Join with Health.com.kh on Telegram

រាជធានីភ្នំពេញ ៖ សួត គឺជាអ្វីដែលអ្នកត្រូវថែទាំឱ្យបានល្អ នៅក្នុងសម័យកូវីដនេះ ។ រាល់​ការបង្ក​រោគ ឬ​របួស​នៅ​សួត មិន​គ្រាន់តែ​ប៉ះពាល់ដល់​ការដកដង្ហើម​ទេ តែ​ក៏​បង្កើន​ការ​ប្រឈម នឹង​ជំងឺ​ផ្លូវដង្ហើម​ជាច្រើន​ទៀត ដូចជា ៖ ជំងឺ​ហឺត និង​ជំងឺរបេង​ដែរ​ ។ ខាងក្រោម​នេះ គឺជា​អាការមួយចំនួនតូច ដែល​អាច​បញ្ជាក់​ថា សួត​អ្នក​ស្ថិតក្នុង​សភាព​គ្រោះថ្នាក់ និង​ត្រូវការ​ពិគ្រោះ​ជាមួយ​គ្រូពេទ្យ​ ។​

១. មាន​ស្លេស​ច្រើន​ ៖ ការ​ដែល​ក្អកមាន​ស្លេស ឬ​កំហាក តែ​មនុស្ស​ភាគច្រើន​មើលរំលង ​។ យ៉ាងណាមិញ បើសិន​ជា​អ្នក​មាន​អាការបែបនេះ លើស​ពី​បី​ខែ ចូរ​ពិគ្រោះ​ជាមួយ​ពេទ្យ​ទៅ ព្រោះ​វា​អាច​ជា​សញ្ញារបស់​ជំងឺ​រលាក​ទងសួត​រ៉ាំរ៉ៃ​ ។ បើសិន​ជា​រឿង​នេះកើត​ឡើង​ជាមួយ​នឹង​ការដកដង្ហើម លឺសូរ​ដូច​ហួច ឬ​ពិបាក​ដកដង្ហើម​ទៀត​នោះ វា​អាច​ជា​សញ្ញា​របស់ជំងឺ​ស្ទះ​សួត​រ៉ាំរ៉ៃ​វិញ​ ។ ដូច្នេះហើយ បើសិន​ជា​អ្នក​ក្អក​រយៈពេល​យូរ អ្នក​ត្រូវ​តែ​ពិគ្រោះ​ជាមួយ​គ្រូពេទ្យ​ ។

២. ពិបាក​ដកដង្ហើម​ ៖ មិន​​ថា ការឡើង​កាំជណ្តើរ ឬ​ការធ្វើ​ការងារ​ធម្មតា​ទេ បើសិន​ជា​អ្នក​មាន​អារម្មណ៍​ថា ពិបាក​ដកដង្ហើម ក្រោយពី​ធ្វើ​ការងារ​ធម្មតាៗ​ទាំងនេះ វា​អាច​បញ្ជាក់​អំពី បញ្ហា​ណាមួយ​ហើយ​ ។ ជាមួយគ្នានេះដែរ បើសិន​ជា​អ្នក​ពិបាក​ក្នុង​ការ​រត់ ឬ​ពិបាក​ដកដង្ហើម​គ្រប់ពេល​វេលា​ទាំងអស់ សូម្បី​តែ​គេង​ដែរនោះ មានន័យ​ថា អាច​ជា​បញ្ហា​លើ​សួត​ហើយ​ដូចជា ៖ ជំងឺ​រលាក​ទងសួត ជំងឺ​ហឺត ជំងឺ​ស្ទះ​សួត​រ៉ាំរ៉ៃ ឬ​ជំងឺ​ទាក់ទង​នឹង​បេះដូង ​។

៣. ឈាម​ក្នុង​កំហាក​ ៖ សញ្ញា​គន្លឹះ​មួយ​ផ្សេងទៀត ដែល​បញ្ជាក់​អំពី ជំងឺ​សួត​នោះ គឺ​វត្តមាន​របស់​ឈាម​ក្នុង​កំហាក ​។ ខណៈពេល​ដែល​ការប្រែប្រួលពណ៌​របស់​កំហាក​អាច​បង្ហាញ​ច្រើន អំពី​សុខភាព​នោះ វត្តមាន​របស់​ឈាម​ក្នុង​កំហាក អាច​ជា​សញ្ញា​របស់​ជំងឺរបេង​។​

៤. ដកដង្ហើមឈឺ​ទ្រូង​ ៖ បើសិន​ជា​អ្នក​គិតថា ការ​ឈឺទ្រូង តែងតែ​បញ្ជាក់​ពីជំងឺ​គាំងបេះដូង​នោះ អ្នក​ពិតជា​គិត​ខុស​ហើយ​ ។ បើសិន​ជា​អ្នក​មាន​អា​ការឈឺ​ទ្រូង ដូច​មាន​អ្វី​មួយ​ស្រួច​ចាក់​ក្នុង​ទ្រូង នៅពេល​ដកដង្ហើម ក្អក ឬ​កណ្តាស វា​អាច​ដោយសារតែការបង្ក​រោគ​នៅ​សួត ដែល​បង្កឡើង​ដោយ​បាក់តេរី ឬ​វីរុស​ ។ ករណី​ដ៏​កម្រ ​គឺថា វា​អាច​មាន​កំណក​ឈាម ក្នុង​សរសៃឈាម​អាក់ទែ​របស់​សួត ដែល​នាំ​ឲ្យ​ស្ទះ​ដល់​លំហូរ​ឈាម ឬ​ហៅ​ថា Pulmonary Embolism​ ។

៥. ក្អក​រ៉ាំរ៉ៃ​ ៖ សញ្ញា​ដ៏​សំខាន់បំផុតដែល​បញ្ជាក់​ថា​សួត កំពុង​ស្ថិត​ក្នុង​ស​ភាពគ្រោះថ្នាក់ គឺ​ការ​ក្អក​រ៉ាំរ៉ៃ​ ។ ខណៈពេល​ដែល​ការ​ក្អក អាច​បណ្តាលមកពីការបង្ក​រោគ​ដោយ​វីរុស ឬ​ជំងឺ​ផ្តាសាយ វា​គួរតែ​ធូរស្រាល​ទៅវិញ នៅ​រយៈពេល​ពីរ ទៅ​បី​សប្តាហ៍​ក្រោយ ​។ យ៉ាងណាមិញ បើសិន​ជា​បន្ត​រយៈពេល​យូរ​ជាង​នេះ ឬ​រហូត​ដល់ច្រើនជាង ៨ សប្តាហ៍ វា​អាច​ជា​រឿង​ត្រូវ​បារម្ភ​ហើយ ​។ ដូច្នេះ អ្នក​គួរតែ​ទៅ​ជួប​គ្រូពេទ្យ ជំនាញ​ផ្លូវដង្ហើម​ដើម្បី​រក​មើល​មូលហេតុ​របស់​វា​ ។ មូលហេតុ​មួយចំនួននៃ​ការ​ក្អក​រ៉ាំរ៉ៃ អាច​ជា​ការ​រលាក​ទង​សួត ជំងឺ​ហឺត ជំងឺ​រលាក​សួត និង​របេង ​៕

កំណត់សម្គាល់ ៖ អ្នកអាចទាញយកកម្មវិធី Tovpet ដើម្បីពិគ្រោះ និងធ្វើតេស្តជំងឺកូវីដ ១៩ ជាមួយគ្រូពេទ្យជំនាញ ដោយមិនបាច់ទៅកាន់មន្ទីរពេទ្យ តាមរយ: Link ខាងក្រោមនេះដោយឥតគិតថ្លៃ ៖

– App Store: https://apple.co/3vcDKG1

– Play Store: https://bit.ly/3tJGJpa

– Register here: https://tovpet.com/register

ទៅពេទ្យ (Tovpet) ជាកម្មវិធី ពិនិត្យ និងព្យាបាលជំងឺតាម អនឡាញ ឈានមុខគេនៅក្នុងប្រទេសកម្ពុជា ។