នៅពេលដែលមើលថែរក្សាកូន អ្នកត្រូវតែចេះសង្កេតមើលពីសកម្មភាពរបស់កូនមួយចំនួន ព្រោះមានពេលខ្លះគឺគេត្រូវការអ្នកអោប និងពរគេខ្លាំងណាស់ បើអ្នកមិនធ្វើ វាអាចប៉ះពាល់ដល់អារម្មណ៍របស់គេបាន។ ដូចនេះតើមានពេលណាខ្លះទៅ?
ពេលទើបនឹងកើត
នៅពេលដែលកូនទើបនឹងកើតចេញមកក្នុងរយៈពេលមួយម៉ោង អ្នកគួរតែពរកូន ដើម្បីឲ្យរាងកាយរបស់គេបានប៉ះជាមួយអ្នក នោះកូននឹងមិនយំរករឿងច្រើនឡើយ ហើយអាចគេងលក់ស្រួលទៀតផង ម្យ៉ាងទៀតវាក៏អាចជួយបង្កើនប្រាជ្ញារបស់កូនដែរ។
នៅពេលយំ
នៅពេលដែលកូនរាងធំ ហើយគេយំ គេប្រហែលជាជួបរឿងមួយចំនួនដែលប៉ះពាល់ដល់ផ្លូវចិត្តគេហើយ ដូចនេះអ្នកគួរតែសួរកូនឲ្យច្បាស់ ហើយប្រសិនជាត្រូវអ្នកដទៃធ្វើបាប អ្នកគួរតែអោបគេដើម្បីឲ្យគេមានអារម្មណ៍សុវត្ថិភាព។
ទើបក្រោកពីគេង
នៅពេលដែលកូនទើបតែក្រោកពីគេង អ្នកអាចពរគេដើរមើលរបស់ដែលនៅជុំវិញខ្លួនបាន ព្រោះក្រោយពេលដែលគេទើបតែក្រោកពីគេង គេអាចមានអារម្មណ៍ប្លែកនឹងរបស់ដែលនៅជុំវិញខ្លួន និងបរិស្ថាន។
ពេលភ័យ
នៅពេលដែលកូនភ័យ ឬទើបនឹងដួល អ្នកគួរតែអោបគេឲ្យលឿន ដើម្បីផ្តល់អារម្មណ៍សុវត្ថិភាពដល់កូន ម្យ៉ាងទៀតវាក៏អាចជួយធ្វើឲ្យកូនឆាប់បំភ្លេចរឿងដែលទើបនឹងកើតឡើងដែរ ផ្ទុយទៅវិញ បើអ្នកមិនអោបកូន នោះគេនឹងប្រឈមមុខនឹងរឿងទាំងនោះដោយខ្លួនឯង យូរទៅនឹងអាចធ្វើឲ្យគេមានបញ្ហាផ្លូវចិត្តបាន។
ជួបមនុស្សចម្លែក
កូនក្មេងដែលមានអាយុចាប់ពី៦ខែឡើងទៅនឹងចាប់ផ្តើមខ្លាចមនុស្ស និងបរិស្ថានចម្លែកហើយ ដូចនេះនៅពេលដែលមានមនុស្សចម្លែកមកលេងផ្ទះ អ្នកគួរតែអោបគេប្រសិនជាគេខ្លាច ហើយយំ ៕
តើពេលណាដែលកូនត្រូវការការអោបពីអ្នក?
