ជាការពិត សត្វមូសគឺជាប្រភេទសត្វល្អិតដ៏គួរឲ្យរំខានបំផុត ដែលវាអាចខាំធ្វើឲ្យយើងរមាស់ ព្រមទាំងអាចបង្កជាជំងឺដែលអាចនឹងគម្រាមកំហែងដល់អាយុជីវិតមនុស្សបានទៀតផង ។ នៅពេលដែល វាបានខាំ និងបឺតជញ្ជក់យកឈាមអ្នក នោះស្បែកត្រង់កន្លែងនោះនឹងហើមប៉ោង ហើយមានស្នាមកន្ទួលរមាស់។ ស្នាមរមាស់នេះ នឹងបន្តជាប់មានក្នុងរយៈពេលពីរបីថ្ងៃ ឬអាចយូរជាងនេះ ប្រសិនបើនៅតែបន្តអេះវា។
នៅក្នុងរដូវវស្សា សត្វមូសនឹងកើនឡើង ក្នុងចំនួនដ៏ច្រើន ដូច្នេះអ្នកត្រូវព្យាយាមបំបាត់ជំរករបស់វា និងប្រើនូវវិធានការណ៍ ការពារផ្សេងៗដូចជាការគេងក្នុងមុង, ស្លៀកសំលៀកបំពាក់ជិតជុំដងខ្លួន, និងប្រើថ្នាំបាញ់ការពារ។ ប៉ុន្តែប្រសិនបើវា នៅតែមានឱកាសបានខាំអ្នក នោះអ្នកអាចដោះស្រាយនូវបញ្ហានៃអាការៈរមាស់នេះបានដោយប្រើនូវ គន្លឹះដ៏ងាយស្រួលមួយដូចខាងក្រោមនេះ ។
អ្នកតែងតែធ្លាប់លឺចាស់ៗប្រាប់ហើយថា ហាមយកដៃអេះត្រង់កន្លែងរមាស់ដែលមូសខាំ បើមិនដូច្នេះទេ វានឹងក្លាយរោគបាន ។ ប៉ុន្តែប្រាកដណាស់ គ្មានអ្នកណាម្នាក់អាចទប់អារម្មណ៍ថា មិនអេះវាបាននោះទេ ។ ទោះជាយ៉ាងក្តី អ្នកអាចដោះស្រាយជាមួយនឹងបញ្ហានេះបាន ដោយងាយស្រួល គឺអ្នកគ្រាន់តែត្រូវការនូវស្លាបព្រា និងទឹកក្តៅមួយកែវប៉ុណ្ណោះ ។ អ្វីដែលអ្នកត្រូវធ្វើនោះគឺ គ្រាន់តែដាក់ស្លាបព្រាលោហៈទៅក្នុងទឹកក្តៅរយៈពេល ១៥វិនាទី ដោយវាចាំបាច់ជាទឹកក្តៅទើបនឹងពុះពីចង្ក្រាននោះទេ តែវាគួរតែមានកម្តៅគ្រប់គ្រាន់ ដែលអាចជួយឲ្យស្លាបព្រាមានកម្តៅឧណ្ណៗបាន ។
នៅពេលដែលស្លាបព្រាក្តៅហើយ អ្នកអាចដាក់វានៅត្រង់កន្លែងដែលមាន ស្នាមឬកន្ទួលមូសខាំក្នុងរយៈពេលមួយនាទី រួចបន្ទាប់មកដកវាចេញ នោះអាការៈរមាស់នឹងបាត់ជាទៅវិញមិនខាន! មូលហេតុដែលការធ្វើដូចនេះអាចឲ្យអ្នកបាត់រមាស់បាននោះ គឺដោយសារតែការមាស់បានបង្កើតប្រូតេអ៊ីន ដែលនឹងអាចបំផ្លាញទៅវិញដោយសីតុណ្ហភាពខ្ពស់៕