ការដែលយល់សុបិន្តឃើញរឿងអាក្រក់ៗគឺជារឿងគួរឲ្យភ័យខ្លាចណាស់រហូតដល់ភ្ញាក់ពីគេង ហើយបេះដូងលោតញ៉ាប់ទៀត។ មនុស្សភាគច្រើនធ្លាប់សុបិន្តអាក្រក់ម្តង ឬពីរដងក្នុងមួយជីវិត។ ប្រតិកម្មធម្មតាដែលធ្វើឲ្យអ្នកភ្ញាក់មកនៅភ័យខ្លាច ច្រើនតែមិនមែនជារឿងពិតនោះឡើយ។
សុបិន្តអាក្រក់ច្រើនតែកើតឡើងក្នុងពេលគេង ភ្នែកធ្វើចលនាលឿន (Rapid Eye Movement, REM) ឬការគេងដែលលង់លក់ខ្លាំងតែំ្តង។ យ៉ាងណាមិញ អ្នកប្រាកដជាដឹងថា អ្នកមានបញ្ហានៅពេលដែលមានសុបិន្តអាក្រក់កើតឡើងជាញឹកញ៉ាប់ ឬដដែលៗ។ ចំពោះហេតុផលនាំឲ្យមានសុបិន្តអាក្រក់មានច្រើនណាស់ ហើយក៏មិនអាចកំណត់ថាមួយណាឲ្យប្រាកដដែរ។ សំណាងដែរ មានវិធីខុសៗគ្នាច្រើនដែលអាចជួយឲ្យអ្នកចៀសផុតការសុបិន្តអាក្រក់នេះបាន។
ពិនិត្យរកមើលជំងឺណាមួយដែលជាមូលហេតុ
អ្នកអាចនឹងសុបិន្តអាក្រក់បានដោយសារតែមានបញ្ហាជំងឺដូចជា ការគេងបាត់ដង្ហើម ឬស្ពឹកជើង។ ការថប់អារម្មណ៍ បាក់ទឹកចិត្ត និងការប៉ះទង្គិចផ្លូវចិត្តក្រោយមានគ្រោះថ្នាក់ណាមួយ សុទ្ធតែជាដើមហេតុនាំឲ្យសុបិន្តអាក្រក់បានទាំងអស់។ មធ្យោបាយដ៏ល្អសម្រាប់រឿងនេះគឺត្រូវពិគ្រោះជាមួយគ្រូពេទ្យ និងកំណត់រោគវិនិច្ឆ័យថាមានជំងឺណាមួយ។ នៅពេលព្យាបាលបានជោគជ័យ សុបិន្តអាក្រក់នឹងលែងកើតមានទៀតហើយ។
កុំញ៉ាំអាហារសម្រន់មុនពេលចូលគេង
ការញ៉ាំអាហារសម្រន់មុនពេលចូលគេង វានឹងបញ្ជូនសញ្ញាទៅខួរក្បាលដើម្បីធ្វើការកាន់តែខ្លាំង ដូច្នេះវាពិតជាងាយនឹងធ្វើឲ្យមានអារម្មណ៍ ឬគិតអំពីរឿងជាច្រើនរហូតដល់ក្លាយជាសុបិន្តមិនល្អណាស់។
បន្ថយស្ត្រេស
ស្ត្រេសគឺជាបញ្ហាដ៏ចំបងមួយចំពោះខួរក្បាល ហើយថ្ងៃដែលធ្វើការពោរពេញទៅដោយភាពតានឹងពេកអាចនាំឲ្យកើតជាសុបិន្តអាក្រក់នៅពេលយប់បាន។ ដូច្នេះបើសិនជាអ្នករស់នៅពោរពេញទៅដោយភាពស្ត្រេសបែបនេះ យកល្អគួរតែដល់ពេកកាត់បន្ថយវាហើយ តាមរយៈការលោតអន្តាក់ ឬរត់កីឡា។
ពិនិត្យមើលថ្នាំដែលប្រើ
មានថ្នាំច្រើនណាស់ដែលនាំឲ្យកើតជាសុបិន្តអាក្រក់ ដូចជាថ្នាំពពួកបញ្ចុះសម្ពាធឈាម និងប្រឆាំងការរលាកតែម្តង។ ដូច្នេះករណីអ្នកប្រើថ្នាំប្រភេទនេះមែន ហើយជួបបញ្ហាគេងបែបនេះ យកល្អគួរតែពិគ្រោះជាមួយគ្រូពេទ្យដើម្បីប្តូរថ្នាំផ្សេងតែមានប្រសិទ្ធភាពព្យាបាលជំងឺដូចគ្នាវិញ។
ពង្រឹងដល់គុណភាពនៃការគេង
ការគេងមិនគ្រប់គ្រាន់ ការគេងមិនទៀងទាត់ និងអស់កម្លាំង អាចប៉ះពាល់ដល់គុណភាពនៃការគេងរហូតដល់នាំឲ្យសុបិន្តអាក្រក់ម្តងហើយម្តងទៀតបាន។ ដូច្នេះចូរចូលគេងឲ្យទៀងពេលជារៀងរាល់ថ្ងៃ និងព្យាយាមគេងឲ្យបានយ៉ាងហោចណាស់ ៧ ទៅ៨ម៉ោងជារៀងរាល់យប់។
គុណភាពនៃការគេងគឺសំខាន់សម្រាប់គុណភាពនៃជីវិតដែរ។ ដូច្នេះបើសិនជាអ្នកមានបញ្ហារំខានដោយការសុបិន្តអាក្រក់ជាទៀងទាត់នោះ ចូរព្យាយាមផ្លាស់ប្តូររបៀបរស់នៅដើម្បីប្រាកដថា អ្នកមានភាពស្ងប់ស្ងាត់ក្នុងអារម្មណ៍ និងគេងលក់ស្រួល។ សម្រាប់ការសុបិន្តអាក្រក់ជាប់រហូត យកល្អគួរតែពិគ្រោះជាមួយគ្រូពេទ្យដើម្បីរកមើលមូលហេតុរបស់វា និងព្យាបាល៕
Ads will close at
