Join with Health.com.kh on Telegram

តើ​រោគ​សញ្ញា​អ្វីខ្លះ ដែល​បញ្ជាក់​ថា លោក​អ្នក​កំពុង​មាន​បញ្ហា​លែ​ក​ស៊ី? រមាស់​ស្បែក រលាក​សន្ធាន​ភ្នែក កណ្តាស់ សុទ្ធតែ​ជា​សញ្ញា​បញ្ជាក់​ថា​មាន​បញ្ហា​អា​លែ​ក​ស៊ី​។ រោគ​សញ្ញា​អា​លែ​ក​ស៊ី​ខ្លះ ងាយស្រួល​ក្នុង​ការ​សម្គាល់ តែ​រោគ​សញ្ញា​ខ្លះ ក៏​យើង​ពិបាក​សម្គាល់​ដែរ ដូច​ជា រោគ​សញ្ញា​ឈឺពោះ ក៏​អាច​ជា​រោគ​សញ្ញា​អា​លែ​ក​ស៊ី​ដែរ​។ រោគ​សញ្ញា​អា​លែ​ក​ស៊ី យើង​អាច​សម្គាល់​តាម​រយៈ ៖

ភ្នែក ៖ ភ្នែក​ឡើង​ក្រហម ហូរ​ទឹកភ្នែក មាន​អារម្មណ៍​ថា​ក្តៅ ចាញ់​ពន្លឺ ច្រើន​កើត​លើ​ភ្នែក​ទាំង ២

ច្រមុះ ៖ ហូរ​សំបោរ​ជាប់​ជា​ប្រចាំ តឹង​ច្រមុះ កណ្តាស់ វា​ច្រើន​កើត​ចន្លោះ​មិន​ជាប់​ៗ​គ្នា ពិសេស​ច្រើន​កើត​ពេល​មាន​លំអងផ្កា លំអង​ស្មៅ លំអង​ផ្កាឈើ ឬអ្វី​ដែល​បង្កើត​ជាប់​ៗ​គ្នា​។ វា​ក៏​អាច​កើត​ពេល​មាន​អា​លែ​ក​ហ្សែ​ន នៅ​ក្នុង​បរិយាកាស​ដែរ​ដូច​ជា ៖ ចៃ ផ្សិត រោមសត្វ ...​។
មាត់ ៖ អា​លែ​ក​ស៊ី​នៅ​លើ​មាត់ អាច​សម្គាល់​បាន​ដោយសារ វា​ហើម និង​រមាស់​នៅ​លើ​មាត់​។ វា​ច្រើន​កើត​ដោយសារ​សារធាតុ​មួយ​ឈ្មោះ​ថា ប្រូ​ហ្វី​លី​ន ដែល​ជា​ប្រូតេអ៊ីន​នៅ​លើ​នំប៉័ង ផ្លែ​ប៉ោម  ផ្លែ​ព័រ ...​។ មុ​យ​កឺ​មាត់ ផ្លូវ​រំលាយ​អាហារ ច្រើន​កើត​ពី​ចំណីអាហារ​របស់​ទារក ដែល​សារធាតុ​នេះ​ច្រើន​កើត​មាន​ក្នុង​ប្រូតេអ៊ីន​ទឹកដោះគោ ស៊ុត ត្រី សណ្តែកដី ...​។

មុខ ៖ វា​ច្រើន​លេច​ចេញ​រោគ​សញ្ញា​ដូច​ជា​រមាស់ ហើម​ហើយ​រាលដាល​យ៉ាង​លឿន នៅ​លើ​ស្បែក និង​មុ​យ​កឺ​។ បញ្ហា​នេះ គឺ​ធ្ងន់ធ្ងរ ប្រសិនបើ​វា​ហើម នៅ​លើ​សន្ទះ​បំពង់ខ្យល់ ដែល​ធ្វើ​ឲ្យ​ស្ទះ ដល់​ខ្យល់​ដកដង្ហើម ដែល​អាច​ឈាន​ដល់​គាំងបេះដូង​ស្លាប់​។

បំពង់ក ៖ វា​ធ្វើ​ឲ្យ​ហើម​នៅ​បំពង់ក វា​អាច​ជា​អ្នកមាន​បញ្ហា​អា​លែ​ក​ស៊ី​ផ្លូវដង្ហើម​។
ត្រចៀក ៖ វា​ធ្វើ​ឲ្យ​រលាក ឬ​ហ៊ឹង​ត្រចៀក​។
ទងសួត ៖ ធ្វើ​ឲ្យ​ពិបាក​ដកដង្ហើម ហឺត ខ្យល់​រាំងស្ទះ​នៅ​ក្នុង​សួត​។ ដកដង្ហើម​ឮ​សំឡេង​ដូច​គេ​ហួច វា​ច្រើន​កើត​ចំពោះ​ក្មេង​តូច​។ វា​ក៏​អាច​ធ្វើ​ឲ្យ​មាន​ក្អក ដែល​មាន​ស្លេស្ម​ដែរ​។
ពោះ ៖ ឈឺពោះ ដែល​ច្រើន​តែ​អា​លែ​ក​ស៊ី ជាមួយ​ចំណីអាហារ ពិសេស ក្មេង​ដែល​ច្រើន​តែ​អា​លែ​ក​ស៊ី​ជាមួយ​ទឹកដោះគោ​។ មាន​រាក ដែល​ច្រើន​តែ​អា​លែ​ក​ស៊ី ជាមួយ​គ្រាប់​ធញ្ញជាតិ ស្រូវ​សាឡី​។ ទល់លាមក ក៏​អាច​ជា​បញ្ហា​អា​លែ​ក​ស៊ី​ដែរ ហើយ​វា​ច្រើន​កើត​នៅ​លើ ក្មេង​មាន​បញ្ហា​ជាមួយ​ទឹកដោះគោ​។
ស្បែក ៖ ស្បែក​ឡើង​ក្រហម រមាស់ ឬ​ហើម ស្បែក​ឡើង​ស្ងួត ...​។

ដើម្បី​ចៀសវាង​បញ្ហា​អា​លែ​ក​ស៊ី ដែល​កើត​មាន​ឡើង យើង​ត្រូវ​ចៀសវាង​រាល់​អា​លែ​ក​ហ្សែ​ន​ទាំងឡាយ ដែល​ធ្វើ​ឲ្យ​យើង​មាន​បញ្ហា​អា​លែ​ក​ស៊ី​។ ប្រសិនបើ​មាន​បញ្ហា​អា​លែ​ក​ស៊ី ដែល​កើត​មាន​ឡើង យើង​ក៏​អាច​ព្យាបាល​ដោយ​ប្រើ​ឱសថ ដែល​បំបាត់​អា​លែ​ក​ស៊ី​ដែរ​។ ឱសថ​ទាំងនេះ គឺ​អាច​រក​ទិញ​បាន តាម​ឱសថស្ថាន​ស្របច្បាប់ ដែល​អាច​ផ្តល់​ការពិគ្រោះ​ដ៏​សម​ស្រប ក៏​ដូច​ជា​យើង​អាច​ទទួល​បាន​ឱសថ ដែល​មានគុណ​ភាព និង​ប្រសិទ្ធភាព​ផង​ដែរ​។