ប្រយ័ត្ន! ខូចភ្នែកអស់មិនខាន បើមិនចោលទម្លាប់ទាំងនេះ

សុខភាពភ្នែកល្អប្រសើរ គឺចាំបាច់ណាស់សម្រាប់ការមើលឃើញ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ក្រៅពីលេងទូរសព្ទច្រើន ក៏នៅមានទម្លាប់មួយចំនួនអាចជះផលប៉ះពាល់លើសុខភាពភ្នែកគួរឱ្យបារម្ភ។ ថាតើទម្លាប់ទាំងនោះមានអ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីទម្លាប់ដែលអាចជះឥទ្ធិពលលើភ្នែក ៖

១. មិនពាក់វ៉េនតាការពារពន្លឺថ្ងៃ

កម្ដៅថ្ងៃមិនត្រឹមតែជះផលប៉ះពាល់លើស្បែកនិងពន្លឿនដំណើរការនៃភាពចាស់តាមវ័យនាំឱ្យលេចឡើងនូវស្នាមជ្រីវជ្រួញប៉ុណ្ណោះទេ ប៉ុន្តែក៏មានឥទ្ធិពលលើសុខភាពភ្នែកផងដែរ។ វ៉ែនតាជួយការពារភ្នែកពីកាំរស្មីយូវីគ្រោះថ្នាក់ ក៏ដូចជាធូលីដី។ ការសម្លឺងមើល ឬស្ថិតនៅក្រោមពន្លឺព្រះអាទិត្យផ្ទាល់ពេលខ្លះអាចបណ្ដាលឱ្យឈឺក្បាល ឬក្រហមភ្នែក។ ដូច្នេះដើម្បីជាការប្រសើរចូលពាក់វ៉ែនតានៅរាល់ពេលចេញទៅក្រៅក្រោមពន្លឺព្រះអាទិត្យ។ អ្នកឯកទេសខាងសុខភាពភ្នែកក៏បានឱ្យដឹងផងដែរថា ការមិនបានការពារភ្នែកឱ្យបានត្រឹមត្រូវអាចបង្កជាជំងឺភ្នែកឡើងបាយ និងជំងឺខ្សោយភ្នែកដែលទាក់ទងជាមួយកត្តាអាយុ (macular degeneration)។

២. ការជក់បារី

ទម្លាប់នៃការជក់បារីក៏អាចជះផលប៉ះពាល់ដល់សុខភាពភ្នែកគួរឱ្យកត់សម្គាល់។ ការជក់បារីបង្កើនឱកាសងងឹតភ្នែកទ្វេដង ក្រោយវ័យ ៥០ឆ្នាំ។ ការជក់បារីបណ្ដាលឱ្យខូចរ៉េទីនភ្នែក ហើយនៅពេលរ៉េទីនចាប់ផ្តើមចុះអន់ខ្សោយ ការមើលឃើញរបស់អ្នកក៏អន់ទៅតាមនោះដូចគ្នា ។ ការជក់បារីក៏ជាបុព្វហេតុចម្បងនៃជំងឺខ្សោយភ្នែកពេលចាស់ macular degeneration , ជំងឺភ្នែកឡើងបាយ និងការខូចខាតសរសៃឈាមភ្នែក។ ដូច្នេះប្រសិនបើចង់សង្គ្រោះការមើលឃើញរបស់ខ្លួន អ្នកចាំបាច់គួរបញ្ឈប់នូវទម្លាប់នេះ។

៣. មានរបបអាហារមិនល្អ

ការមើលឃើញបានច្បាស់ល្អ ក៏កើតចេញពីការទទួលបានសារធាតុចិញ្ចឹមល្អៗគ្រប់គ្រាន់ផងដែរ។ សម្រាប់សុខភាពភ្នែកល្អ ចូរព្យាយាមទទួលទានអាហារដែលមានផ្ទុកវីតាមីន A វីតាមីន E វីតាមីន C និងអាស៊ីតខ្លាញ់អូមេហ្គា ៣ ឱ្យបានច្រើនគ្រប់គ្រាន់។ គួរចៀសវាងការទទួលទានអាហារដែលមានផ្ទុកសម្បូរទៅដោយជាតិសូដ្យូមខ្ពស់ ខណៈដែលអាចធ្វើរាងកាយខ្សោះជាតិទឹក ហើយទីបំផុតនាំឲ្យភ្នែកស្ងួត។ ការពាររាងកាយពីការខ្សោះជាតិទឹកតាមរយៈការទទួលទានទឹកឱ្យបានគ្រប់គ្រាន់ និងទទួលទានបន្លែបៃតងស្រស់។

៤. គេងមិនបានច្រើនគ្រប់គ្រាន់

ការគេងបានស្កប់ច្រើនគ្រប់គ្រាន់ចន្លោះពី ៧ ទៅ ៩ ម៉ោងក្នុងមួយយប់ គឺចាំបាច់ណាស់សម្រាប់សុខភាពរាងកាយទាំងមូល ព្រមទាំងភ្នែក។ ទោះជាយ៉ាងណាអ្នកមិនគួរគេងទាំងនៅពាក់ contact lenses ឡើយ។ នៅពេលមុនពេលដោះចេញ អ្នកចាំបាច់ត្រូវលាងសម្អាតដៃឱ្យស្អាតជាមុនផង។

៥. មិនទៅពិនិត្យភ្នែកឲ្យបានទៀងទាត់

ដើម្បីដឹងពីស្ថានភាពភ្នែកថាយ៉ាងណា ការទៅជួបពិនិត្យជាប្រចាំ គឺជារឿងសំខាន់។ ការពិនិត្យភ្នែកទៀងទាត់ ក៏ជួយបង្ការភ្នែកពីបញ្ហាផ្សេងៗ ហើយដោះស្រាយបញ្ហាបានទាន់ពេលផងដែរ។

៦. សម្លឹងមើលកញ្ចក់កុំព្យូទ័រយូរពេក

ការសម្លឹងមើលកញ្ចក់កុំព្យូទ័រយូរពេកនោះ គឺអាចបណ្ដាលឲ្យកើតជំងឺស៊ីវីអេស ឬ computer vision syndrome។ ស្ថានភាពនៃជំងឺនេះ គឺច្រើនតែកើតលើអ្នកដែលធ្វើការនៅមុខកុំព្យូទ័ររាល់ថ្ងៃ។ ការសម្លឹងមើលកុំព្យូទ័រយូរពេកនឹងធ្វើឲ្យភ្នែកស្ងួត ហើយអស់កម្លាំង។ ដូច្នេះដើម្បីជៀសវាងកើតមានបញ្ហាភ្នែកណាមួយ ឬជំងឺស៊ីវីអេស (CVS) អ្នកគួរសម្រាកភ្នែកពីកញ្ចក់កុំព្យូទ័រខ្លះ ដើម្បីឲ្យភ្នែក ក៏ដូចជាសាច់ដុំជុំវិញភ្នែកបានសម្រាក៕