ការសិក្សាថ្មីមួយរកឃើញថា យុវវ័យដែលញ៉ាំជាតិអាហារនិងភេសជ្ជៈដែលមានជាតិស្ករច្រើនពេកមានហានិភ័យជំងឺសរសៃឈាមបេះដូងនិងទឹកនោមផ្អែមក្នុងឈាមរបស់ពួកគេ។
ជាតិស្ករ fructose មាននៅក្នុងផ្លែឈើ ហើយទម្រង់មួយនៃជាតិស្ករ (ទឹកស្ករធ្វើពីពោតដែលមានជាតិ fructose ខ្ពស់) ត្រូវបានគេប្រើយ៉ាងច្រើនក្នុងអាហារកញ្ចប់និងភេសជ្ជៈកំប៉ុង។ ក្រុមអ្នកស្រាវជ្រាវរបស់សាកលវិទ្យាល័យវេជ្ជសាស្ត្រ Georgia បានឱ្យដឹងថា រាង្គកាយដែលកំពុងលូតលាស់របស់ក្មេងជំទង់ទាមទារអាហារដែលមានរសជាតិផ្អែមខ្លាំង ហើយការផ្សព្វផ្សាយពាណិជ្ជកម្មរបស់ក្រុមហ៊ុនអាហារនិងភេសជ្ជៈច្រើនតែធ្វើឡើងតម្រង់ទៅរកយុវវ័យក្មេងៗទាំងនោះ។
ការសិក្សារបស់ពួកគេបានសិក្សាលើយុវវ័យជំទង់ចំនួន ៥៥៩នាក់ ដែលមានអាយុពី ១៤ ទៅ ១៨ឆ្នាំ បានរកឃើញថា របបអាហារដែលមានជាតិស្ករ fructose ខ្ពស់មានទាក់ទងទៅនឹងជំងឺលើសឈាម, ការកម្រិតទាក់ទងនឹងជំងឺទឹកនោមផ្អែមដូចជា ជាតិស្ករក្នុងឈាម (គ្លុយកូស) ខ្ពស់ និងការប្រឆាំងនឹងអាំងស៊ុយលីន, និងកត្តារលាកដែលបង្ករឱ្យមានជំងឺបេះដូងនិងសរសៃឈាម។
យុវវ័យដែលបរិភោគជាតិស្ករ fructose ច្រើន ក៏មានកម្រិតនៃសារធាតុការពារសរសៃឈាមបេះដូងទាប ដូចជា កូលេស្តេរ៉ូលល្អ (HDL) និងប្រូតេអ៊ីន adiponectin។
ទំនាក់ទំនងរវាងការញ៉ាំជាតិស្ករ fructose ច្រើន និងកត្តាហានិភ័យនៃសរសៃឈាមបេះដូងមានកាន់តែច្រើនចំពោះកុមារដែលមានខ្លាញ់ក្បាលពោះច្រើន ដែលជាកត្តាគ្រោះថ្នាក់មួយទៀតនៃជំងឺសរសៃឈាមនិងជំងឺទឹកនោមផ្អែម។
វេជ្ជបណ្ឌិត វ៉ានណេសា ប៊ុនឌី (Vanessa Bundy) និយាយថា “វាមានសារសំខាន់យ៉ាងខ្លាំងក្នុងការផ្តល់តុល្យភាពនៃអាហារដែលមានគុណភាពខ្ពស់ដល់កូនៗរបស់យើង ហើយដើម្បីយកចិត្តទុកដាក់ខ្លាំងបំផុតទៅលើជាតិស្ករ fructose និង ជាតិស្ករ sucrose ដែលពួកគេបរិភោគប្រចាំថ្ងៃ”។