កាលពីអត្ថបទមុនៗយើងខ្ញុំបានប្រាប់អ្នកពីអត្តចរិតរបស់កូនមួយចំនួនរួចមកហើយ ហើយអ្នកក៏ដឹងដែរថាចរិតរបស់កូនគឺអាស្រ័យទៅលើឳពុកម្តាយ។ ដូចនេះកូនដែលមានឳពុកម្តាយលេងលែសគ្នានឹងមានចរិតបែបណាទៅ?
មានប្តីប្រពន្ធមួយចំនួនបានយកការលេងលែសគ្នាមកស្រាយចំណងរវាងគេទាំងពីរនាក់ ប៉ុន្តែតើអ្នកដឹងទេថាក្រោយពេលដែលអ្នកអាចស្រាយចំណងនេះបានគឺនៅមានកូនអ្នកដែលជាប់ក្នុងចំណងនេះ ហើយមិនអាចស្រាយបានជារៀងរហូត។ របួសក្នុងចិត្តរបស់ពួកគេគឺមិនអាចជាសះស្បើយបានឡើយ ពួកគេនឹងមានអារម្មណ៍ឯកកោរ គ្មានអារម្មណ៍សុវត្ថិភាព ថែមទាំងមានអារម្មណ៍ភ័យខ្លាចដែលមិនអាចព្យាបាលបានជារៀងរហូត។ ម្យ៉ាងទៀតកុមារដែលរស់នៅក្នុងគ្រួសារបែបនេះ តែងតែងាយធ្វើខុសខ្លាំងណាស់ ហើយក៏ងាយមានអាការៈថប់អារម្មណ៍ ទុកអ្នកដទៃជាសត្រូវ ចូលចិត្តសងសឹក និងមិនជឿជាក់ចំពោះស្នេហាឡើយ ហើយក៏មិនជឿជាក់ចំពោះអ្នកដទៃដូចគ្នា។ ដូចនេះយូរទៅគេនឹងគ្មានមិត្តភក្តិ ហើយបាត់បង់នូវអារម្មណ៍កក់ក្តៅទៀតផង៕