ការសិក្សាថ្មីមួយណែនាំថា ជំងឺបេះដូងអាចជាកត្តាគ្រោះថ្នាក់ចំពោះជំងឺមហារីកប្រូស្តាត។
ក្រុមអ្នកស្រាវជ្រាវនៅវិទ្យាស្ថានជំងឺមហារីក Duke និយាយថា ប្រសិនបើទំនាក់ទំនងនេះត្រូវបានបញ្ជាក់ក្នុងការស្រាវជ្រាវទៅថ្ងៃមុខ វាមានន័យថាការផ្លាស់ប្តូររបៀបរស់នៅដែលអាចកាត់បន្ថយគ្រោះថ្នាក់ជំងឺបេះដូង ដូចជាការសម្រកទម្ងន់ ការហាត់ប្រាណ និងការបរិភោគអាហារដែលល្អចំពោះសុខភាព ក៏អាចការពារបុរសប្រឆាំងជំងឺមហារីកប្រូស្តាតបានដែរ។
វេជ្ជបណ្ឌិត ហ៊ន អាល់ហ្វ្រេត ថូម៉ាស (Jean-Alfred Thomas II) និយាយថា “អ្វីដែលល្អសម្រាប់បេះដូងប្រហែលជាល្អសម្រាប់ប្រូស្តាតដែរ”។
គាត់និងអ្នករួមក្រុមបានវិភាគទិន្នន័យបុរសចំនួន ៦.៣៩០នាក់ ក្នុងការធ្វើតេស្តរយៈពេល ៤ឆ្នាំ លើប្រសិទ្ធភាពរបស់ថ្នាំក្នុងការកាត់បន្ថយគ្រោះថ្នាក់ជំងឺមហារីកប្រូស្តាត។ ក្នុងចំណោមបុរសទាំងនោះ មានបុរស ៥៤៧នាក់ ដែលនិយាយថាមានប្រវត្តិជំងឺសរសៃឈាម-បេះដូងមុនពេលចាប់ផ្តើមការធ្វើតេស្តនេះ។
ក្រុមអ្នកស្រាវជ្រាវបានរកឃើញថា បុរសដែលមានជំងឺសរសៃឈាម-បេះដូង មានកត្តាគ្រោះថ្នាក់ច្រើនជាងដល់ទៅ ៣៥ភាគរយក្នុងការកើតមានជំងឺមហារីកប្រូស្តាត ហើយ ២៤ភាគរយ ច្រើនជាងក្នុងការធ្វើរោគវិនិច្ឆ័យឃើញជំងឺមហារីកប្រូស្តាតក្នុងរយៈពេលពីរឆ្នាំដំបូងនៃការសិក្សាបើធៀបនឹងបុរសដែលមិនមានជំងឺបេះដូង។
រយៈបួនឆ្នាំនៃការការធ្វើតេស្តនេះ បុរសដែលមានជំងឺសរសៃឈាម-បេះដូងមានគ្រោះថ្នាក់នៃជំងឺមហារីកប្រូស្តាតជាងអ្នកដែលគ្មានជំងឺបេះដូងដល់ទៅ ៧៤ភាគរយ។
វេជ្ជបណ្ឌិត ថូម៉ាស និយាយថា “យើងបានគ្រប់គ្រងចំនួនកត្តាហានិភ័យ រួមទាំងជំងឺលើសឈាម ការប្រើស្តាទីនឬអាស្ពីរីន។ យើងមិនមានបំណកស្រាយច្បាស់លាស់ទៅលើអ្វីដែលបង្ករឱ្យមានទំនាក់ទំនងនេះនោះទេ ប៉ុន្តែយើងកំពុងធ្វើការសង្កេតលើការទាក់ទងរបស់វា”។
ជំងឺសរសៃឈាម-បេះដូងគឺជាជំងឺដែលបង្ករឱ្យមានការស្លាប់នាំមុខគេចំពោះមនុស្សជំទង់នៅសហរដ្ឋអាមេរិក ហើយជំងឺមហារីកប្រូស្តាតគឺជាប្រភេទជំងឺមហារីកនាំមុខគេទីពីរដែលសម្លាប់បុរសអាមេរិក។