សភាពនៃស្ត្រេស អាចនឹងជះឥទ្ធិពល ដោយការធ្វើអោយយើងម្នាក់ៗ មានការអស់កម្លាំងផ្នែក ផ្លូវកាយ និង ផ្លូវចិត្ត។ តើអ្នកធ្លាប់ជួបបញ្ហានេះ ពីមុនមកដែរឬទេ ? សូមពិនិត្យមើល នូវរោគសញ្ញា ជាទូទៅទាំង ៥យ៉ាងនេះ ដែលអាចនឹងប្រាប់អ្នកបានថា អ្នកកំពុងតែមានស្ត្រេស ។
១. អ្នកតែងតែពឹងពាក់ទៅលើភេសជ្ជៈផ្តល់ថាមពល
តើរាងកាយអ្នក មានដែរបដិសេធនឹងការធ្វើការងារទេ ប្រសិនបើអ្នកមិនបាន ផឹកកាហ្វេខ្មៅ, គោជល់ ឬ ប្រភេទភេសជ្ជៈ ផ្តល់ថាមពលផ្សេងៗដទៃទៀតនោះ ? ប្រសិនបើអ្នកបានងក់ក្បាល យល់ ស្របនឹងទង្វើដូចនេះ នោះវាអាចជាសញ្ញាដ៏សំខាន់មួយ ដែលអាចបញ្ជាក់បានថា រាងកាយអ្នក កំពុងតែ មានស្ត្រេសហើយ។ ប្រភេទភេសជ្ជៈផ្តល់ថាមពលទាំងនេះ មានផ្ទុកនូវ កម្រិតសារជាតិកាកូអ៊ីនដ៏ខ្ពស់ ដែលវានឹង អាចជម្រុញថាមពលដល់រាងកាយអ្នក បានភ្លាមៗ ។ នេះគឺជាសញ្ញាដ៏ច្បាស់មួយ ដែលអាច បញ្ជាក់បានថាអ្នកកំពុងតែមានស្ត្រេស ពីព្រោះថា រាងកាយដែលមានសុខភាពល្អ គឺមិនចាំបាច់ពឹងផ្អែក ទៅលើភេសជ្ជៈទាំងនេះ នោះទេ។
២. អ្នកមានអារម្មណ៍ថាអស់កម្លាំង មួយថ្ងៃពេញ
តើអ្នកមានអារម្មណ៍ថាទន់ខ្សោយ និង អស់កម្លាំងស្ទើរតែរាល់ពេល មែនដែរឬទេ? យើងអាចដឹងបាន ថាអ្នក នឹងមានអារម្មណ៍ថាអស់កម្លាំង ប្រសិនបើអ្នកមិនបានគេងបានគ្រប់គ្រាន់ កាលពីយប់ម្សិលមិញ ប៉ុន្តែការមានអារម្មណ៍ថាអស់កម្លាំង បើទោះជាអ្នកបាន ក្រោកពីដំណេកដ៏ល្អមួយហើយនោះ នេះវាអាច ជាសញ្ញា ដែលបង្ហាញថា ខ្លួនប្រាណអ្នក កំពុងតែបន្តមានស្ត្រេសហើយ ។ ស្ត្រីជាច្រើន ជារឿយៗ តែងមាននូវ អារម្មណ៍បែបនេះ ក្នុងរយៈពេលដ៏យូរ ឬ មិនដែលឈប់ឈរ ដែលវានឹងអាចធ្វើអោយពួកគេ មានអារម្មណ៍ថា អស់កម្លាំងទាំងផ្លូវកាយ និង ផ្លូវចិត្ត ។
៣. អ្នកប្រឈមនឹងភាពធ្វេសប្រហែស និង មិនសូវមានការប្រមូលផ្តុំអារម្មណ៍បានល្អ
យើងអាចនឹកឃើញបានថា ស្ត្រីជាច្រើន ជាធម្មតា គឺមិនមែនជាមនុស្សដែលក្រោកពីព្រលឹម និង អាច មានភាពពិបាក ក្នុងការប្រុងស្មារតី និង មានភាពស្វាហាប់បានល្អ នៅក្នុងពេលព្រឹកនោះទេ។ ប៉ុន្តែប្រសិន បើអ្នក មិនអាចប្រមូលអារម្មណ៍ ឬ ផ្តោតការយកចិត្តទុកដាក់ បានល្អ បើទោះជានៅក្នុងពេលថ្ងៃក៏ដោយ នោះវា ក៏អាចជាសញ្ញា ដែលប្រាប់បានថា អ្នកកំពុងតែមានស្ត្រេស ។
៤. មានភាពពិបាក ក្នុងការជាសះស្បើយពីជំងឺ ឬ ការរងរបួសអ្វីមួយ
សញ្ញាផ្សេងម្យ៉ាងទៀត ដែលអាចប្រាប់បានថា រាងកាយអ្នកមានស្ត្រេស ប្រសិនបើអ្នកបានចំណាយ ពេលយូរជាង ស្ត្រីធម្មតា ក្នុងការជាសះស្បើយបានជំងឺ ឬ ការរងរបួសអ្វីមួយនោះ ។ការចំណាយពេល ដល់ជាច្រើនសប្តាហ៍ ក្នុងការធូរស្រាលបាន ពីជំងឺផ្តាសាយ, ឈឺក្បាលជាញឹកញាប់, គ្រុនក្តៅមិន ឈប់ឈរ ។ល។ គឺសុទ្ធតែជាសញ្ញាដែលអ្នកត្រូវតាមដាន រកពីមូលហេតុពិតប្រាកដ។ ប្រសិនបើ រាងកាយអ្នក កំពុងមានស្ត្រេស នោះវានឹងមិនមានដំណើរការ បានល្អបំផុតទេ ហើយវានឹងធ្វើអោយអ្នក ពិបាក នឹងជាសះស្បើយពីជំងឺបានយ៉ាងងាយ ។
៥. អ្នកតែងតែធ្វើការងារហើយ ក្រោយគេ
ប្រសិនបើអ្នកតែងតែមានបញ្ហា ជាមួយនឹងការបញ្ចប់កិច្ចការងារ អោយទាន់ពេលវេលា ដូចអ្វីដែល បាន កំណត់ នោះអ្នកមិនចាំបាច់មានការភ័យព្រួយខ្លាំងពេកនោះទេ ដោយសារតែវាអាចនឹង មិនមែន ជាសញ្ញា នៃស្ត្រេស។ តែទោះជាយ៉ាងណាក៏ដោយ ប្រសិនបើអ្នកកំពុងតែមានភាពពិបាក ក្នុងការបន្ត ធ្វើកិច្ចការងារផ្ទះ, តម្រូវការចាំបាច់ប្រចាំខ្លួន ឬ សម្រាប់ក្រុមគ្រួសារ និង ទម្លាប់ផ្សេងៗទៀត នៅក្នុងជីវិត នោះ អ្នកចាំបាច់ត្រូវ តែធ្វើការពិចារណានូវ បញ្ហានៃស្ត្រេសនេះ អោយបានច្បាស់លាស់ឡើងវិញ ។សញ្ញានៃ ការធ្លាក់ចុះ នៃលទ្ធផលការងារ ជាទីគាប់ចិត្ត អាចជាសញ្ញាដែលប្រាប់បានថា រាងកាយអ្នកកំពុងតែមានស្ត្រេសហើយ។
ទាំងនេះ គ្រាន់តែជាសញ្ញានៃស្ត្រេស មួយចំនួនដែលមានលើរាងកាយប៉ុណ្ណោះ ។ ប្រសិនបើអ្នក ជួបប្រទះនឹង បញ្ហាទាំងនេះ នោះអ្នកគប្បីស្វែងរកសេវាកម្មផ្នែកវេជ្ជសាស្ត្រ អោយបានឆាប់តាមដែល អាចធ្វើបាន ដើម្បីបំបាត់នូវបញ្ហាស្ត្រេស។ នោះអ្នក នឹងក្លាយជាមនុស្សម្នាក់ដែលមានភាព រីករាយ ជាងមុនបាន ៕