ការផ្តល់ឲ្យកូន នូវអាហារត្រឹមត្រូវ ក្នុងដំណាក់កាលគេកំពុងតែលូតលាស់ គឺជារឿងសំខាន់សម្រាប់ការរីកចម្រើនគ្រប់យ៉ាងរបស់គេ ព្រមទាំងខួរក្បាលផងដែរ។ មែនហើយ អ្នកពិតជាចង់ជួយឲ្យរាងកាយគេធំធាត់លឿន ដើម្បីឆាប់ទៅរៀន និងអាចធ្វើសកម្មភាពផ្សេងៗទៀតបាន ប៉ុន្តែ ខួរក្បាលពួកគេ ក៏ត្រូវការជីវជាតិត្រឹមត្រូវ ដើម្បីធ្វើការបានល្អដែរ។ សម្រាប់ឪពុកម្តាយ ដែលកំពុងតែឆ្ងល់ថាតើ អាហារអ្វីដែលល្អបំផុត សម្រាប់ការលូតលាស់ខួរក្បាលល្អនោះ ចូរស្វែងយល់ជាមួយខ្ញុំ ដូចខាងក្រោមនេះ ៖
ស៊ុត
ស៊ុតមានសារធាតុ ខូលីនខ្ពស់ដែលដើរតួនាទីមួយ ក្នុងការលូតលាស់កោសិកាមេ សម្រាប់ការចងចាំ ដែលស្ថិតក្នុងខួរក្បាលដ៏ជ្រៅ។ រឿងដ៏សាមញ្ញនោះគឺថា កាលណាមានកោសិកានេះកាន់តែច្រើន ក្នុងខួរក្បាល ការចងចាំនឹងកាន់តែល្អ។ អ្នកអាចឲ្យកូនញ៉ាំស៊ុត ជាអាហារពេលព្រឹក ដើម្បីបង្កើនការចងចាំផង និងឆ្អែតបានយូរផង។
បន្លែពណ៌បៃតង
អាហារប៉ូវខួរក្បាលមួយផ្សេងទៀត ដែលគួរផ្តល់ឲ្យកូនដែរនោះ គឺបន្លែពណ៌បៃតង។ បន្លែប្រភេទនេះត្រូវបានគេរកឃើញថា មានប្រសិទ្ធភាពក្នុងការកាត់បន្ថយ បញ្ហាភ្លេចភ្លាំងបានច្រើនបំផុត។ មិនត្រឹមតែប៉ុណ្ណោះ វាក៏ផ្ទុកទៅដោយជីវជាតិសំខាន់ៗ ព្រមទាំងអង់ទីអុកស៊ីដង់ ដែលអាចជួយដល់ការលូតលាស់ កោសិកាខួរក្បាលទៀត។
ទឹកដោះគោគ្មានជាតិខ្លាញ់ តែសម្បូរវីតាមីន D ប្រូតេអ៊ីន និងផូស្វ័រ
ចូរព្យាយាមឲ្យកូនអ្នក ញ៉ាំទឹកដោះគោប្រភេទនេះឲ្យបានច្រើន។ ជាតិកាល់ស្យូម ក៏សំខាន់ដែរ ព្រោះវាជួយដល់ការផលិតអាំងស៊ុយលីន ដែលជាហេតុផលមួយថា វាមានសារៈសំខាន់ ក្នុងការបញ្ចូលទឹកដោះគោ ទៅក្នុងរបបអាហាររបស់ក្មេង។ ចំពោះករណីមិនអាចញ៉ាំជាតិឡាក់តូសបាន អាចជាបញ្ហាមួយ សម្រាប់ក្មេងមួយចំនួនដែរ ព្រោះពួកគេមិនអាចញ៉ាំទឹកដោះគោបាន ដូច្នេះ គួរតែពិគ្រោះជាមួយគ្រូពេទ្យ និងស្វែងរកវិធីសាស្ត្រផ្សេងជំនួសវិញ។
អាស៊ីតខ្លាញ់អូមេហ្គាបី
នេះជាអាហារមួយប្រភេទទៀត ដែលអ្នកគួរតែបញ្ចូលវា ទៅក្នុងរបបអាហារក្មេងដែរ។ អូមេហ្គាបីនេះត្រូវបានគេរកឃើញក្នុងសាច់ត្រី ដែលវាអាចជួយការពារខួរក្បាល ពីការភ្លេចភ្លាំង។ ត្រីដែលសម្បូរសារធាតុនេះ មានដូចជា ត្រីសាឌីន ធូណា និងសាលម៉ុង៕