ក្រៅពីទទួលទានទឹកយ៉ាងហោចណាស់ ២ លីត្រក្នុងមួយថ្ងៃហើយនោះ ការជ្រើសរើសអាហារបានត្រឹមត្រូវក៏ចាំបាច់ណាស់ដែរដើម្បីដោះស្រាយបញ្ហាស្បែកស្ងួត។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើអាហារអ្វីខ្លះទៅដែលអ្នកគួរទទួលទានជាប្រចាំដើម្បីរក្សាសំណើមនៃស្បែក? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលអាចជួយដោះស្រាយបញ្ហាស្បែកស្ងួត ៖
១. ត្រីសម្បូរខ្លាញ់
ចូរបន្ថែមប្រភេទត្រីសម្បូរខ្លាញ់ក្នុងរបបអាហារប្រចាំថ្ងៃរបស់អ្នកអោយបានទៀងទាត់។ ត្រីសាលម៉ុន ត្រីសាឌីន និងត្រីធូណាជាដើម គឺសុទ្ធតែជាប្រភេទត្រីដែលមានផ្ទុកសម្បូរទៅដោយជាតិខ្លាញ់សុខភាពល្អជួយផ្ដល់សំណើមដល់ស្បែក និងប្រសើរសម្រាប់សុខភាពបេះដូង។
២. គ្រាប់ធញ្ញជាតិ
ជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ ដែលប្រសើរសម្រាប់សុខភាពស្បែកជួយទប់ស្កាត់បញ្ហានៃភាពស្ងួត។ ដូច្នេះដើម្បីរក្សាជាតិសំណើមនៃស្បែក អ្វីដែលអ្នកត្រូវធ្វើ គឺគ្រាន់តែទទួលទានគ្រាប់ធញ្ញជាតិមួយក្ដាប់ដៃពេញក្នុងមួយថ្ងៃ។
៣. គ្រាប់ពូជ
មិនអាចទទួលទានត្រីព្រោះហូបបួស ឬតមសាច់ ហើយក៏ញ៊ាំគ្រាប់ធញ្ញជាតិមិនបានព្រោះប្រតិកម្មអាឡែកស៊ី? កុំបារម្ភអី! អ្នកក៏នៅតែអាចទទួលបាននូវអាស៊ីតខ្លាញ់អូមេហ្កា ៣ ដើម្បីទប់ស្កាត់និងព្យាបាលអាការៈស្បែកស្ងួតបានតាមរយៈការរួមបញ្ចូលគ្រាប់ពូជក្នុងរបបអាហារប្រចាំថ្ងៃជំនួសវិញ។ ដូច្នេះដើម្បីរក្សាសំណើមស្បែកអ្នកគួរព្យាយាមបន្ថែមគ្រាប់ផ្កាឈូករ័ត្ន គ្រាប់ល្ពៅ ឬគ្រាប់ល្ងក្នុងរបបអាហារប្រចាំថ្ងៃ។
៤. ផ្លែបឺរ
ដើម្បីរក្សាបាននូវស្បែកដែលមានសុខភាពល្អ ក្មេងជាងវ័យ និងស្រស់ស្អាត អ្នកគួរទទួលទានផ្លែបឺរជាប្រចាំនោះក៏ព្រោះតែផ្លែឈើនេះជាប្រភពដ៏ល្អបំផុតមួយនៃជាតិខ្លាញ់សុខភាពល្អអូមេហ្កា ៣ និងវីតាមីន E។
៥. ត្រសក់
ជាប្រភពដ៏ប្រសើរនៃជាតិទឹកនិងវីតាមីន C ដែលចាំបាច់សម្រាប់ការផលិតកូឡាជែនជួយរក្សាសុខភាពស្បែកនិងផ្ដល់សំណើម។ ដូច្នេះអ្នកដែលមានបញ្ហាស្បែកស្ងួត ចូរព្យាយាមទទួលទានត្រសក់ជាប្រចាំ៕