ការបញ្ចុកអាហារបន្ថែម ឲ្យកូនចេះដើរតេសតាស អាចក្លាយទៅជាការបារម្ភយ៉ាងខ្លាំងមួយ សម្រាប់ម្តាយគ្រប់រូប ព្រោះមិនដឹងថា វាជាពេលវេលាស័ក្តិសមឬអត់។ បើសិនជាអ្នកកំពុងតែឆ្ងល់ថា ពេលណាអ្នកអាចបន្ថែម អាហារតូចៗទៀត ដល់កូនរបស់អ្នកញ៉ាំបាននោះ យើងខ្ញុំនឹងឆ្លើយជូន។
ការបំបៅដោះកូន គឺជារឿងដ៏សំខាន់បំផុតមួយ ដែលធ្វើចាប់តាំងពីកូនកើតភ្លាម រហូតដល់គេអាយុ ៦ខែ។ ចាប់ពីខែទី ៦ ទៅ អ្នកអាចចាប់ផ្តើមឲ្យកូន ញ៉ាំអាហារតិចៗបន្ថែមទៀតបានហើយ។
យើងយោងទៅតាមប័ណ្ណសុខភាពកុមារ របស់ក្រសួងសុខាភិបាលប្រទេសកម្ពុជាយើង (ប័ណ្ណលឿង)បានឲ្យដឹងថា ៖
- អាយុចាប់ពី ៦ ទៅ ១១ ខែ ត្រូវផ្តល់បបរពិសេស ដែលមានគ្រឿងផ្សំដូចជា ត្រកួន ល្ពៅ ត្រី ស៊ុត ប្រេងឆា ខ្លាញ់ ឬប្រេងដូង ឲ្យបាន ៣ ដងក្នុងមួយថ្ងៃ។ បូករួមនឹងបន្តបំបៅដោះកូនបន្ថែមទៀត។
- អាយុចាប់ពី ១២ ទៅ ២៣ ខែ ត្រូវផ្តល់បបរពិសេសខាប់ ៣ ពេល និងអាហារក្រៅពេល ២ ដង ក្នុងមួយថ្ងៃ។ បូករួមនឹងបន្តបំបៅដោះកូនបន្ថែមទៀត។
- អាយុចាប់ពី ២៤ ខែឡើងទៅ ត្រូវផ្តល់អាហារដូចសមាជិកក្នុងគ្រួសារ ៣ ដងក្នុងមួយថ្ងៃ និងបន្ថែមអាហារក្រៅ ពេល ២ ដងទៀត។
ចំពោះមូលហេតុដែលកុមារ ត្រូវការញ៉ាំអាហារបន្ថែម ក្រៅពីទឹកដោះម្តាយ នៅអាយុចាប់ពី ៦ ខែឡើងទៅ គឺដោយសារតែ ពេលវេលានេះ គឺរាងកាយរបស់ទារក ត្រូវការលូតលាស់ច្រើនបន្ថែម ដូច្នេះ ត្រឹមតែទឹកដោះម្តាយមួយមុខ គឺមិនគ្រប់គ្រាន់ នឹងតម្រូវការលូតលាស់របស់គេឡើយ៕