសក់ ។ ប្រភពផ្សេងទៀតនៃសារធាតុទាំងប៉ុន្មាននេះ រួមមានសាច់គ្មានខ្លាញ់ សាច់មាន់ និងអយស្ទ័រ ។

៣. សាច់ត្រី ៖ សាច់ត្រី ជាប្រភពដ៏ល្អបំផុតមួយនៃប្រូតេអ៊ីន និងអាស៊ីដខ្លាញ់អូមេហ្កា ៣ ដែលល្អណាស់សម្រាប់សុខភាពរាងកាយ និងស្បែកក្បាល សម្រាប់ជំរុញការលូតលាស់សក់ ។ ការទទួលទានត្រីសម្បូរខ្លាញ់ក៏ជួយធ្វើឱ្យសក់មានសំណើមទន់រលោងពីខាងក្នុងមកផងដែរ ។

៤. គ្រាប់ធញ្ញជាតិ ៖ ការទទួលទានគ្រាប់ធញ្ញជាតិ ជាប្រភពដ៏ប្រសើរនៃអាស៊ីដខ្លាញ់សុខភាពល្អអូមេហ្កា ៣ ផងដែរ ។ ដូច្នេះ ដើម្បីជាការប្រសើរចូររួមបញ្ចូលគ្រាប់អាល់ម៉ុន គ្រាប់ស្វាយចន្ទី គ្រាប់ល្ពៅ និងគ្រាប់ផ្កាឈូករ័ត្ន ជាដើមចូលក្នុងរបបអាហារប្រចាំថ្ងៃ ។ វាល្អបំផុតសម្រាប់ការពារសក់ ដោយវាសម្បូរទៅដោយប៊ីយ៉ូទីន និងទង់ដែងដែលចាំបាច់សម្រាប់ទប់ស្កាត់បញ្ហាសក់ជ្រុះ និងការបាត់បង់ពណ៌ធម្មជាតិនៃសក់ ៕

កំណត់សម្គាល់ ៖ អ្នកអាចទាញយកកម្មវិធី Tovpet ដើម្បីពិគ្រោះ និងធ្វើតេស្តជំងឺកូវីដ ១៩ ជាមួយគ្រូពេទ្យជំនាញ ដោយមិនបាច់ទៅកាន់មន្ទីរពេទ្យ តាមរយ: Link ខាងក្រោមនេះដោយឥតគិតថ្លៃ ៖

– App Storehttps://apple.co/3vcDKG1

– Play Store: https://bit.ly/3tJGJpa

– Register here: https://tovpet.com/register

ទៅពេទ្យ (Tovpet) ជាកម្មវិធី ពិនិត្យ និងព្យាបាលជំងឺតាម អនឡាញ ឈានមុខគេនៅក្នុងប្រទេសកម្ពុជា ។