Join with Health.com.kh on Telegram

​ការ​ពរ​ពោះ​របស់​ស្ត្រី​គ្រប់រូប គឺជា​រឿង​សំខាន់បំផុត ព្រោះ​ទាំង​អ្វី និង​សកម្មភាព​ដែល​ពួកគេ​ធ្វើ ឬ​ញ៉ាំ​ចំណីអាហារ អាច​នឹង​ប៉ះពាល់​ដល់​កូន​គ្រប់​ពេល បើសិន​ជា​ទង្វើ​ទាំង​អស់នោះ ធ្វើ​ដោយ​មិន​ត្រឹមត្រូវ ឬ​ជា​ទង្វើរ​កើតចេញ​ពី​ទម្លាប់ កាលពី​មិន​ទាន់​មាន​ផ្ទៃពោះ តែ​ត្រូវ​ហាម​វិញ​ក្នុងពេល​មាន​ផ្ទៃពោះ​។

​យ៉ាងណាមិញ ទារក​ក្នុង​ផ្ទៃ​អាច​ប្រឈម នឹង​ការលូតលាស់​មិន​គ្រប់គ្រាន់ ឬ​កើតមក​មិន​គ្រប់​ទម្ងន់​បាន​លុះត្រាតែ​ម្តាយ ពុំ​មាន​ការ​ញ៉ាំ​ជីវជាតិ​គ្រប់គ្រាន់ និង​ថែរក្សា​សុខភាព អំឡុង​ពេល​មាន​ផ្ទៃពោះ​មិនបាន​ល្អ​។

​ទារក​ដែល​គិត​ថា​កើតមក​ខ្វះ​ទម្ងន់​ខ្លាំង គឺ​មាន​ទម្ងន់​តិចជាង ១,៥ គីឡូក្រាម​។ ទារក​ដែល​មិន​គ្រប់​ទម្ងន់ អាច​កើត​ទាំង​មិន​គ្រប់​ខែ និង​គ្រប់​ខែ​។ ចំពោះ​ទម្ងន់​ទារក​កើត​មក​ធម្មតា គឺ​ពី ២,៥ ទៅ ៤,៥ គីឡូក្រាម​។

​មូលហេតុ​ពីរ​សំខាន់ៗ ដែល​នាំ​ឲ្យ​ទារក​កើតមក មិន​គ្រប់​ទម្ងន់​គឺ សម្រាល​មិន​គ្រប់​ខែ និង​មិន​មាន​ការលូតលាស់ តាំងពី​នៅក្នុង​ពោះ​ម្តាយ​មក​ម្លេះ ឬ​ហៅ​ថា Intrauterine Growth Restriction ដែល​នេះ​ច្រើន​តែ​មក​ពី​ម្តាយ មិន​មាន​ការ​ញ៉ាំ​ជីវជាតិ​គ្រប់គ្រាន់​។
​ការ​សម្រាល​មិន​គ្រប់​ខែ មានន័យ​ថា ទារក​កើត​នៅ​អាយុ​មិន​ដល់ ៣៧ សប្តាហ៍​ពី​ក្នុង​ពោះ​ម្តាយ ហើយ​ករណី​នេះ ក៏​ជា​ហេតុ​នាំ​ឲ្យ​ទារក មាន​ទម្ងន់​មិន​គ្រប់​ប្រមាណ ៧០ ភាគរយ​ដែរ​។

​មូលហេតុ​ផ្សេងៗ​ទៀត ដែល​នាំ​ឲ្យ​ទារក សម្រាល​មិន​គ្រប់​ទម្ងន់​ដែរនោះ មានដូចជា ៖
•​    ​ម្តាយ​ជក់បារី​
•​    ​មាន​កូនភ្លោះ​ពីរ ឬ​បី​
•​    ​ម្តាយ​ប្រើ​ថ្នាំ និង​គ្រឿង​ស្រវឹង​
•​    ​ម្តាយ​មិន​មាន​ការ​ញ៉ាំ​ជីវជាតិ​គ្រប់គ្រាន់​
•​    ​កូន​កើត​មក​ខូច​អវៈយវៈ​។​

​ការបង្ក​រោគ​ចំពោះ​ម្តាយ និង​កូន​ក្នុង​ផ្ទៃ​ដូចជា ជំងឺ​អ៊ុត​ស្វាយ ស្អូច ឬ​ពពួក​វីរុស Cytomegalovirus ឬ​ជំងឺ​ផ្សេងៗ​ទៀត​លើ​ម្តាយ​ដូចជា ជំងឺ​ទឹកនោម​ផ្អែម និង​លើស​សម្ពាធ​ឈាម ភាពខុស​ធម្មតា​របស់​ស្បូន និង​មាត់ស្បូន ក៏​ជា​ហេតុផល​មួយ នាំ​ឲ្យ​កូន​កើត​មក​មិន​គ្រប់​ទម្ងន់​ដែរ​។ ​អ្វី​ដែល​ជា​ដំណឹង​ល្អ​នោះ​គឺថា សម្រាប់​ពេល​បច្ចុប្បន្ន​នេះ មាន​ភាគរយ​តិចតួច​ណាស់ ដែល​កូន​កើតមក ខ្វះ​ទម្ងន់​ខ្លាំង​៕