វីតាមីន D គឺចាំបាច់ណាស់សម្រាប់សុខភាពរាងកាយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) សារធាតុចិញ្ចឹមនេះ គឺសំខាន់សម្រាប់មុខងារប្រព័ន្ធភាពស៊ាំ ពង្រឹងសុខភាពឆ្អឹង និងទប់ស្កាត់ការរលាក។ មួយក្នុងចំណោមវិធីដ៏ល្អបំផុតដើម្បីទទួលបានវីតាមីន D គឺការដាក់ឱ្យស្បែកត្រូវពន្លឺព្រះអាទិត្យ។ ទោះជាយ៉ាងណាការរួមបញ្ចូលអាហារមានផ្ទុកសម្បូរទៅដោយវីតាមីន D ក្នុងរបបអាហារប្រចាំថ្ងៃក៏ជាអ្វីដែលអ្នកគួរធ្វើផងដែរ។ ប៉ុន្តែថាតើអាហារអ្វីខ្លះទៅមានផ្ទុកសម្បូរទៅដោយវីតាមីន D ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាការៈនៃកង្វះវីតាមីន D ព្រមជាមួយនូវប្រភពដ៏ប្រសើរនៃវីតាមីននេះ៖
- អាការៈនៃកង្វះវីតាមីន D
១. បែកញើសក្បាលខ្លាំង
មួយក្នុងចំណោមរោគសញ្ញាទូទៅបំផុតនៃកង្វះវីតាមីន D គឺបែកញើសក្បាលខ្លាំងជាងផ្នែកផ្សេងៗនៃរាងកាយ។ ដូច្នេះប្រសិនបើអ្នកបែកញើសក្បាលច្រើនខុសធម្មតានោះប្រហែលជាទាក់ទងនឹងបញ្ហាខ្វះវីតាមីន D ក្នុងរាងកាយហើយ។ ដើម្បីជាការប្រសើរចូរកុំស្ទាក់ស្ទើនឹងជួបពិគ្រោះជាមួយគ្រូពេទ្យ។
២. ឈឺឆ្អឹង
កង្វះវីតាមីន D ជះផលប៉ះពាល់ដល់សមត្ថភាពរាងកាយក្នុងការស្រូបយក ក៏ដូចជាការផ្ដល់ជាតិកាល់ស្យូមដល់ជាលិកាឆ្អឹងដែលបណ្ដាលឱ្យកើតមានបញ្ហាឆ្អឹងផ្សេងៗ រួមបញ្ចូលទាំងអាការៈឈឺចាប់ និងសូម្បីតែជំងឺពុកឆ្អឹង។
៣. ឈឺសាច់ដុំ
វីតាមីន D មិនត្រឹមតែជះឥទ្ធិពលគួរឱ្យព្រួយបារម្ភលើឆ្អឹងប៉ុណ្ណោះទេ ប៉ុន្តែក៏ចំពោះសុខភាពសាច់ដុំផងដែរ។ កង្វះវីតាមីននេះអាចបង្កបញ្ហាឈឺចាប់ដុំធ្ងន់ធ្ងរ ខ្សោយសាច់ដុំ ម៉ាសសាច់ដុំថយចុះ។ កង្វះវីតាមីន D ថែមទាំងអាចបង្កអាការៈឈឺចាប់រ៉ាំរ់ៃពេញក្នុងរាងកាយទៀតផង។
៤. ប្រព័ន្ធភាពស៊ាំចុះខ្សោយ
វីតាមីន D ក៏ដើរតួនាទីយ៉ាងសំខាន់ជួយពង្រឹងប្រព័ន្ធភាពស៊ាំរាងកាយផងដែរ។ ដូច្នេះប្រសិនបើអ្នកងាយនឹងឈឺ ឬឆ្លងមេរោគញឹកញាប់ដូចជាផ្ដាសាយនោះកង្វះវីតាមីន D ក្នុងរាងកាយអាចជាមូលហេតុហើយ។
៥. ឆាប់អស់កម្លាំង និងខ្សោយ
កង្វះវីតាមីន D ក្នុងរាងកាយក៏អាចជាប់ពាក់ព័ន្ធនឹងបញ្ហាឆាប់អស់កម្លាំងផងដែរ។ នេះក៏ព្រោះតែរោគសញ្ញាមួយនៃបញ្ហាឆាប់អស់កម្លាំងទាំងដែលបានគេងគ្រប់គ្រាន់ និងមិនបានធ្វើអ្វីច្រើនសោះ គឺកង្វះវីតាមីន D។
៦. ជ្រុះសក់
កម្រិតនៃវីតាមីន D ទាបពេកក្នុងរាងកាយអាចបណ្ដាលឱ្យកើតមានបញ្ហាជ្រុះសក់។ នោះក៏ព្រោះតែវីតាមីន D ជួយសម្រួលដល់ដំណើរការលូតលាស់នៃសក់ ក៏ដូចជារក្សាសុខភាពសក់រឹងមាំ។
៧. របួសយូរជាសះស្បើយ
វីតាមីន D មានឥទ្ធិពលវិជ្ជមានលើការរក្សាស្ថេរភាពនៃកម្រិតគ្លុយកូសក្នុងឈាម ព្រមទាំងកម្រិតនៃកូឡេស្តេរ៉ូល។ ប្រសិនបើរបួសអ្នកយូរជាសះស្បើយ (ជាពិសេសប្រសិនបើអ្នកមានជំងឺទឹកនោមផ្អែម) ចូរផ្ដោតការយកចិត្តទុកដាក់លើកម្រិតនៃវីតាមីននេះក្នុងរាងកាយ។
៨. ថប់បារម្ភនិងធ្លាក់ទឹកចិត្ត ( Depression)
វីតាមីន D ជាវីតាមីនមួយប្រភេទដែលមានឥទ្ធិពលលើផ្នែកផ្សេងៗជាច្រើននៃរាងកាយ រួមបញ្ចូលទាំងខួរក្បាល។ ក្រោយពេលវីតាមីននេះត្រូវបានជ្រាបចូលក្នុងរាងកាយដោយអាហារ ឬការសំយោគចូលតាមរយៈស្បែក នោះវានឹងបញ្ចេញអ័រម៉ូនរីករាយ dopamine និង serotonin ដែលមានឥទ្ធិពលលើដំណើរការមុខងារនៃខួរក្បាល។ យោងតាមការសិក្សាស្រាវជ្រាវជាច្រើនបានឱ្យដឹងថា កង្វះវីតាមីន D អាចបង្កជាជំងឺថប់បារម្ភ ធ្លាក់ទឹកចិត្ត (Depression) និងបញ្ហានៃជំងឺផ្លូវចិត្តផ្សេងទៀត។
- អាហារដែលមានផ្ទុកសម្បូរទៅដោយវីតាមីន D
១. ផ្សិត
ក្រៅពីមានផ្ទុកសម្បូរទៅដោយវីតាមីន D ហើយនោះ ផ្សិតក៏ជាប្រភពដ៏ល្អបំផុតមួយនៃវីតាមីនក្រុម B ដូចជាវីតាមីន B1 វីតាមីន B2 វីតាមីន B5 និងជាតិរ៉ែដូចជាទង់ដែង។
២. ត្រីសាលម៉ុន
ការទទួលទានត្រីសាលម៉ុនផ្ដល់ឱ្យរាងកាយនូវវីតាមីន D ច្រើនដល់ទៅ ២២៧ ភាគរយនៃតម្រូវការប្រចាំថ្ងៃ។ អ្វីដែលកាន់តែប្រសើរទៀតនោះ គឺត្រីសាលម៉ុនជាប្រភពដ៏ប្រសើរនៃប្រូតេអ៊ីននិងអាស៊ីតខ្លាញ់អូមេហ្កា ៣ ដែលល្អណាស់សម្រាប់សុខភាពសាច់ដុំ ខួរក្បាល និងបេះដូង។
៣. ត្រីសាឌីន
ត្រី ១០០ ក្រាមនៃត្រីសាឌីនអាចផ្ដល់ឱ្យរាងកាយនូវវីតាមីន D ចាំបាច់ប្រចាំថ្ងៃដល់ទៅ ១២០ ភាគរយ។ ហើយក៏ដូចនឹងត្រីសាលម៉ុនដែរ ត្រីសាឌីនក៏មានផ្ទុកសម្បូរទៅដោយប្រូតេអ៊ីននិងអាស៊ីតខ្លាញ់អូមេហ្កា ៣ ។ ការទទួលទានត្រីសាឌីនកំប៉ុងអាចផ្ដល់កាល់ស្យូមបន្ថែមដល់រាងកាយកាត់បន្ថយហានិភ័យនៃជំងឺពុកឆ្អឹង។
៤. ថ្លើមគោ
ថ្លើមគោក៏ជាប្រភពដ៏ប្រសើរនៃវីតាមីន D ផងដែរ។ បន្ថែមពីនេះវាថែមទាំងមានផ្ទុកសម្បូរទៅដោយវីតាមីន B12 ជាតិដែក និងប្រូតេអ៊ីនគួរឱ្យកត់សម្គាល់។ សត្វគោស៊ីស្មៅ គឺជាជម្រើសនៃសាច់ដ៏ល្អបំផុតសម្រាប់យកមកទទួលទានដោយវាមានផ្ទុកសម្បូរទៅដោយសារធាតុចិញ្ចឹមចាំបាច់ជាច្រើន។
៥. អ័យស្ទរ
ក្រៅពីជាប្រភពដ៏ប្រសើរបំផុតមួយនៃវីតាមីន D ហើយនោះ អាហារសមុទ្រនេះក៏មានផ្ទុកសម្បូរទៅដោយជាតិដែកដែលជួយផលិតកោសិកាគ្រាប់ឈាមក្រហម ព្រមទាំងម៉ាញ៉េស្យូមដែលល្អសម្រាប់សសៃប្រសាទនិងសាច់ដុំផងដែរ៕