ទោះបីជាចូលចិត្តនិងឧស្សាហទទួលទានយ៉ាងណាក៏ដោយ ក៏ភាគច្រើននៃពួកយើងប្រហែលជាមិនធ្លាប់ចាប់អារម្មណ៍ដឹងពីអត្ថប្រយោជន៍ដ៏ប្រសើរនៃតែក្រូចឆ្មារចំពោះសុខភាពឡើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើភេសជ្ជៈនេះល្អអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីផលល្អៗនៃការទទួលទានតែក្រូចឆ្មារ ៖
១. ជួយបំបាត់អាការៈឈឺក្បាល
តែក្រូចឆ្មារក្ដៅឧណ្ហៗមិនត្រឹមតែជួយបន្សាបជាតិពុលក្នុងរាងកាយ និងពង្រឹងប្រព័ន្ធភាពស៊ាំប៉ុណ្ណោះទេ ប៉ុន្តែទឹកក្រូចឆ្មារក្ដៅឧណ្ហៗក៏អាចបំបាត់អាការៈឈឺក្បាលបានយ៉ាងប្រសើរផងដែរ។ អ្វីដែលអ្នកត្រូវធ្វើ គឺគ្រាន់តែទទួលទានទឹកក្រូចឆ្មារក្ដៅឧណ្ហៗមួយកែវជាការស្រច។
២. មានផ្ទុកលក្ខណៈសម្បត្តិប្រឆាំងអុកស៊ីតកម្មនិងប្រឆាំងការរលាក
វីតាមីន C ក្នុងក្រូចឆ្មារមានលក្ខណៈសម្បត្តិប្រឆាំងអុកស៊ីតកម្មនិងប្រឆាំងការរលាកក្នុងរាងកាយគួរឱ្យកត់សម្គាល់។ វីតាមីនក្នុងតែក្រូចឆ្មារក៏ជួយពង្រឹងប្រព័ន្ធភាពស៊ាំរាងកាយបានយ៉ាងប្រសើរផងដែរ។
៣. អាចជួយកាត់បន្ថយហានិភ័យនៃជំងឺមហារីក
ផ្លែឈើប្រភេទ Citrus ដូចជាក្រូចឆ្មារមានផ្ទុកសមាសធាតុមួយចំនួនដែលមានលក្ខណៈសម្បត្តិប្រឆាំងជំងឺមហារីករួមបញ្ចូលទាំងសមាសធាតុ flavonoids និងសារធាតុ limonoids។ សមាសធាតុទាំងនេះអាចជួយកាត់បន្ថយហានិភ័យនៃជំងឺមហារីកក្រពះ ជំងឺមហារីកសុដន់ និងជំងឺមហារីកពោះវៀនធំគួរឱ្យកត់សម្គាល់។ សារធាតុប្រឆាំងអុកស៊ីតកម្មក្នុងក្រូចឆ្មារទប់ស្កាត់ការលូតលាស់នៃកោសិកាមហារីក។ សារធាតុ Quercetin ក្នុងក្រូចឆ្មារក៏មានលក្ខណៈសម្បត្តិប្រឆាំងជំងឺមហារីកដែរ។
៤. ធ្វើឱ្យសុខភាពបេះដូងមានលក្ខណៈប្រសើរឡើង
ក្រូចឆ្មារជាប្រភពដ៏ប្រសើរនៃវីតាមីន C ដែលជួយឱ្យសុខភាពបេះដូងកាន់តែមានលក្ខណៈប្រសើរឡើង។ វីតាមីន C រារាំងដល់ការកកើតឡើងនៃជាតិខ្លាញ់និងកូឡេស្តេរ៉ួលលើជញ្ជាំងសសៃឈាម។ បន្ថែមពីនេះសារធាតុ hesperidin និង diosmin ក្នុងក្រូចឆ្មារជួយពង្រឹងសុខភាពសសៃឈាមបេះដូង។ ការទទួលទានតែក្រូចឆ្មារក៏អាចជួយបញ្ចុះសម្ពាធឈាមបានទៀតផង។
៥. សម្រួលការរំលាយអាហារ
តែក្រូចឆ្មារល្អណាស់សម្រាប់សម្រួលការរំលាយអាហារនិងបំបាត់អាការៈទល់លាមក។ វាក៏អាចកម្ចាត់ជាតិពុលនិងកាកសំណល់ផ្សេងៗពីក្នុងរាងកាយ ហើយសម្អាតប្រព័ន្ធរំលាយអាហារ ព្រមទាំងធ្វើឱ្យការរំលាយអាហារកាន់តែមានលក្ខណៈប្រសើរឡើង។
- របៀបធ្វើតែក្រូចឆ្មារ
អ្នកអាចឆុងតែក្រូចឆ្មារបានយ៉ាងងាយដោយបន្ថែមគ្រឿងផ្សំមួយចំនួនចូលឱ្យបានត្រឹមត្រូវ។ ខាងក្រោមជារូបមន្តឆុងតែក្រូចឆ្មារដ៏សាមញ្ញបំផុតមួយ ៖
ជាដំបូងអ្វីដែលអ្នកត្រូវធ្វើ គឺគ្រាន់តែបន្ថែមបន្ថែមទឹកស្លឹកតែកន្លះស្លាបព្រាកាហ្វេ ឬត្រូវមួយចុងស្លាបព្រាកាហ្វេ (អាស្រ័យលើថាតើអ្នកចង់ទទួលទានតែចាស់ ឬស្ដើង) ក្នុងទឹកក្ដៅដាំពុះ ១ពែង។ ឆុងតែសម្រាប់រយៈពេលប្រហែលពី ២ ទៅ ៣នាទី។ ត្រងកាកចេញ បន្ទាប់មកច្របាច់ក្រូចឆ្មារ ១ចំណិតចូលក្នុងតែ រួចបន្ថែមទឹកឃ្មុំបន្តិចដើម្បីបង្កើនរសជាតិ។ កូរឱ្យសព្វ សឹមទទួលទានជាការស្រេច៕