ជាការពិតណាស់ អ្នកមិនអាចសុទ្ធតែការពារខ្លួនអ្នកពីជម្ងឺទឹកនោមផ្អែមប្រភេទទី២បានទេ ព្រោះថាមូលហេតុជម្ងឺទឹកនោមផ្អែមខ្លះមកពីកត្តាពូជ ឬ សេនេទិក កត្តាពូជសាសន៍ ឬ អាយុ។
ទោះជាយ៉ាងណាក៏ដោយការផ្លាស់ប្តូររបៀបរស់នៅមួយចំនួន អាចជួយពន្យាពេលឬអាចការពារការចាប់ផ្តើមនៃជម្ងឺទឹកនោមផ្អែមប្រភេទទី២បាន ដែលរួមមានដូចការរៀបរាប់ខាងក្រោម បើយោងតាមការចុះផ្សាយរបស់គេហទំព័រវេជ្ជសាស្រ្ត Health Line។
១. របបអាហារ
របបអាហាររបស់អ្នកគួរតែកាត់បន្ថយជាតិស្ករនិងកាបូអ៊ីដ្រាតចម្រាញ់ចេញពីរោងចក្រ ហើយជំនួសវាដោយគ្រាប់ធញ្ញជាតិ កាបូអ៊ីដ្រាតធម្មជាតិ និងជាតិសរសៃ។ ជាមួយគ្នានេះដែរ ការទទួលសាច់សុទ្ធគ្មានខ្លាញ់ និង ត្រី ជួយផ្តល់ប្រូតេអ៊ីនដល់រាងកាយ។ អ្នកក៏ត្រូវការអាស៊ីតខ្លាញ់អូមេហ្គា៣ ដែលផ្តល់សុខភាពដល់បេះដូង។ វាមិនត្រឹមតែអ្វីដែលអ្នកញ៉ាំប៉ុណ្ណោះទេ ដែលអាចជួយបាន ប៉ុន្តែអ្នកត្រូវគិតគូរពីបរិមាណនៃការញ៉ាំរបស់អ្នកផងដែរ។
២. ធ្វើលំហាត់ប្រាណ
ជម្ងឺទឹកនោមផ្អែមប្រភេទទី២ ត្រូវបានផ្សារភ្ជាប់ជាមួយនឹងភាពអសកម្ម។ ការហាត់ប្រាណ ៣០នាទីជារៀងរាល់ថ្ងៃ អាចជួយឱ្យសុខភាពទូទៅរបស់អ្នកមានភាពប្រសើរឡើង។
៣. ការគ្រប់គ្រងទម្ងន់
អ្នកទំនងជាវិវត្តទៅជាជម្ងឺទឹកនោមផ្អែមប្រភេទ២ ប្រសិនបើអ្នកលើសទម្ងន់។ ការបរិភោគរបបអាហារដែលមានសុខភាពល្អនិងមានតុល្យភាព និងធ្វើលំហាត់ប្រាណប្រចាំថ្ងៃអាចជួយឱ្យអ្នករក្សាទម្ងន់បាន។ ប្រសិនបើការផ្លាស់ប្តូរទាំងនោះមិនដំណើរការ គ្រូពេទ្យអាចផ្តល់អនុសាសន៍មួយចំនួនសម្រាប់ការសម្រកទម្ងន់ដោយសុវត្ថិភាព៕