ទោះបីជាស្គាល់និងឧស្សាហ៍ញ៊ាំ ប៉ុន្តែភាគច្រើននៃពួកយើងប្រហែលជាមិនធ្លាប់ដឹងទេថាគ្រាប់ល្ងអាចផ្ដល់អត្ថប្រយោជន៍អ្វីខ្លះចំពោះសុខភាព។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) កុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលគួររួមបញ្ចូលគ្រាប់ល្ងក្នុងរបបអាហារប្រចាំថ្ងៃ ៖
១. ព្យាបាលស្បែកស្ងួត
មិនអាចទទួលទានត្រីព្រោះហូបបួស ឬតមសាច់ ហើយក៏ញ៊ាំគ្រាប់ធញ្ញជាតិមិនបានព្រោះប្រតិកម្មអាឡែកស៊ី? កុំបារម្ភអី! អ្នកក៏នៅតែអាចទទួលបាននូវអាស៊ីតខ្លាញ់អូមេហ្កា ៣ ដើម្បីទប់ស្កាត់និងព្យាបាលអាការៈស្បែកស្ងួតបានតាមរយៈការរួមបញ្ចូលគ្រាប់ពូជដូចជាគ្រាប់ល្ងក្នុងរបបអាហារប្រចាំថ្ងៃជំនួសវិញ។ ដូច្នេះដើម្បីរក្សាសំណើមស្បែកអ្នកគួរព្យាយាមបន្ថែមគ្រាប់ល្ងក្នុងរបបអាហារប្រចាំថ្ងៃ។
២. ជួយឱ្យធ្មេញរឹងមាំនិងសជាងមុន
ការទទួលទានគ្រាប់ល្ងមិនត្រឹមតែជួយកម្ចាត់កំណកកំបោរជាប់ធ្មេញប៉ុណ្ណោះទេ ប៉ុន្តែក៏បង្កើនភាពរឹងមាំនៃកាចាធ្មេញផងដែរ។ គ្រាប់ល្ងមានផ្ទុកសម្បូរទៅដោយកាល់ស្យូមដែលចាំបាច់សម្រាប់សុខភាពឆ្អឹងជុំវិញអញ្ចាញធ្មេញនិងធ្មេញ។
៣. ជួយគ្រប់គ្រងកម្រិតនៃជាតិស្ករក្នុងឈាម
គ្រាប់ពូជរួមមានគ្រាប់ល្ង គ្រាប់ជី គ្រាប់ល្ពៅ និងគ្រាប់ផ្កាឈូករ័ត្នជាដើមក៏មានផ្ទុកសម្បូរទៅដោយអាស៊ីតខ្លាញ់អូមេហ្កា ៣ និងជាតិសសៃដែលល្អសម្រាប់អ្នកជំងឺទឹកនោមផ្អែម ឬអ្នកដែលកំពុងប្រឈមមុខខ្ពស់នឹងហានិភ័យនៃបញ្ហាសុខភាពនេះ។
៤. រក្សាតុល្យភាពអ័រម៉ូន
គ្រាប់ល្ងជាប្រភពនៃសារធាតុ lignans ដែលជួយរក្សាកម្រិតត្រឹមត្រូវនៃអ័រម៉ូន estrogen ក្នុងរាងកាយ។ ដូច្នេះកុំរួមបញ្ចូលគ្រាប់ល្ងក្នុងរបបអាហារប្រចាំថ្ងៃ។
៥. ជួយឱ្យសម្បូរទឹកដោះ
គ្រាប់ល្ងក៏ល្អសម្រាប់ជួយបង្កើនការផលិតទឹកដោះគួរឱ្យកត់សម្គាល់។ ដូច្នេះកុំភ្លេចរួមបញ្ចូលគ្រាប់ពូជនេះក្នុងរបបអាហារស្ត្រីកំពុងបំបៅដោះកូន។
៦. ជួយឱ្យឆាប់មានផ្ទៃពោះ
គ្រាប់ល្ងមានផ្ទុកសម្បូរទៅដោយអាស៊ីតខ្លាញ់អូមេហ្កា ៣ ជាតិដែក ស័ង្កសី និងវីតាមីន E ដែលចាំបាច់ដើម្បីបង្កើនឱកាសមានផ្ទៃពោះ។
៧. កាត់បន្ថយហានិភ័យនៃបញ្ហាសុខភាពជាច្រើន
គ្រាប់ល្ងមានផ្ទុកសម្បូរទៅដោយម៉ាញ៉េស្យូម កាល់ស្យូម ជាតិសសៃ ស័ង្កសី វីតាមីន b1 ជាតិដែក និងផូស្វ័រ។ គ្រាប់ពូជនេះអាចបញ្ចុះសម្ពាធឈាម និងការពារសុខភាពថ្លើម។ ការទទួលទានគ្រាប់ល្ងក៏ជួយទប់ស្កាត់ជំងឺជាច្រើនផ្សេងទៀតដូចជាជំងឺហឺត ជំងឺរលាកសន្លាក់ អស់រដូវ ឈឺក្បាលប្រកាំង និងសូម្បីតែជំងឺពុកឆ្អឹង។
៨. ព្យាបាលទប់ស្កាត់ជំងឺខ្វះគ្រាប់ឈាមក្រហម
ចំពោះគ្រាប់ល្ងខ្មៅជាប្រភពដ៏ប្រសើរនៃជាតិដែកដែលជួយបង្កើនការផលិតគ្រាប់ឈាមក្រហមក្នុងរាងកាយ។ ដូច្នេះហើយទើបគ្រាប់ល្ងខ្មៅត្រូវបានគេណែនាំសម្រាប់អ្នកជំងឺខ្វះគ្រាប់ឈាមក្រហម។
៩. សុខភាពឆ្អឹង
គ្រាប់ល្ង ជាប្រភពដ៏ប្រសើរនៃជាតិម៉ាញ៉េស្យូម, ផូស្វ័រ និងកាល់ស្យូមដែលចាំបាច់សម្រាប់រក្សាសុខភាពឆ្អឹងរឹងមាំ។
១០. សុខភាពបេះដូង
ក៏ព្រោះតែបរិមាណខ្ពស់នៃសារធាតុ sesamolin និង sesamin ដែលមានផ្ទុក គ្រាប់ល្ងជួយកាត់បន្ថយកម្រិតនៃកូឡេស្តេរ៉ូលបានយ៉ាងប្រសើរ។ លើសពីនេះទៅទៀត ល្ងខ្មៅ ក៏មានផ្ទុកជាតិម៉ាញ៉េស្យូមដែលជួយបញ្ចុះសម្ពាធឈាមផងដែរ។ សម្ពាធឈាមធម្មតា រួមជាមួយកម្រិតកូឡេស្តេរ៉ូលប្រក្រតីនឹងធ្វើឱ្យអ្នកជៀសផុតពីបញ្ហាបេះដូងផ្សេងៗគួរឱ្យកត់សម្គាល់។
១១. ទប់ស្កាត់ជំងឺហឺត
បរិមាណនៃជាតិម៉ាញ៉េស្យូមក្នុងគ្រាប់ល្ងខ្មៅជួយទប់ស្កាត់ការកន្ត្រាក់សាច់ដុំផ្លូវដង្ហើមចំពោះអ្នកជំងឺហឺត។
១២. ទប់ស្កាត់ជំងឺមហារីក
គ្រាប់ល្ងមានផ្ទុកសម្បូរទៅដោយសារធាតុ phytosterols, អាស៊ីត phytic និងម៉ាញ៉េស្យូម ដែលជួយទប់ស្កាត់ប្រយុទ្ធប្រឆាំងជំងឺមហារីកបានយ៉ាងប្រសើរ៕