ឧស្សាហ៍ញ៊ាំ ប៉ុន្តែតិចអត់ដឹង “ខ្ទិះដូង” អាចប្រើដោះស្រាយបញ្ហាសម្រស់បាន

តើអ្នកធ្លាប់ដឹងទេថាផលិតផលសម្រស់ភាគច្រើនមានផ្ទុកខ្ទិះដូង? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាយ៉ាងណាដើម្បីកាត់បន្ថយចំណាយអ្នកអាចសាកល្បងរូបមន្តថែរក្សាសម្រស់បែបធម្មជាតិដោយប្រើខ្ទិះដូងដោយខ្លួនឯងនៅផ្ទះបាន។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរបៀបងាយៗក្នុងការប្រើប្រាស់ខ្ទិះដូងថែសម្រស់ ៖

១. ព្យាបាលនិងទប់ស្កាត់បញ្ហាស្បែកស្ងួត

អ្វីដែលអ្នកត្រូវធ្វើ គឺគ្រាន់តែលាបខ្ទិះដូងលើស្បែកដូចពេលប្រើប្រាស់ផលិតផលផ្ដល់សំណើមដទៃទៀត។ អ្នកអាចលាងសម្អាតស្បែកចេញជាមួយទឹកធម្មតារយៈពេលប៉ុន្មាននាទីក្រោយលាបរួច ឬមិនបាច់លាងចេញក៏បាន។ ស្បែកងាយនឹងស្រូបយកជាតិសំណើមពីខ្ទិះដូងបំផុតសូម្បីតែស្រទាប់ដែលជ្រៅជាងគេ។

២. ព្យាបាលស្បែកដែលរលាកដោយសារកម្ដៅថ្ងៃ

ជាតិខ្លាញ់ក្នុងខ្ទិះដូងជួយកាត់បន្ថយការឈឺចាប់ ឡើងក្រហម និងហើមលើស្បែក។ អ្នកអាចលាបប្រេងដូង ១ស្រទាប់ស្ដើងលើតំបន់ស្បែកដែលមានបញ្ហានៅពេលយប់មុនពេលចូលគេងនិងលាងសម្អាតចេញនៅព្រឹកបន្ទាប់ដើម្បីទទួលបានលទ្ធផលកាន់តែប្រសើរ។

៣. ប្រឆាំងរោគសញ្ញានៃភាពចាស់តាមវ័យ

អ្វីដែលអ្នកត្រូវធ្វើ គឺគ្រានតែលាយខ្ទិះដូងពី ២ ទៅ ៣ដំណក់ជាមួយគ្រាប់អាលម៉ុនដែលកិនម៉ដ្ឋចំនួនពី ៦ ទៅ ៧គ្រាប់។ កូរឱ្យសព្វ សឹមលាបល្បាយលើមុខ និងរងចាំសម្រាប់រយៈពេលប្រហែល ១៥នាទី។ លាងសម្អាតចេញជាមួយទឹកត្រជាក់។ អនុ​វត្តឱ្យបានពី ២ ទៅ ៣ដងក្នុងមួយសប្តាហ៍។

៤. ប្រើប្រាស់ជាផលិតផលសម្អាតគ្រឿងសម្អាងពីស្បែកមុខ

អ្វីដែលអ្នកត្រូវធ្វើ គឺគ្រាន់តែលាយប្រេងអូលីវ ២ភាគជាមួយខ្ទិះដូង ១ភាគ។ កូរឱ្យសព្វ សឹមប្រើប្រាស់ដុំសំឡីជ្រលក់ក្នុងល្បាយនិងដុសលើស្បែកមុខថ្នមៗ។ វិធីនេះមិនត្រឹមតែសម្អាតគ្រឿងសម្អាងចេញពីមុខប៉ុណ្ណោះទេ ប៉ុន្តែក៏ផ្ដល់សារធាតុចិញ្ចឹមដល់ស្បែកផងដែរ។

៥. ពន្លឿនការលូតលាស់សក់

អ្វីដែលអ្នកត្រូវធ្វើ គឺគ្រាន់តែម៉ាស្សាប្រេងដូងលើសក់និងរងចាំសម្រាប់រយៈពេលប្រហែលពី ២០ ទៅ ៣០នាទី មុនពេលកក់ជាមួយសាប៊ូដូចពេលធម្មតា៕