ក្មេងៗ ប្រហែលជាចូលចិត្តជញ្ជក់ដៃ ទើបពួកគេមានអារម្មណ៍ថា ស្រួលខ្លួន ហើយនៅស្ងៀម។ ពេលខ្លះ សូម្បីតែចូលរៀនហើយក្តី ក៏ក្មេងៗមួយចំនួន នៅតែជញ្ជក់ដៃដែរ។
តើការជញ្ជក់ដៃបែបនេះ អាចប៉ះពាល់អ្វីខ្លះ ទៅដល់សុខភាពមាត់ធ្មេញ? តើវាអាចធ្វើឲ្យធ្មេញខូចដែរឬទេ?
ជាការពិត ទារកអាចចេះជញ្ជក់ដៃ តាំងពីនៅក្នុងពោះម្តាយមកម្លេះ ហើយបន្តរហូតដល់គេកើត។ ភាគច្រើន កូនក្មេងជញ្ជក់ដៃ នៅពេលដែគេឃ្លាន ខ្លាច ធុញទ្រាន់ ឬឈឺ។ ពេលខ្លះ កូនក្មេងត្រូវការជញ្ជក់ដៃ ទើបអាចគេងលក់។
សូមអ្នកកុំបារម្ភអី ភាគច្រើន ការជញ្ជក់ដៃ គឺមានសុវត្ថិភាព និងមិនប៉ះពាល់ដល់ធ្មេញ ឬអញ្ចាញនោះទេ រហូតដល់ធ្មេញអចិន្ត្រៃយ៍ដុះចេញ (ធ្មេញនេះ ជាទូទៅ ដុះនៅអាយុ ៦ ឆ្នាំ)។ កូនក្មេងអាយុ ចាប់ពី ៣ ទៅ ៦ ឆ្នាំ នឹងបញ្ឈប់វាដោយខ្លួនឯង។
យ៉ាងណាមិញ ការជញ្ជក់ដៃ អាចបង្កជាបញ្ហាមួយចំនួន ដូចខាងក្រោមនេះ ៖
- ឧស្សាហ៍ឈឺ ដោយសារតែដៃកូនក្មេងមិនស្អាត នៅពេលយកមកជញ្ជក់ ដូច្នេះ អ្នកត្រូវឧស្សាហ៍លាងសម្អាតដៃរបស់កូន
- ខូចទ្រង់ទ្រាយ ឬទម្រង់របស់ធ្មេញ (វៀចធ្មេញ) នៅពេលគេជញ្ជក់យូរ ឬញឹកញាប់ពេក
- ក្លិនដៃមិនល្អ ក្រោយពេលជញ្ជក់រួច។
ដំបូន្មានទន្តពេទ្យ ៖
ឪពុកម្តាយគ្រប់រូប គួរតែតាមដាន ទៅលើសុខភាពមាត់ធ្មេញរបស់កូន ថាតើមានអ្វីកើតឡើង ខុសប្រក្រតីដែរឬទេ ហើយបើមានត្រូវប្រញាប់ នាំកូនទៅពិគ្រោះ ជាមួយទន្តពេទ្យភ្លាម៕