ភាគច្រើននៃពួកយើងប្រហែលជាមិនធ្លាប់ដឹងទេថាក្រៅពីមានរសជាតិផ្អែមឆ្ងាញ់ហើយនោះ គូលេនក៏ល្អសម្រាប់ថែរក្សាសម្រស់ផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ត្រូវយកមកធ្វើបែបណាខ្លះទៅ? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗប្រើប្រាស់ផ្លែគូលេនរក្សាសម្រស់ ៖
១. ទប់ស្កាត់សញ្ញានៃភាពចាស់តាមវ័យ
អ្វីដែលអ្នកត្រូវធ្វើ គឺគ្រាន់តែកិនលាយសាច់គូលេន (បកសំបក និងយកគ្រាប់ចេញរួច) ពី ៤ ទៅ ៥ផ្លែជាមួយចេកទុំ ១ផ្លែឱ្យម៉ដ្ឋចូលគ្នា។ បន្ទាប់មកសឹមលាបម៉ាស្សាល្បាយថ្នមៗលើស្បែកមុខនិងក។ រងចាំសម្រាប់រយៈពេល ១៥នាទី សឹមលាងសម្អាតចេញជាមួយទឹកត្រជាក់។
២. កម្ចាត់ស្នាមជាំលើស្បែកមុខ
អ្វីដែលអ្នកត្រូវធ្វើ គឺគ្រាន់តែកិនសាច់គូលេនពី ៤ ទៅ ៥ផ្លែឱ្យម៉ដ្ឋ បន្ទាប់មកសឹមប្រើប្រាស់ដុំសំឡីជ្រលក់ក្នុងល្បាយ រួចលាបលើស្បែកមុខ ឬតំបន់ស្បែកដែលទទួលរងផលប៉ះពាល់។ រងចាំសម្រាប់រយៈពេល ១៥នាទី សឹមប្រើប្រាស់ក្រណាត់ស្អាតជ្រលក់ក្នុងទឹកត្រជាក់ជូតសម្អាតចេញ។
៣. កាត់បន្ថយការរលាកដោយសារកម្ដៅថ្ងៃ
អ្វីដែលអ្នកត្រូវធ្វើ គឺគ្រាន់តែកិនច្របាច់សាច់គូលេនពី ៣ ទៅ ៤ផ្លែយកទឹកស្រស់ៗមកលាយជាមួយប្រេងវីតាមីន E ១គ្រាប់។ កូរឱ្យសព្វ សឹមលាបល្បាយលើតំបន់ស្បែកដែលទទួលរងផលប៉ះពាល។ រងចាំសម្រាប់រយៈពេល ៣០នាទី សឹមលាងសម្អាតចេញជាមួយទឹកត្រជាក់។
៤. ជម្រុញការលូតលាស់នៃសក់
អ្វីដែលអ្នកត្រូវធ្វើ គឺគ្រាន់តែកិនច្របាច់សាច់ផ្លែគូលេនពី ៧ ទៅ ៨ផ្លែយកទឹកស្រស់ៗលាយជាមួយជែលប្រទាលកន្ទុយក្រពើស្រស់ ២ស្លាបព្រាបាយ។ កូរឱ្យសព្វ សឹមលាបម៉ាស្សាល្បាយលើស្បែកក្បាល។ រងចាំសម្រាប់រយៈពេលប្រហែល ៦០នាទី សឹមលាងសម្អាតចេញជាមួយសាប៊ូកម្រិតស្រាល។
៥. សក់ស្រស់ស្អាតភ្លឺរលោង
អ្វីដែលអ្នកត្រូវធ្វើ គឺគ្រាន់តែប្រើប្រាស់សាច់គូលេនជាក្រែមបន្ទន់សក់ ដោយកិនសាច់ផ្លែគូលេនពី ៨ ទៅ ១០គ្រាប់ឱ្យម៉ដ្ឋ រួចលាបលើសក់។ រងចាំសម្រាប់រយៈពេល ១៥នាទី សឹមលាងសម្អាតចេញជាការស្រេច៕