Join with Health.com.kh on Telegram

​នៅពេល​ដែល​ឆ្អឹង​កូន​លូតលាស់​បានល្អ នោះ​មានន័យ​ថា​កូន​អាច​នឹង​មាន​កម្ពស់​ខ្ពស់ ហើយ​មិន​ទាប​ឡើយ ដូចនេះ​តើ​គួរតែ​ធ្វើ​ដូចម្តេច​ទើប​កូន​អាចមាន​ឆ្អឹង​រឹងមាំ​ដែល​អាច​ធ្វើ​ឲ្យ​កូន​ខ្ពស់​នោះ​?

ក្តោ​កក្តាប់​ពេលវេលា​ឲ្យបាន​ល្អ​
​ដំណាក់កាល​លូតលាស់​ឆ្អឹង​ដ៏​ខ្ពស់​របស់​កូនស្រី​គឺ​នៅ​អាយុ​១៨​ឆ្នាំ រី​ឯ​កូនប្រុស​វិញ​នៅ​អាយុ​២០​ឆ្នាំ ដូចនេះ​មុន​ដំណាក់កាល​នេះ អ្នក​ត្រូវ​តែក្តោ​កក្តាប់​ពេលវេលា​នៅ​មុន​អាយុ​នេះ​ឲ្យបាន​ល្អ ដោយ​ធ្វើយ៉ាងណា​ឲ្យ​ឆ្អឹង​កូន​អាច​លូតលាស់​បានល្អ​នៅពេលដែល​គេ​មាន​អាយុ​១៨ និង​២០​ឆ្នាំ​។​

អ្នក​ត្រូវ​ធ្វើជា​គំរូ​ល្អ​
​អ្នក​ត្រូវ​តែ​ធ្វើជា​គំរូ​ដ៏​ល្អ​របស់​កូន ដោយ​នាំ​កូន​បរិភោគ​អាហារ​ដែល​មាន​សារធាតុចិញ្ចឹម និង​ហាត់ប្រាណ ម្យ៉ាងទៀត​នៅ​ពេល​ដែល​ពិសា​របាយ អ្នក​ត្រូវ​តែ​នាំ​កូន​ផឹក​ទឹកដោះគោ​មួយ​កែវ ហើយ​ម្យ៉ាងទៀត​អ្នក​ត្រូវ​តែ​ឲ្យ​កូន​ញ៉ាំ​អាហារ​ដែល​មាន​កាលស្យូម​ឲ្យបាន​ច្រើន ទើប​គេ​អាច​មាន​រាង​ខ្ពស់​បាន​។​

ហាត់ប្រាណ​
​អ្នក​ត្រូវ​តែ​លើកទឹកចិត្ត​ឲ្យ​កូន​ស្រលាញ់​ការ​ហាត់ប្រាណ ដូចជា ៖ រត់ រាំ ទា​ត់បាល់ ដើរ​ហាត់ប្រាណ​ជាដើម ជាងនេះទៅទៀត អ្នក​អាច​ឲ្យ​កូន​ហែល​ទឹក ឬ​ជិះ​កង់​ក៏​បាន​ដែរ ទាំងអស់​នេះ​សុទ្ធតែ​ជា​ចលនា​ហាត់ប្រាណ​ដែល​អាច​ធ្វើឲ្យ​ឆ្អឹង​កូនលូតលាស់​បានល្អ​។​

មិន​ត្រូវ​ឲ្យ​កូន​អង្គុយ​យូរ​
​អ្នក​មិន​ត្រូវ​ឲ្យ​កូន​អង្គុយ​មើល​ទូរទស្សន៍​យូរ ឬ​អង្គុយ​លេង​យូរ​នោះ​ទេ ព្រោះ​វា​សុទ្ធតែ​ជា​ទង្វើ​ដែល​ប៉ះពាល់​ដល់​ឆ្អឹង​កូន​ខ្លាំងណាស់​។​

​មិន​ត្រូវ​ផ្ទុក​របស់​ដែល​គ្មាន​កាលស្យូម
​អ្នក​មិន​ត្រូវ​ផ្ទុក​ភេសជ្ជៈ​ដែល​គ្មាន​កាលស្យូម ដូចជា ទឹកក្រូច​ដែលមាន​ជាតិ​ហ្គែស​ទុក​ក្នុង​ទូរ​ទឹកកក​នោះទេ ព្រោះ​កូន​អាច​ផឹក​ច្រើន​ជាង​ទឹកដោះគោ ដោយសារ​តែ​ឆ្ងាញ់​ជាង​ទឹកដោះគោ ដូចនេះ​កូន​អាច​នឹង​មិន​ព្រម​ផឹក​ទឹកដោះគោ​នោះទេ ជា​ហេតុ​ដែល​មិន​អាច​ធ្វើឲ្យ​ឆ្អឹង​កូនលូតលាស់​បានល្អ​ឡើយ​៕