ជំងឺរលាកខ្នែងពោះវៀន គឺជាការហើម និងមានការបង្ករោគ ទៅលើខ្នែងពោះវៀន ដែលកើតឡើងដោយសារមានលាមក និងរបស់ក្រៅពីក្នុងខ្លួន កក់កុញក្នុងខ្នែងនោះច្រើន។ ផ្ទុយទៅវិញ ខ្មែរយើងច្រើនតែយល់ថា ជំងឺនេះហៅថា ពោះវៀនដុះខ្នែងទៅវិញ ប៉ុន្តែ ខ្នែងពោះវៀននេះ គឺមានគ្រប់គ្នាទាំងអស់មិនថា ក្មេង ឬចាស់ ប្រុស ឬស្រីឡើយ។ បើសិនជាជំងឺនេះ មិនបានព្យាបាលទាន់ពេលវេលាទេ ខ្នែងពោះវៀនអាចនឹងបែក និងធ្លាយខ្ទុះ ទៅជុំវិញតំបន់នោះ ហើយវានឹងប៉ះពាល់ ដល់អាយុជីវិតរបស់អ្នកជំងឺបាន។ ដូច្នេះ អ្នកត្រូវតែយល់ដឹងឲ្យបានច្រើន ចំពោះ អាការៈ ឬរោគសញ្ញា របស់ជំងឺរលាកខ្នែងពោះវៀននេះ ដើម្បីអ្នកអាចជួយខ្លួនឯងបាន។
ឈឺពោះ
វាគឺជាសញ្ញាដំបូងគេមួយ របស់ជំងឺរលាកខ្នែងពោះវៀន។ ការឈឺចាប់នេះ មានលក្ខណៈដូចគេចាក់ និងឈឺនៅម្តុំកណ្តៀតក្អមខាងស្តាំ។ ការឈឺចាប់នេះ ច្រើនតែកើតឡើងដំបូង ចេញពីជុំវិញផ្ចិត និងកាន់តែធ្ងន់ធ្ងរទៅៗ ក្នុងរយៈពេល ៦ ទៅ ២៤ ម៉ោងក្រោយ។
ហើមពោះ
ការហើមពោះតែងកើតឡើង ជាមួយនឹងការឈឺពោះ បែបដូចគេចាក់ ដែលភាគច្រើន ជាសញ្ញារបស់ជំងឺរលាកខ្នែងពោះវៀននេះតែម្តង។
ក្អួត
រោគសញ្ញារបស់ជំងឺរលាកខ្នែងពោះវៀននេះ គឺស្រដៀងគ្នានឹងការឈឺក្រពះដែរ។ យ៉ាងណាមិញ នៅពេលការក្អួតកើតឡើង ជាមួយនឹងការឈឺពោះ នៅតំបន់កណ្តៀតក្អម ហើយមិនបាត់ទៅវិញទេនោះ វាអាចបញ្ជាក់ថា ជាការរលាកខ្នែងពោះវៀនហើយ។
ចង្អោរ
ការចង្អោរ គឺជាសញ្ញាមួយរបស់ជំងឺជាច្រើន ហើយអាចងាយនឹងច្រឡំ ចំពោះជំងឺផ្សេងៗដែរ។ ប៉ុន្តែ បើសិនជាវាកើតឡើង ជាមួយគ្នានឹងការក្អួត និងឈឺពោះ ហើយបើសិនជាមិនស្រួលបួលវិញនោះទេ វាអាចជាសញ្ញា របស់ជំងឺរលាកខ្នែងពោះវៀនហើយ។
មិនឃ្លានអាហារ
មិនប្រាកដ ១០០ ភាគរយទេ ប៉ុន្តែ ការមិនឃ្លានអាហារនេះ ក៏ជាសញ្ញាដ៏ញឹកញាប់មួយ របស់ជំងឺរលាកខ្នែងពោះវៀនដែរ។
ប្រែប្រួលការបន្ទោរបង់
ចាប់តាំងពីជំងឺរលាកខ្នែងពោះវៀន ស្រដៀងគ្នានឹងការឈឺក្រពះមក អ្នកប្រហែលជាមានអាការៈទាំងទល់លាមកផង និងរាកផងហើយ។ យ៉ាងណាមិញ អ្នកត្រូវតែពិគ្រោះ ជាមួយគ្រូពេទ្យភ្លាមៗ នៅពេលអាការៈទាំងនេះ កើតឡើងជាមួយនឹងរោគសញ្ញា ដែលបានរៀបរាប់ខាងលើ។
ឈឺពោះបែបរមួល
ការឈឺពោះបែបរមួល ក៏ជាសញ្ញាមួយរបស់ជំងឺរលាកខ្នែងពោះវៀនដែរ នៅពេលវាកើតឡើងជាមួយ នឹងសញ្ញាខាងលើ។ ទោះបីជាយ៉ាងណាក៏ដោយ សញ្ញាទាំងនេះ ច្រើនតែកើតឡើង ក្រោយពីការឈឺពោះ និងមិត្រូវរង់ចាំ រហូតដល់មានអាការៈ ទាំងអស់ខាងលើឡើយ។ ចូរចាំថា ការឈឺចាប់កាន់តែខ្លាំងឡើងៗ ទៅតាមពេលវេលា ហើយខ្នែងពោះវៀន អាចនឹងបែកបានគ្រប់ពេលទាំងអស់៕