យោងទៅតាមការស្រាវជ្រាវថ្មីនៅប្រទេសអង់គ្លេសបានបង្ហាញថា ជាមធ្យមជនជាតិអង់គ្លេសដែលមានសុខភាពល្អបំផុត គឺនៅអាយុ៣០ឆ្នាំ មានទ្រព្យធនច្រើននៅអាយុ៤៧ឆ្នាំ និងមានទំនាក់ទំនងផ្លូវភេទបានស៊ីជម្រៅនៅអាយុ៣២ឆ្នាំ ។
ទិន្នន័យនេះបានមកពីការស្ទង់មតិទៅលើបុរស និងស្ត្រីជនជាតិអង់គ្លេសចំនួន២០០០នាក់ ដោយបាន រកឃើញផងដែរថាពួកគេមានភាពរីករាយក្នុងជីវិតបំផុតនៅពេលឈានចូលដល់អាយុ៣៩ឆ្នាំ ព្រោះថាដំណាក់កាលនេះគេអាចគេអាចមានផ្ទះរស់នៅផ្ទាល់ខ្លួន មានលំនឹងហិរញ្ញវត្ថុក្នុងគ្រួសារ។ ការស្ទង់មតិនេះក៏បានបង្ហាញថាពូកគេមានទំនុកចិត្តលើខ្លួនឯងបំផុតនៅអាយុ៣០ឆ្នាំ ហើយរំពឹងថាគេនឹងអាចសម្រេចបានគោលដៅក្នុងអាជីពនៅអាយុ៣៨ឆ្នាំ។
បើក្រឡេកមកមើលពីយុវវ័យវិញ ការសិក្សានេះក៏បានរកឃើញទៀតថាមនុស្សភាគច្រើនចូលចិត្តនៅទំនេរ ទុកជីវិតឲ្យនៅលីវមានសេរីភាពរហូតដល់អាយុ២៤ឆ្នាំ ដោយក្នុងនោះជាមធ្យមស្ត្រីតែងចង់នៅម្នាក់ឯងរហូតដល់អាយុ២៣ឆ្នាំ ឯបុរសវិញពន្យាដល់អាយុ២៥ឆ្នាំ ទើបនឹកនាចង់បង្កើតគ្រួសារដោយខ្លួនឯង ។
ចិត្តវិទូ Donna Dawson បាននិយាយថា “ពិតជាគួរឲ្យចាប់អារម្មណ៍ណាស់ ដែលការស្រាវជ្រាវបានបញ្ជាក់បង្ហាញ ពីចំណុចកំពូលនៃជីវិតនៅពេលយើងមានអាយុខ្ទង់៣០ឆ្នាំ ។ នេះដោយសារយើងមានមូលដ្ឋានគ្រឹះនៃជីវិតពីពេលមុនមក ។ ក្នុងខ្ទង់អាយុ២០ឆ្នាំ យើងបានបញ្ចប់ការសិក្សានៅសាកលវិទ្យាល័យ បន្ទាប់មកក៏ចាប់ផ្តើមបំពេញការងារ លុះបន្តិចមកទៀតយើងក៏ចាប់ផ្តើមកសាងគ្រួសារ ហើយក្នុងកាល:ទេស:នេះហើយ ដែលយើងបានសិក្សាស្វែងយល់ និងទទួលបានបទពិសោធជីវិតជាច្រើន មានទាំងកំហុស មានទាំងសមិទ្ធផលសម្រេចបាន ព្រមទាំងមហិច្ឆតា នៅពេលអនាគត ។ “
នៅពេលសូរថាតើចង់ឲ្យទំនើបកម្មនៃវិទ្យាសាស្ត្របច្ចុប្បន្នជូយពួកគេឲ្យបានរស់នៅរហូតឬទេ ពេលនោះមានតែមនុស្ស១ភាគ៤ តែប៉ុណ្ណោះដែលចង់វិទ្យាសាស្ត្របច្ចុប្បន្នជូយឲ្យពួកគេឲ្យបានរស់នៅរហូត ក្រៅពីនេះគឺគេចង់រស់នៅធម្មតា តាមសភាពលក្ខណ:នៃធម្មជាតិ ។
ទោះជាយ៉ាងណាក៏ដោយ វាគ្មានអ្វីគួរឲ្យភ្ញាក់ផ្អើលទេដែលមនុស្សមិនយើងមិនប្រាថ្នាចង់បានជីវិតអមត:នោះ ។ ប្រសិនបើយើងមិនអាចឃាត់ឲ្យចំណុចកំពូលនៃក្តីសុខក្នុងជីវិតរសាត់បាត់ទៅតាមពេលវេលាទេ គឺមានតែបណ្តោយ និងសម្របខ្លួនទៅតាមដំណាក់កាលនីមួយនៃជីវិត ។ ក្នុងនោះផងដែរវានឹងលេចឡើងនូវហេតុការណ៍អ្វីៗផ្សេងទៀតដែលគ្រប់គ្នាតែងប្រឈម ដោយរួមទាំងបញ្ហាសុខភាព ភាពទ្រុឌទ្រោមតាមអាយុកាល ការងារដល់ពេលចូលនិវត្ត និងទ្រព្យសម្បត្តិក៏នឹងរលោះទៅតាមហ្នឹងដែរ ។
ជាចុងក្រោយយើងត្រូវដឹងថាគ្មានអ្វីដែលនៅស្ថិតស្ថេររហូតនោះទេ ហើយយើងក៏គ្មានសមត្ថភាពនឹងរារាំងពេលវេលា និងអាយុកាលរបស់យើងមិនឲ្យរសាត់ទៅមុខនោះទេ ព្រោះនេះជាធម្មជាតិដែលបានកំណត់ តែមានរឿងមូយដែលយើងអាចកំណត់បាននោះគឺការតម្រង់គោលដៅ និងរៀបចំដំណើរជីវិតឲ្យបានប្រសើរ យ៉ាងហោចណាស់ក៏បានសម្រេចបំណងក្នុងមួយជីវីត ព្រមទាំងបានស្គាល់រសជាតិសេចក្តីសុខកំពូលក្នុងមូយជីវិត ៕