មានអាហារមួយចំនួន ដែលធ្វើឱ្យអារម្មណ៍របស់យើងមិនស្ងប់ ហើយមិនងងុយគេងទាល់តែសោះ។ វាមិនល្អទេ សម្រាប់ការទទួលទានមុនពេលចូលគេង។ សម្រាប់អ្នកដែលមានបញ្ហាគេងមិនលក់ ការដឹងថាតើអាហារណាដែលអាចមិនគួរទទួលទានមុនពេលចូលគេង គឺពិតជាសំខាន់ណាស់។
ខាងក្រោមនេះ គឺជាអាហារសំខាន់ទាំង៤យ៉ាង សម្រាប់មិនគួរទទួលទានមុនពេលចូលគេង បើយោងតាមការចុះផ្សាយរបស់គេហទំព័រ A.H. BEARD៖
១. សូកូឡាខ្មៅ៖ មនុស្សគ្រប់គ្នាសុទ្ធតែដឹងហើយថា មិនគួរផឹកកាហ្វេនៅពេលល្ងាចទេ ព្រោះវាធ្វើឱ្យគេងបញ្ឈរភ្នែកនៅពេលយប់។ តែមិនសូវជាមានអ្នកដឹងទេថា សូកូឡាខ្មៅក៏បង្កជាបញ្ហានេះដែរ។ នេះក៏ព្រោះតែវាមានផ្ទុកជាតិកាហ្វេអ៊ីនច្រើន ប្រហែលទៅនឹងកាហ្វេដែរ។ ចៀសវាងទទួលទានសូកូឡាខ្មៅមុនពេលចូលគេង ដើម្បីឱ្យខួរក្បាលនិងរាងកាយរបស់អ្នកសម្រាក។
២. ឈីស៖ ឈីសពិបាករំលាយ ដោយសារតែបរិមាណខ្លាញ់ឆ្អែតខ្ពស់។ នេះផ្តល់នូវការងារបន្ថែមដល់ប្រព័ន្ធរំលាយអាហារ ធ្វើឱ្យវាកាន់តែពិបាកសម្រាកនិងដេកលក់ស្រួល។ បើអ្នកចង់ទទួលទានវា សូមទទួលទាននៅពេលអាហារថ្ងៃត្រង់ជាមួយមិត្តភក្តិជំនួសមុនពេលចូលគេង។
៣. សាច់ក្រហម៖ ទោះបីជាសាច់ក្រហមមានផ្ទុកនូវប្រូតេអីននិងជាតិដែកមានប្រយោជន៍ក៏ដោយ ជាតិខ្លាញ់ខ្ពស់របស់វាធ្វើឱ្យរាងកាយពិបាករំលាយ។ ប្រសិនបើសាច់ក្រហមគឺជាផ្នែកមួយនៃរបបអាហាររបស់អ្នក សូមព្យាយាមទទួលទានវានៅពេលថ្ងៃត្រង់ជំនួសវិញ។
៤. ប៉េងប៉ោះ៖ ប៉េងប៉ោះមានផ្ទុកជាតិ Tyramine ខ្ពស់ ដែលជាសារធាតុគីមីជួយជម្រុញខួរក្បាលនិងពន្យារដល់ដំណេក។ ចៀសវាងការបរិភោគប៉េងប៉ោះមុនពេលចូលគេង ប្រសិនបើអ្នកមិនចង់ឱ្យភ្នែកអ្នកបិទមិនកើតនៅពេលយប់៕