រាជធានីភ្នំពេញ ៖ យើងគ្រប់គ្នាសុទ្ធតែដឹងហើយថា «ទឹក» គឺពិតជាសំខាន់សម្រាប់ជីវិត ជាពិសេសសំខាន់សម្រាប់ការលូតលាស់របស់ក្មេងតូចៗ ។ នេះបើតាមការពន្យល់របស់វេជ្ជបណ្ឌិត ញ៉ែម ច័ន្ទវលក្ខណ៍ ដែលជាគ្រូពេទ្យជំនាញឯកទេសកុមារ នៃកម្មវិធី Tovpet (ទៅពេទ្យ) ដែលជាកម្មវិធីពិគ្រោះ និងព្យាបាលជំងឺអនឡាញ ។
តើទឹកទាំងអស់ ឬក៏ភេសជ្ជៈមួយចំនួនសុទ្ធតែល្អសម្រាប់កុមារមែនទេ ? ខាងក្រោមនេះ ជាការពន្យល់បន្ថែមរបស់វេជ្ជបណ្ឌិត ញ៉ែម ច័ន្ទវលក្ខណ៍ អំពីភេសជ្ជៈមួយចំនួនដែលកុមារគួរតែចៀសវាង ឬ មិនគួរទទួលទានញឹកញាប់ ៖
១. ទឹកក្រូច សូដា និងភេសជ្ជៈមានជាតិផ្អែម
ភេសជ្ជៈប្រភេទនេះមានរាប់បញ្ចូលទាំងភេសជ្ជៈប៉ូវកម្លាំង ទឹកដោះគោផ្អែម និងទឹកតែបៃតងផ្អែមៗ ។ សម្រាប់ជាឯកសារយោង សមាគមបេះដូងអាមេរិក (AHA) បានណែនាំថា ក្មេងអាយុចន្លោះពី ២ ឆ្នាំ ទៅ ៨ ឆ្នាំ អាចទទួលទានជាតិស្ករបានក្រោម ២៥ ក្រាម ក្នុងមួយថ្ងៃ ។ សម្រាប់ភេសជ្ជៈដែលបានរៀបរាប់ខាងលើ គឺភាគច្រើនមានជាតិស្ករលើសពីនេះ ។
ភេសជ្ជៈដែលមានជាតិផ្អែម ត្រូវបានផ្សារភ្ជាប់ទៅនឹងការកើនឡើងហានិភ័យនៃជំងឺដូចជា ជំងឺទឹកនោមផ្អែមប្រភេទទី ២ និងជំងឺខ្លាញ់ក្នុងថ្លើមចំពោះកុមារ ។ ម៉្យាងទៀតវាអាចធ្វើឱ្យក្មេងលើសទម្ងន់ និងបង្កជាជំងឺពុកធ្មេញ ។
២. ទឹកផ្លែឈើ
ទោះបីជាទឹកផ្លែឈើ ១០០% ផ្តល់នូវវីតាមីន និងសារធាតុរ៉ែសំខាន់ៗក៏ដោយ ការទទួល ទានគួរតែត្រូវបានកំណត់ចំពោះបរិមាណដែលបានណែនាំសម្រាប់កុមារ ។ បណ្ឌិត្យសភារោគកុមារអាមេរិក (AAP) បានណែនាំថា ក្មេងអាយុចន្លោះពី ១ ឆ្នាំ ទៅ ៦ ឆ្នាំ អាចផឹកទឹកផ្លែឈើចន្លោះពី ១២០ ទៅ ១៨០ មិល្លីលីត្រប៉ុណ្ណោះ ខណៈដែលក្មេងអាយុចន្លោះពី ៧ ឆ្នាំ ទៅ ១៨ ឆ្នាំ អាចផឹកបានពី ២៣៦ ទៅ ៣៥៥ មិល្លីលីត្រ ។ ការទទួលទានលើសពីនេះ អាចបង្កទៅជាជំងឺធាត់ ។
៣. ភេសជ្ជៈមានជាតិកាហ្វេអ៊ីន
ក្មេងតូចៗ ដែលផឹកភេសជ្ជមានជាតិកាហ្វេអ៊ីនច្រើន ដូចជាទឹកក្រូចសូដា កាហ្វេ និងភេសជ្ជៈប៉ូវកម្លាំង អាចជះឥទ្ធិពលអាក្រក់ដល់សុខភាព ។ ជាតិកាហ្វេអ៊ីនអាចបណ្តាលឱ្យវិលមុខ ចង្វាក់បេះដូងលោតឡើងខ្ពស់ សម្ពាធឈាមកើន ថប់បារម្ភ និងរំខានដល់ដំណេកចំពោះកុមារ ។ AAP បានកំណត់ថា កុមារអាយុក្រោម ១២ ឆ្នាំ ត្រូវចៀសវាងពីភេសជ្ជៈទាំងនេះ ។
សូមបញ្ជាក់ផងដែរថា មិនមែនឱ្យតែជាតិទឹកអាចទទួលទានបានទាំងអស់នោះទេ ។ កុមារគួរតែផឹកទឹកស្អាតឱ្យបានច្រើន គឺផឹកទឹកឆ្អិនឱ្យបាន ៨ កែវក្នុងមួយថ្ងៃ ដើម្បីចៀសវាងពីការខ្វះជាតិទឹក ដែលធ្វើឱ្យប៉ះពាល់ដល់ការលូតលាស់របស់កុមារ ៕
កំណត់សម្គាល់ ៖ អ្នកអាចទាញយកកម្មវិធី Tovpet ដើម្បីពិគ្រោះ និងធ្វើតេស្តជំងឺកូវីដ ១៩ ជាមួយគ្រូពេទ្យជំនាញ ដោយមិនបាច់ទៅកាន់មន្ទីរពេទ្យ តាមរយ: Link ខាងក្រោមនេះដោយឥតគិតថ្លៃ ៖
– App Store: https://apple.co/3vcDKG1
– Play Store: https://bit.ly/3tJGJpa
– Register here: https://tovpet.com/register
ទៅពេទ្យ (Tovpet) ជាកម្មវិធី ពិនិត្យ និងព្យាបាលជំងឺតាម អនឡាញ ឈានមុខគេនៅក្នុងប្រទេសកម្ពុជា ។