កំពុងមានបញ្ហាមុនខ្នងពិបាកកម្ចាត់ណាស់មែនទេ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ឈប់បារម្ភទៀតទៅ! ក៏ព្រោះមានវិធីងាយៗបែបធម្មជាតិមួយចំនួនអាចជួយអ្នកបានប្រកបដោយប្រសិទ្ធិភាពខ្ពស់។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិកម្ចាត់មុនខ្នងបានយ៉ាងឆាប់រហ័ស ៖
១. ម្សៅ Baking soda
អ្វីដែលអ្នកត្រូវធ្វើ គឺគ្រាន់តែលាយម្សៅ Baking soda ១ស្លាបព្រាបាយជាមួយទឹកធម្មតាឱ្យក្លាយជាល្បាយខាប់ៗ។ បន្ទាប់មកសឹមលាបល្បាយលើខ្នងកន្លែងដែលមានមុន។ រងចាំសម្រាប់រយៈពេលយ៉ាងហោចណាស់ ២០នាទី សឹមលាងសម្អាតចេញ ដោយព្យាយាមដុសខាត់ថ្នមៗផង។ អនុវត្តឱ្យបានពី ២ ទៅ ៣ដងជាប្រចាំ។
២. ទឹកខ្មេះផ្លែប៉ោម
លាយទឹកខ្មេះផ្លែប៉ោម ២ ស្លាបព្រាបាយក្នុងទឹកធម្មតា ១ កែវ។ កូរឱ្យសព្វ សឹមទទួលទានរាល់ថ្ងៃ។ ក្រៅពីទទួលទាន អ្នកក៏អាចលាបទឹកខ្មេះផ្លែប៉ោមលើមុនខ្នងផងដែរ។ ប្រសិនបើអ្នកមានស្បែកឆាប់ប្រតិកម្ម ចូរកុំភ្លេចលាយទឹកខ្មេះផ្លែប៉ោមជាមួយទឹក។
៣. ស្លឹកជីអង្កាម
កិនស្លឹកជីអង្កាមប៉ុន្មានសន្លឹកឱ្យម៉ដ្ឋខាប់ៗ សឹមលាបល្បាយលើមុនខ្នង និងរងចាំសម្រាប់រយៈពេល ១៥ នាទី។ លាងសម្អាតចេញជាមួយទឹកធម្មតា។ អនុវត្តឱ្យបានពី ២ ទៅ ៣ ដងក្នុងមួយថ្ងៃ។
៤. ទឹកក្រូចឆ្មារ
អ្វីដែលអ្នកត្រូវធ្វើ គឺគ្រាន់តែលាបទឹកក្រូចឆ្មារស្រស់លើកន្លែងដែលទទួលរងផលប៉ះពាល់ដោយសារមុននិងទុកចោលសម្រាប់រយៈពេលពី ១ ទៅ ២ ម៉ោងសឹមលាងសម្អាតចេញជាមួយទឹកក្ដៅឧណ្ហៗជាការស្រេច។
៥. តែបៃតង
អ្វីដែលអ្នកត្រូវធ្វើ គឺគ្រាន់តែប្រើប្រាស់សំឡីមួយដុំជ្រលក់ក្នុងទឹកតែបៃតងក្ដៅឧណ្ហៗ រួចលាបលើមុន ហើយទុកចោលរហូតដល់ស្ងួតសឹមលាងសម្អាតចេញជាមួយទឹកធម្មតាជាការស្រេច។
៦. ប៉េងប៉ោះ
ដុសសាច់នៃផ្លែប៉េងប៉ោះលើមុនខ្នងនិងទុកសម្រាប់រយៈពេល ១៥ នាទី សឹមលាងសម្អាតចេញជាមួយទឹកក្ដៅឧណ្ហៗ។
៧. ខ្ទឹមស
ចិញ្ច្រាំ ឬបុកកំទេចខ្ទឹមសរហូតដល់ក្លាយជាម៉ដ្ឋខាប់ៗសឹមលាបវាលើមុនខ្នងនិងទុកចោលសម្រាប់រយៈពេលប្រហែលពី ១ ទៅ ២ ម៉ោង សឹមលាងសម្អាតចេញដោយប្រើទឹកក្ដៅឧណ្ហៗ។
៨. រមៀត
លាយទឹកដោះគោស្រស់ចំនួន ១ ស្លាបព្រាបាយជាមួយម្ស៉ៅរមៀត ២ ស្លាបព្រាបាយ។ កូរឱ្យសព្វរហូតដល់ក្លាយជាល្បាយខាប់ៗ សឹមលាបវាលើមុនខ្នងនិងទុកចោលរហូតដល់ស្ងួត ហើយលាងសម្អាតចេញជាមួយទឹកក្ដៅឧណ្ហៗ។ អនុវត្តអោយបាន ២ ដងក្នុងមួយសប្តាហ៍។
៩. ប្រទាលកន្ទុយក្រពើ
អ្វីដែលអ្នកត្រូវធ្វើ គឺគ្រាន់តែលាបជែលប្រទាលកន្ទុយក្រពើស្រស់លើតំបន់ស្បែកដែលទទួលរងផលប៉ះពាល់។ រងចាំសម្រាប់រយៈពេល ៣០ នាទី សឹមលាងសម្អាតចេញ។ អនុវត្តឱ្យបានពី ២ ទៅ ៣ ដងក្នុងមួយថ្ងៃជាប្រចាំ។
១០. ប្រេងដូង
អ្វីដែលអ្នកត្រូវធ្វើ គឺគ្រាន់តែចាក់ប្រេងដូងលើបាតដៃ រួចលាបម៉ាស្សាវាលើខ្នងរយៈពេល ៣០នាទីមុនចូលងូតទឹក។ អនុវត្តឱ្យបានម្ដង ឬ ២ដងជាប្រចាំ។ អ្នកក៏អាចទទួលទានប្រេងដូងសុទ្ធ ១ស្លាបព្រាបាយរាល់ព្រឹកដើម្បីទទួលបានអត្ថប្រយោជន៍បន្ថែម។
១១. យ៉ាអួរ
ក្រៅពីទទួលទានយ៉ាអួរសុទ្ធ ១ចានគោមតូចល្មមក្នុងមួយថ្ងៃជាប្រចាំហើយនោះ អ្នកក៏អាចលាបយ៉ាអួរសុទ្ធលើស្បែកខ្នងដែលមានបញ្ហាមុនដើម្បីពន្លឿនភាពជាសះស្បើយ។
១២. តែបៃតង
អ្នកចាំបាច់ត្រូវឆុងតែបៃតង ១ស្លាបព្រាកាហ្វេក្នុងទឹកក្ដៅ ១ពែងជាមុនសិន។ រងចាំសម្រាប់រយៈពេលពី ៥ ទៅ ៧នាទី សឹមត្រងកាកចេញ។ ក្រោយពេលតែចុះត្រជាក់បន្តិចហើយនោះ ចូរប្រើប្រាស់បន្ទះសំឡីជ្រលក់ក្នុងភេសជ្ជៈនេះ។ បន្ទាប់មកសឹមប្រើប្រាស់លាបតែលើស្បែកខ្នង។ រងចាំសម្រាប់រយៈពេលពី ១៥ ទៅ ២០នាទី សឹមលាងសម្អាតចេញជាមួយទឹកធម្មតា។ អនុវត្តឱ្យបានពី ២ ទៅ ៣ដងជាប្រចាំ។ ដើម្បីទទួលបានអត្ថប្រយោជន៍បន្ថែមអ្នកគួរទទួលទានតែបៃតងជាប្រចាំផងដែរ។