Join with Health.com.kh on Telegram

​រន្ធ​គូថ​គឺជា​ផ្នែក​បើក​ខាងក្រៅ​ដែល​ជា​កន្លែង​លាមក​ចេញពី​រាងកាយ​។ នៅ​ផ្នែក​ខាង​ក្នុង​នៃរ​ន្ធ​គូថ មាន​ក្រពេញ​តូចៗ​ជាច្រើន​។ ប្រសិនបើ​មាន​មួយ​ក្នុងចំណោម​ក្រពេញ​ទាំងនេះ ត្រូវ​បាន​ស្ទះ​ដោយសារ​បញ្ហា​ណាមួយ បញ្ហា​អាប់​សែ​នឹង​ត្រូវបាន​បង្កើតឡើង​។ អាប់​សែ​ក្នុង​រន្ធ​គូថ​បែបនេះ ជាធម្មតា​ត្រូវ​ព្យាបាល​ដោយ​ការ​វះ​បង្ហូរ​យក​ខ្ទុះ​ចេញ ទោះបីជា​ពេល​ខ្លះ វា​អាច​ធ្លាយ​ដោយ​ឯកឯង​ក៏ដោយ​។ ប្រហែលជា ៥០ ភាគរយ​នៃ​ករណីនេះ វា​អាច​វិវត្ត​ទៅ​ជា​បញ្ហា​បូស​អន្ទង់ ដែល​ជា​រន្ធ​មួយ​តូច ត​ភ្ជាប់​ពី​ក្រពេញ​ដែល​បាន​ឆ្លង​មេរោគ​នៅ​ខាង​ក្នុង​រន្ធ​គូ​ថ ទៅ​នឹង​ស្បែក​ខាងក្រៅ​ដែល​នៅ​ជុំវិញ​រន្ធ​គូ​ថ​។  ​បូស​អន្ទង់ ភាគច្រើន​បំផុត​បណ្តាល​មកពី​ការកើត​អាប់​សែ​ក្នុង​រន្ធ​គូ​ថ​។ មួយចំនួន​តូច​មួយ​នៃ​បូស​អន្ទង់​ដែល​កម្រ​ជួប​ញឹកញាប់​ត្រូវ​បាន​បង្កឡើង​ដោយ​បញ្ហា​ផ្សេង​ទៀត​ដូច​ជា​ជំងឺ​Crohn​ជំងឺ​កាមរោគ ការ​ប៉ះ​ទង្កិច​ជំងឺរបេង​ជំងឺមហារីកឬ​ជំងឺ​ប៉ោង​ពោះវៀន​ជាដើម​។​ ​ខាងក្រោម​នេះ​អាច​ជា​រោគសញ្ញា​នៃ​ជំងឺ​បូស​អន្ទង់ ដែល​មាន​ដូចជា ៖

  • ការកើត​អាប់​សែ​ក្នុង​រន្ធ​គូថ​ម្តង​ហើយ​ម្តងទៀត​
  • ​មាន​ការឈឺចាប់​និង​ហើម​នៅ​ជុំវិញ​រន្ធ​គូថ 
  • មាន​ការឈឺចាប់​នៅពេល​បន្ទោបង់​
  • ​មាន​ហូរ​ឈាម​ពី​រន្ធ​គូថ​
  • ​មាន​ហា​ឈាម​ឬ​ខ្ទុះ​មាន​ក្លិនស្អុយ​ពី​រន្ធ​ដែល​មាន​នៅ​ជុំវិញ​រន្ធ​គូ​ថ​។ ហើយ​ការឈឺចាប់​អាច​ថយ​ចុះ​បន្ទាប់​ពី​សារធាតុ​ទាំងនេះ​ហូរ​ចេញ​អស់​។ 
  • ​មាន​ក្រហាយ​ស្បែក​នៅ​ជុំវិញ​រន្ធ​គូថ​ដោយសារតែ​ការហូរ​សារធាតុ​រាវ​រហូត​
  • ​គ្រុនក្តៅ​ញាក់​និង​មាន​អារម្មណ៍​អស់កម្លាំង​។ (​ទោះជា​យ៉ាងណា​ទាំងនេះ​អាច​ជា​រោគសញ្ញា​នៃ​លក្ខខណ្ឌ​ជា​ច្រើន​) 

​អ្នក​គួរតែ​ទៅ​ជួប​គ្រូពេទ្យ​ប្រសិនបើ​អ្នក​សម្គាល់​ឃើញ​មាន​រោគសញ្ញា​ទាំងនេះ​៕