របបអាហារអាចជះឥទ្ធិពលគួរឱ្យកត់សម្គាល់លើសុខភាពស្បូន។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើអាហារបែបណាទើបល្អសម្រាប់ឱ្យស្បូនមានសុខភាពល្អ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលគួររួមបញ្ចូលក្នុងរបបអាហារប្រចាំថ្ងៃដើម្បីរក្សាសុខភាពស្បូន ៖
១. ក្រូចឆ្មារ
ក្រៅពីជួយពង្រឹងប្រព័ន្ធភាពស៊ាំរាងកាយហើយនោះ វីតាមីន C ខ្ពស់ក្នុងក្រូចឆ្មារក៏ល្អសម្រាប់ពង្រឹងសុខភាពស្បូនផងដែរ។ ការទទួលទានទឹកក្ដៅឧណ្ហៗ ១កែវលាយជាមួយទឹកក្រូចឆ្មារស្រស់រាល់ព្រឹកអាចជួយធ្វើឱ្យសុខភាពស្បូនមានលក្ខណៈប្រសើរឡើងជាលំដាប់។
២. គ្រាប់ធញ្ញជាតិនិងគ្រាប់ពូជ
រាងកាយត្រូវការគ្រាប់ធញ្ញជាតិនិងគ្រាប់ពូជជាចាំបាច់ដើម្បីរក្សាការផលិតអ័រម៉ូន។ ការទទួលទានគ្រាប់ពូជនិងគ្រាប់ធញ្ញជាតិដូចជាគ្រាប់អាល់ម៉ុន គ្រាប់ស្វាយចន្ទី គ្រាប់ផ្ការីករាយ គ្រាប់ល្ពៅ គ្រាប់ឪឡឹក គ្រាប់ជី និងគ្រាប់ផ្កាឈូករ័ត្ន គឺមានផ្ទុកសម្បូរទៅដោយអាស៊ីតខ្លាញ់អូមេហ្កា ៣ និងកូឡេស្តេរ៉ូលល្អដែលជួយក្នុងការកម្ចាត់ដុំសាច់ និងទប់ស្កាត់ជំងឺមហារីកមាត់ស្បូន។
៣. អាហារសម្បូរជាតិសសៃ
ការទទួលទានរបបអាហារសម្បូរជាតិសសៃអាចជួយកម្ចាត់កាកសំណល់និងជាតិពុលពីក្នុងរាងកាយគួរឱ្យកត់សម្គាល់។ របបអាហារមានជាតិសសៃខ្ពស់អាចជួយកម្ចាត់កម្រិតនៃអ័រម៉ូន estrogen ដែលលើសក្នុងរាងកាយទប់ស្កាត់បញ្ហាដុំសាច់ក្នុងស្បូន។ នៅពេលញ៊ាំអាហារសម្បូរជាតិសសៃ អ្នកក៏ចាំបាច់ត្រូវទទួលទានទឹកឱ្យបានច្រើនគ្រប់គ្រាន់ផងដែរ។
៤. អាហារមានផ្ទុកសម្បូរទៅដោយវីតាមីន C
វីតាមីន C មានលក្ខណៈសម្បត្តិប្រឆាំងអុកស៊ីតកម្មដែលជួយទប់ស្កាត់ការវិវត្តនៃកោសិកាមហារីក។ ការទទួលទានបន្លែផ្លែឈើមានផ្ទុកសម្បូរទៅដោយវីតាមីន C ក៏ជួយពង្រឹងប្រព័ន្ធភាពស៊ាំរាងកាយផងដែរ។ ខណៈដែលប្រព័ន្ធភាពស៊ាំរាងកាយចុះខ្សោយជាកត្តាចម្បងមួយបង្កើនហានិភ័យនៃជំងឺមហារីកមាត់ស្បូន។
៥. បន្លែ
ជាប្រភពដ៏ល្អបំផុតមួយនៃកាល់ស្យូម ប៉ូតាស្យូម ម៉ាញ៉េស្យូម និងវីតាមីន។ ការទទួលទានរបបអាហារសម្បូរទៅដោយបន្លែអាចជួយរក្សាសុខភាពស្បូនបានយ៉ាងប្រសើរ។ បន្លែក៏ជួយពន្យឺតដំណើរការនៃការលូតលាស់ដុំសាច់ក្នុងស្បូនផងដែរ។ ទោះជាយ៉ាងណាគួរព្យាយាមជ្រើសរើសទទួលទានបន្លែដែលមានផ្ទុកសារធាតុ phytoestrogens ខណៈដែលវាមានសមត្ថភាំពគ្រប់គ្រងកម្រិតនៃអ័រម៉ូន estrogen ក្នុងរាងកាយ។
៦. ផ្លែឈើ
ជាពិសេសប្រភេទនៃផ្លែឈើដែលមានផ្ទុកសម្បូរទៅដោយវីតាមីន C និងសារធាតុ bioflavonoids អាចជួយបង្អាក់ការលូតលាស់ដុំសាច់ក្នុងស្បូន។ វាថែមទាំងអាចគ្រប់គ្រងកម្រិតនៃអ័រម៉ូន estrogen ផងដែរ។ ដូច្នេះត្រូវប្រាកដថាអ្នកបានទទួលទានផ្លែឈើគ្រប់គ្រាន់រាល់ថ្ងៃ។ សារធាតុ Bioflavonoids ក៏ជួយទប់ស្កាត់ហានិភ័យនៃជំងឺមហារីកស្បូនគួរឱ្យកត់សម្គាល់។
៧. ផលិតផលអាហារផ្សំឡើងពីទឹកដោះគោ
ដូចជាយ៉ាអួរ ឈីស ទឹកដោះគោ និងបឺរទឹកដោះគោជាដើម គឺចាំបាច់ណាស់សម្រាប់រក្សាសុខភាពស្បូនល្អប្រសើរ។ ផលិតផលអាហារផ្សំឡើងពីទឹកដោះគោទាំងនេះ គឺមានផ្ទុកសម្បូរទៅដោយជាតិកាល់ស្យូម និងវីតាមីន D ខណៈដែលកាល់ស្យូមជួយពង្រឹងភាពរឹងមាំនៃឆ្អឹង វីតាមីន D ដើរតួនាទីសំខាន់ក្នុងរាងកាយទប់ស្កាត់ដុំសាច់ក្នុងស្បូន។ អ្នកក៏ត្រូវការវីតាមីន D ដើម្បីជាជំនួយដល់ការស្រូបយកជាតិកាល់ស្យូមផងដែរ។
៨. តែបៃតង
ជាប្រភពដ៏ប្រសើរនៃសារធាតុប្រឆាំងអុកស៊ីតកម្មច្រើនប្រភេទជួយប្រយុទ្ធប្រឆាំងកោសិកាមហារីក។ តែបៃតងក៏មានសមត្ថភាពប្រឆាំងការរលាកក្នុងរាងកាយដែលជាអ្វីមួយផ្សារភ្ជាប់នឹងហានិភ័យនៃជំងឺជាច្រើនរួមទាំងមហារីក។
៩. ត្រីសម្បូរខ្លាញ់
ដូចជាត្រីសាលម៉ុនជាដើម គឺមានផ្ទុកសម្បូរទៅដោយអាស៊ីតខ្លាញ់អូមេហ្កា ៣ ដែលជួយកាត់បន្ថយការផលិតអ័រម៉ូន prostaglandin ក្នុងរាងកាយនារី។ អ័រម៉ូននេះគ្រប់គ្រងការកន្ត្រាក់នៃស្បូន ប្រសិនបើកន្ត្រាក់ធ្ងន់ធ្ងរអាចបណ្ដាលឱ្យស្បូនខូចបាន៕