ពលរដ្ឋខ្មែរមួយចំនួន ច្រើនធ្វេសប្រហែសទុកឲ្យកូនលេងតែម្នាក់ឯង ដែលនេះគឺពិតជាគ្រោះថ្នាក់ណាស់ សម្រាប់កូនក្មេងតូចៗ។ ការលង់ទឹក បានកើតឡើងច្រើនណាស់ ដោយសារការមិនយកចិត្តទុកដាក់បែបនេះ ហើយការជួយសង្គ្រោះបន្ទាន់ទៀតសោត ក៏នៅមានការខ្វះចន្លោះ មានន័យថា ក្នុងករណីមួយចំនួន គេអាចជួយសង្គ្រោះជីវិតកុមារបាន ប៉ុន្តែ ដោយសារមិនសូវមានចំណេះដឹងសង្គ្រោះបន្ទាន់បែបនេះ ទើបធ្វើឲ្យមជ្ជរាជឆក់យកជីវិតក្មេងៗទៅ។
ថ្ងៃនេះ យើងខ្ញុំនឹងបង្ហាញបងប្អូន ឲ្យបានដឹងច្បាស់ថាតើ ពេលឃើញក្មេងលង់ទឹក អ្នកគួរធ្វើបែបណា ទើបត្រឹមត្រូវនោះ។
១. ស្រែកហៅគ្នាឲ្យបានច្រើនដើម្បីជួយ ហើយឲ្យនរណាម្នាក់ទាក់ទងទៅគ្រូពេទ្យ
២. យកដៃទ្រខ្នងកុមារ ហើយដៃចាប់ចង្ការផ្ងើយក្បាលឡើង
៣. យកត្រចៀកអ្នកដាក់ក្បែរច្រមុះ និងមាត់ ដើម្បីស្តាប់មើលថាតើ គេដកដង្ហើមដែរឬទេ
៤. បើគេមិនដកដង្ហើមទេ
– កុមារក្រោមមួយឆ្នាំ ៖ ដាក់មាត់របស់អ្នក ទៅលើច្រមុះ និងបបូរមាត់កុមារ រួចផ្លុំខ្យល់ចូលពីរដង។ សង្កេតមើលថាតើទ្រូងកូនប៉ោងឡើង ហើយចុះវិញ ទើបផ្លុំម្តងទៀត។
– កុមារអាយុមួយឆ្នាំ ឬច្រើនជាងនេះ ៖ ច្របាច់ច្រមុះកូន រួចដាក់មាត់របស់អ្នក ផ្អឹបនឹងមាត់កូនក្មេង រួចផ្លុំខ្យល់ចូលពីរដងយឺតៗ។ ត្រូវរង់ចាំមើលទ្រូងកូនប៉ោង ហើយផតចុះវិញ ទើបផ្លុំម្តងទៀត។
៥. ពិនិត្យមើលជីពចរ
បើមាន ចូរបន្តផ្តល់ដង្ហើមតាមវិធីខាងលើ រៀងរាល់បីវិនាទីម្តង រហូតដល់គេអាចដកដង្ហើមបានដោយខ្លួនឯង ឬក៏អាចដឹងខ្លួន។
បើគ្មានជីពចរទេ
– កុមារក្រោមមួយឆ្នាំ ៖ ដាក់ម្រាមដៃពីររបស់អ្នក នៅចន្លោះដោះទាំងសងខាង រួចសង្កត់ចុះក្នុងជម្រៅប្រហែលជា ១៤ សង់ទីម៉ែត្រក្នុងរយៈពេល ៣ វិនាទីម្តង។ បន្ទាប់ពីសង្កត់បាន ៥ ដង ចូរផ្លុំខ្យល់ដង្ហើមម្តង។
– កុមារអាយុមួយឆ្នាំ ឬច្រើនជាងនេះ ៖ ប្រើបាតដៃ ដើម្បីសង្កត់ត្រង់ចំណុច និងប្រើវិធីសាស្ត្រដូចខាងលើ។
៦. ប្រញាប់នាំគេទៅមន្ទីរពេទ្យ ក្រោយពេលសង្គ្រោះបន្ទាន់រួច៕
