មនុស្សគ្រប់គ្នាសុទ្ធតែបានដឹងហើយថា ក្នុងចំណោមការងារផ្ទះទាំងអស់ ការបោកគក់សំលៀកបំពាក់គឺជាការងារដ៏គួរនឿយណាយ និងចាំបាច់ត្រូវប្រើកម្លាំងច្រើន ក្នុងការបោកសម្អាតឲ្យវាបានស្អាតល្អ ព្រោះថាពេលខ្លះការប្រើម៉ាស៊ីនបោកខោអាវក៏មិនប្រាកដថាអាចឲ្យសំលៀកបំពាក់របស់អ្នកសស្អាត និងនៅថ្មីជានិច្ចបានយូរដែរ ។
ខាងក្រោមនេះ គឺជាគន្លឹះងាយៗក្នុងការជួយអ្នកឲ្យបោកសំលៀកបានស្អាតល្អដោយមិនចាំបាច់ចំណាយកម្លាំងនិងថវិការអស់ច្រើន ៖
- ជាដំបូង អ្នកគួរតែចាក់ទឹកខ្មេះកន្លះពែង ទៅលើសំលៀកបំពាក់ដែលបានត្រាំទុក ។ អ្នកគួរតែសាកល្បងនូវវិធីនេះ ពីព្រោះការធ្វើដូច្នេះគឺអាចជួយបង្កើនល្បឿននៃការសម្អាតដោយប្រើម្ស៉ៅសាប៊ូធម្មតា និងជួយការពារការស្លកពណ៌ ក៏ដូចជាកាត់បន្ថយការកកនូវម្ស៉ៅសាប៊ូជាប់នឹងសំលៀកបំពាក់បន្ទាប់ពីហាលស្ងួត។
- ឬអ្នកអាចសាកល្បង ចាក់ទឹកខ្មេះបន្តិចទៅក្នុងផ្នែកនៃកន្លែងលាយម្ស៉ៅសាប៊ូក្នុងម៉ាស៊ីន បោកខោអាវជំនួសឲ្យការដាក់ទឹកក្រអូប។ សម្គាល់ៈ ការធ្វើដូចនេះ អ្នកនឹងឃើញថាវាមានមានប្រសិទ្ធភាពដូចជាទឹកបន្ទន់ក្រអូបដែរ តែវាកាន់តែធ្វើឲ្យសំលៀកបំពាក់ទន់ល្មើយថែមទៀត ហើយនឹងមិនបង្កឲ្យមានផលប៉ះពាល់ដល់បរិស្ថានទៀតផង។
- ជាតិអាស៊ីត ក៏អាចជួយយកចេញនូវញើស និងស្នាមក្លិនមិនល្អដែលជាប់នៅលើសំលៀកបំពាក់ពណ៌ស។
- យើងគ្រប់គ្នាសុទ្ធតែដឹងហើយថា ពេលខ្លះសារជាតិសាប៊ូនិងទឹកថ្នាំបោកសម្អាតសំលៀកបំពាក់មួយចំនួន សុទ្ធតែមានផ្ទុកនូវសារជាតិដែលអាចធ្វើឲ្យស្បែក អាចមានប្រតិកម្មអាលែហ្សីចំពោះស្បែកអ្នកដែលងាយរងគ្រោះនឹងបញ្ហានេះ ។ដូច្នេះ ការប្រើទឹកខ្មេះ ជាវិធីធម្មជាតិក្នុងការសម្អាត គឺអាចដោះស្រាយនូវបញ្ហានេះបាន ។
- ទឹកខ្មេះ ក៏អាចជួយកំចាត់ក្លិនមិនល្អដែលជាប់នៅលើសំលៀកបំពាក់ ដូចជាក្លិនបារី ឬក្លិនផ្សែងនៅពេលដែលអ្នកទៅទទួលទានអាហារប្រភេទសាច់អាំងជាដើម ។
- អ្នកអាចបោកសំលៀកបំពាក់ ដែលជាប់ស្នាមប្រឡាក់ខ្លាំង ដោយដាក់វាត្រាំនៅក្នុងទឹកក្តៅជាមួយនឹងទឹកខ្មេះកន្លះពែង។ បន្ទាប់មកអ្នកគួរត្រាំវាទុកចោលមួយយប់ ហើយបោកសម្អាតវាដូចធម្មតា ។ អ្នកនឹងសម្គាល់ឃើញនូវភាពខុសប្លែកបន្ទាប់ពីបោកសម្អាតរួច។
- អ្នកក៏អាចប្រើទឹកខ្មេះនេះ ទៅសម្អាតនិងដុសខាត់ជាតិកខ្វក់ដែលជាប់មាន នៅក្នុងម៉ាស៊ីនបោកខោអាវបានផងដែរ ដោយមិនចាំបាច់ប្រើសារជាតិគីមីអ្វីផ្សេងទៀត៕