ធ្មេញថ្គាមទាល់ គឺអាចបង្កការឈឺចាប់គួរឲ្យរំខាន។ ជាធម្មតាថ្គាមទាល់លេចឡើងនៅចន្លោះវ័យពី ១៨ ដល់ ២៥ ឆ្នាំ។ (អាន ៖ ឈប់ខ្វល់រឿងដេកមិនលក់ នៅពេលដឹងរឿងទាំងនេះ) ថ្គាមទាល់ដែលដុះចេញពាក់កណ្តាល បង្កឱ្យមានបញ្ហាមួយចំនួនដូចជា ឈឺចាប់ខ្លាំងក្នុងអំឡុងពេលកំពុងដុះ ឈឺអញ្ចាញ និងឈឺធ្មេញដែលរងការដុះបុកពីថ្គាមទាល់ និងរុញធ្មេញដទៃទៀត ឱ្យចង្អៀតណែន រងការឈឺចាប់បំផុត។ ប៉ុន្តែកុំបារម្ភ! ថ្ងៃនេះវេបសាយសុខភាពHealth.com.kh នឹងបង្ហាញឲ្យដឹងពីរូបមន្តបែបធម្មជាតិងាយៗ ដើម្បីសម្រាល ក៏ដូចជាបំបាត់អាការៈឈឺចាប់ដោយសារធ្មេញថ្គាមទាល់ ៖
១. ទឹកអំបិលក្ដៅឧណ្ហៗ
អំបិល គឺជាសម្លាប់មេរោគបែបធម្មជាតិ។ ចូរលាយអំបិលក្នុងទឹកក្ដៅឧណ្ហៗ និងខ្ពុរលាងសម្អាតមាត់របស់អ្នកជាមួយទឹកល្បាយនេះសម្រាប់រយៈពេលប៉ុន្មាននាទី។ វិធីនេះជួយបំបាត់ការឈឺធ្មេញភ្លាមៗប្រកបដោយប្រសិទ្ធិភាព។ កុំភ្លេចអនុវត្តឲ្យបានពី ៤ ទៅ ៥ ដង ក្នុងមួយថ្ងៃ។
២. ម្ស៉ៅ Baking soda
ជាធម្មតា ការហើម គឺជាអាការៈមួយដែលតែងលេចឡើងអមជាមួយនឹងការដុះធ្មេញថ្គាមទាល់។ ទោះជាយ៉ាងណា ម្ស៉ៅ Baking soda អាចដោះស្រាយបញ្ហានេះបានយ៉ាងប្រសើរ។ អ្វីដែលអ្នកត្រូវធ្វើ គឺគ្រាន់តែបន្ថែមម្ស៉ៅ Baking soda លើថ្នាំដុសធ្មេញដែលអ្នកប្រើជាប្រចាំ រួចលាបវាលើធ្មេញថ្គាមទាល់ដោយផ្ទាល់តែម្ដង។ វិធីនេះជួយបំបាត់ការឈឺចាប់បានយ៉ាងឆាប់រហ័ស។
៣. ស្អំទឹកកក
អ្វីដែលអ្នកត្រូវធ្វើ គឺគ្រាន់តែយកកញ្ចប់ទឹកកកមកស្អំនៅថ្ពាល់ខាងឈឺ។ ស្អំសម្រាប់រយៈពេល ១៥ នាទី រួចឈប់ ១៥ នាទី សឹមស្អំវិញម្ដងទៀតឲ្យបាន ៣ ទៅ ៤ ដងក្នុងមួយថ្ងៃ នៅពេលអ្នកមានអារម្មណ៍ថាឈឺចាប់។ រូបមន្តនេះជួយបំបាត់ការរលាក និងការហើម។
៤. ខ្ពុរមាត់ជាមួយទឹករមៀត
រមៀត មានផ្ទុកលក្ខណៈសម្បត្តិសម្លាប់មេរោគបាក់តេរី និងព្យាបាល ដូច្នេះហើយទើបវាត្រូវបានគេយកមកប្រើប្រាស់ដើម្បីដោះស្រាយបញ្ហាឈឺធ្មេញថ្គាមទាល់។ អ្វីដែលអ្នកត្រូវធ្វើ គឺគ្រាន់តែបន្ថែមម្ស៉ៅរមៀតប៉ុន្មានចិបក្នុងទឹកធម្មតា ហើយខ្ពុរមាត់ជាមួយទឹកល្បាយនេះ។
៥. ខ្ទឹមបារាំង
ខ្ទឹមបារាំង អាចជួយព្យាបាលបំបាត់អាការៈឈឺធ្មេញបានយ៉ាងគួរឲ្យភ្ញាក់ផ្អើល។ អ្វីដែលអ្នកត្រូវធ្វើ គឺគ្រាន់តែកាត់ខ្ទឹមបារាំងទំហំសមល្មមនឹងដាក់ចូលក្នុងមាត់ត្រង់លើតំបន់ធ្មេញដែលឈឺចាប់ជាការស្រេច៕