Join with Health.com.kh on Telegram

តែរមៀតល្អណាស់ចំពោះសុខភាពអាចផ្ដល់អត្ថប្រយោជន៍ជាច្រើន។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ដូច្នេះថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះធ្វើតែរមៀត ព្រមទាំងផលល្អៗនៃភេសជ្ជៈនេះ ៖

  • របៀបធ្វើតែរមៀត

អ្វីដែលអ្នកត្រូវធ្វើ គឺគ្រាន់តែបន្ថែមរមៀតម៉ដ្ឋពី ១ ទៅ ២ស្លាបព្រាកាហ្វេក្នុងទឹកឆ្អិន ៤ពែង។ ចាប់ផ្ដើមរម្ងាស់សម្រាប់រយៈពេលប្រហែល ១០នាទី សឹមត្រងចាក់តែក្នុងពែងមួយ និងទុកឱ្យចុះត្រជាក់បន្តិចសិន មុនបន្ថែមទឹកឃ្មុំបន្តិចូលដើម្បីបង្កើនរសជាតិ។

  • អត្ថប្រយោជន៍នៃការទទួលទានតែរមៀត

១. ប្រឆាំងការរលាកក្នុងរាងកាយបំបាត់ការឈឺចាប់

តែរមៀតជួយបំបាត់ការឈឺចាប់ដោយសារការរលាក។ ប្រសិនបើអ្នកកំពុងប្រឈមមុខនឹងអាការៈឈឺចាប់ ដោយសារតែការរលាកក្នុងរាងកាយ ចូរបន្ថែមរមៀតមួយចំនួនក្នុងអាហារ ឬព្យាយាមទទួលទានតែរមៀត។ នោះក៏ព្រោះតែរមៀតជាប្រភពដ៏ប្រសើរនៃសារធាតុ curcumin ដែលមានលក្ខណៈសម្បត្តិប្រឆាំងការរលាកគួរឱ្យកត់សម្គាល់។

២. ព្យាបាលអាការៈរឹងសន្លាក់

រមៀតមានផ្ទុកលក្ខណៈសម្បត្តិប្រឆាំងការរលាកដែលជួយបំបាត់ការហើម ឈឺចាប់ និងឡើងរឹងនៃសន្លាក់បានយ៉ាងប្រសើរ។ អ្វីដែលអ្នកត្រូវធ្វើ គឺគ្រាន់តែទទួលទានតែរមៀត ឬរួមបញ្ចូលរមៀតក្នុងអាហារប្រចាំថ្ងៃ។

៣. ពង្រឹងសុខភាពសួតសម្រួលការដកដង្ហើម

នោះក៏ព្រោះតែរមៀតមានផ្ទុកសារធាតុ curcumin និងលក្ខណៈសម្បត្តិប្រឆាំងការរលាកជួយបង្កើនសមត្ថភាពមុខងារនៃប្រព័ន្ធផ្លូវដង្ហើម។ ការទទួលទានតែរមៀតក៏ជួយកាត់បន្ថយហានិភ័យនៃជំងឺមហារីកសួតផងដែរ។

៤. សម្រួលការរំលាយអាហារ

រមៀតមានសមត្ថភាពបង្កើនការផលិតទឹកប្រមាត់ដែលជួយសម្រួលដល់ដំណើរការនៃការរំលាយអាហារ។ ជាលទ្ធផលរាងកាយនឹងអាចស្រូបយកបាននូវសារធាតុចិញ្ចឹមចាំបាច់ជាតិរ៉ែនិងវីតាមីនសំខាន់ៗពីក្នុងអាហារដែលអ្នកបានទទួលទាន។ បន្ថែមពីនេះរមៀតអាចជួយដោះស្រាយបញ្ហាផ្សេងៗពាក់ព័ន្ធនឹងការរំលាយអាហារគួរឱ្យកត់សម្គាល់តាមរយៈលក្ខណៈសម្បត្តិប្រឆាំងការរលាកនិងមេរោគដែលវាមានផ្ទុក។

៥. កាត់បន្ថយហានិភ័យនៃជំងឺបេះដូង

កត្តាចម្បងនៃជំងឺបេះដូង គឺរួមបញ្ចូលទាំងបញ្ហាកម្រិតនៃកូឡេស្តេរ៉ូលមិនល្អឡើងខ្ពស់ និងបញ្ហាសម្ពាធឈាមឡើងខ្ពស់។ ដូច្នេះក្រៅពីការធ្វើលំហាត់ប្រាណទៀងទាត់, ទទួលទានរបបអាហារសុខភាពល្អ, គ្រប់គ្រងកម្រិតនៃភាពស្ត្រេស, ឈប់ជក់បារី និងទទួលទានគ្រឿងស្រវឹងក្នុងកម្រិតមធ្យម អ្នកក៏ចាំបាច់គួររួមបញ្ចូលរមៀតក្នុងរបបអាហារផងដោយវាមានផ្ទុកលក្ខណៈសម្បត្តិទប់ស្កាត់កត្តាហានិភ័យទាំងពីរនេះ។

៦. កាត់បន្ថយហានិភ័យនៃជំងឺមហារីក

រមៀតមានផ្ទុកសម្បូរទៅដោយសារធាតុប្រឆាំងអុកស៊ីតកម្មដែលអាចជួយទប់ស្កាត់ហានិភ័យនៃជំងឺមហារីកគួរឱ្យកត់សម្គាល់ជាពិសេស គឺប្រភេទនៃជំងឺមហារីកដែលជះឥទ្ធិពលលើសុដន់ ក្រពេញប្រូស្តាត និងពោះវៀនធំ។ ការរួមបញ្ចូលរមៀត ឬម្សៅរមៀតក្នុងអាហារក៏អាចជួយទប់ស្កាត់ហានិភ័យនៃជំងឺមហារីកមាត់ស្បូនបានយ៉ាងប្រសើរផង។ នេះក៏ព្រោះតែរមៀតមានផ្ទុកសារធាតុ curcumin ដែលជួយការពារកោសិកាសុខភាពល្អមិនឱ្យក្លាយជាកោសិកាមហារីក។

៧. ព្យាបាលជំងឺបាក់ទឹកចិត្តកម្រិតស្រាល

រមៀតមិនត្រឹមតែប្រសើរសម្រាប់អ្នកដែលមានបញ្ហារលាកសន្លាក់ និងច្រាលទឹកអាស៊ីតក្រពះប៉ុណ្ណោះទេ ប៉ុន្តែក៏ល្អបំផុតសម្រាប់អ្នកមានបញ្ហាជំងឺធ្លាក់ទឹកចិត្តផងដែរ។ លក្ខណៈសម្បត្តិ​​​ប្រឆាំងការរលាកនៃតែរមៀតជួយរក្សាតុល្យភាពនៃអ័រម៉ូន ហើយក្នុងករណីមួយចំនួន ជំងឺធ្លាក់ទឹកចិត្តបណ្ដាលមកពីបញ្ហាអតុល្យភាពនៃអ័រម៉ូន។

៨. បន្សាបជាតិពុលក្នុងថ្លើម

រមៀតមានផ្ទុកសម្បូរទៅដោយសារធាតុប្រឆាំងអុកស៊ីតកម្ម ពិសេសសារធាតុ Curcumin ដែលជួយក្នុងការសម្អាតថ្លើម។ អ្នកអាចបន្ថែមរមៀតម៉ដ្ឋទៅក្នុងអាហារផ្សេងៗប្រចាំថ្ងៃដើម្បីទទួលបានសុខភាពថ្លើមល្អ។ រមៀតជួយជម្រុញឱ្យថ្លើមផលិតអង់ស៊ីមកាន់តែច្រើនដើម្បីដំណើរការប្រកបដោយប្រសិទ្ធិភាពខ្ពស់ក្នុងការកម្ចាត់កាកសំណល់និងជាតិពុលចេញពីរាងកាយ។ រមៀតក៏ដើរតួនាទីជាអ្នកសម្អាតនិងទប់ស្កាត់ការប្រមូលផ្ដុំជាតិខ្លាញ់ក្នុងថ្លើមផងដែរ។ ការទទួលទានតែរមៀតក្ដៅឧណ្ហរាល់ព្រឹកនឹងជួយបង្កើនសមត្ថភាពរបស់ថ្លើមក្នុងការដំណើរការបំបែកជាតិខ្លាញ់និងសារធាតុគីមីផ្សេងៗ ហើយកម្ចាត់ចោលសមាសធាតុដែលមិនចាំបាច់ ឬរាងកាយមិនត្រូវការ។ ដំណើរការនេះនឹងបន្សាបជាតិពុលក្នុងរាងកាយ។

៩. ពង្រឹង​ប្រព័ន្ធភាពស៊ាំរាងកាយ

លក្ខណៈសម្បត្តិប្រឆាំងការរលាកក្នុងរាងកាយនៃរមៀតអាចជួយពង្រឹងប្រព័ន្ធភាពស៊ាំរាងកាយគួរឱ្យកត់សម្គាល់។

  • ផលប៉ះពាល់នៃតែរមៀត

១. ផលប៉ះពាល់កំឡុងពេលមានផ្ទៃពោះនិងកំពុងបំបៅដោះកូន

កំឡុងពេលមានផ្ទៃពោះ តែរមៀតអាចរំញោចស្បូន ព្រមទាំងអាចជះផលប៉ះពាល់ដល់ការបំបៅដោះផងដែរ។

២. បញ្ហាប្រមាត់

រមៀតអាចធ្វើឱ្យប្រមាត់មានបញ្ហាធ្ងន់ធ្ងរ។ កុំប្រើប្រាស់វាប្រសិនបើអ្នកកំពុងមានបញ្ហាប្រមាត់ ឬក្រួសក្នុងប្រមាត់។

៣. ទឹកនោមផ្អែម

ទោះបីរមៀតអាចមានអត្ថប្រយោជន៍សម្រាប់អ្នកជំងឺទឹកនោមផ្អែម ប៉ុន្តែអ្នកចាំបាច់ត្រូវពិគ្រោះជាមួយវេជ្ជបណ្ឌិតជាមុនសិន ខណៈដែលរមៀតអាចបញ្ចុះសម្ពាធឈាមខ្លាំងចំពោះអ្នកជំងឺទឹកនោមផ្អែម។

៤. កាត់បន្ថយឱកាសនៃការមានកូន

នេះក៏ព្រោះតែរមៀតអាចបន្ថយបរិមាណនៃមេជីវិតឈ្មោល។

៥. កង្វះជាតិដែកក្នុងរាងកាយ

នេះក៏ព្រោះតែរមៀតអាចជះផលប៉ះពាល់ការស្រូបយកជាតិដែក។

៦. បញ្ហាកំឡុងពេលវះកាត់

រមៀតអាចពន្យឺតការកកឈាមដែលអ្នកចាំបាច់ត្រូវផ្អាកទទួលទានរមៀតយ៉ាងហោចណាស់ ២សប្តាហ៍មុនពេលវះកាត់៕