ដូចទៅនឹងស្ថានភាពសុខភាពមួយចំនួន រួមទាំងជំងឺមហារីក ទឹកនោមផ្អែម និងជំងឺលើសឈាម ការស្រាវជ្រាវថ្មីបានបង្ហាញថា ការមានផ្ទុកមេរោគហ៊ីវ ឬអេដស៍បង្កើនហានិភ័យនៃការឆ្លង និងស្លាប់ដោយសារជម្ងឺកូវីដ១៩។
ក្រុមអ្នកស៊ើបអង្កេតបានរកឃើញថា អ្នកផ្ទុកមេរោគអេដស៍មានហានិភ័យខ្ពស់ ក្នុងការឆ្លងមេរោគSARS-CoV-2 ចំនួន២៤ភាគរយ និង ហានិភ័យស្លាប់ដោយកូវីដ១៩ ចំនួន៧៨ភាគរយ ច្រើនជាងអ្នកដែលមិនមានផ្ទុកមេរោគអេដស៍។នេះ គឺដោយសារតែភាគច្រើននៃអ្នកផ្ទុកមេរោគអេដស៏ គឺស្ថិតនៅលើការព្យាបាល ដោយថ្នាំប្រឆាំងនឹងមេរោគអេដស៍។
ដោយយោងទៅតាមអង្គការសុខភាពពិភពលោក មនុស្សប្រហែលជា ៣៨ លាននាក់ នៅទូទាំងពិភពលោករស់នៅជាមួយមេរោគហ៊ីវ ឬអេដស៍។
ក្នុងចំណោមអ្នកដែលមានផ្ទុកមេរោគអេដស៍ ស្ថានភាពសុខភាពទូទៅដែលកើតមានមុនគេ គឺជំងឺលើសឈាម ទឹកនោមផ្អែម ជំងឺស្ទះសួតរ៉ាំរ៉ៃ (COPD) និងជំងឺតម្រងនោមរ៉ាំរ៉ៃ។
ប្រហែលជា ៦៦ ភាគរយ នៃអ្នកចូលរួមក្នុងការស្រាវជ្រាវ គឺជាបុរសដែលមានអាយុជាមធ្យម ៥៦ ឆ្នាំ។ អ្នកដែលមានផ្ទុកមេរោគអេដស៍ (៩៦ ភាគរយ) ភាគច្រើនបានទទួលការព្យាបាលដោយថ្នាំប្រឆាំងនឹងមេរោគអេដស៍ ដែលជួយទប់ស្កាត់បរិមាណមេរោគអេដស៍ ដែលត្រូវបានរកឃើញនៅក្នុងខ្លួន។
អ្នកស្រាវជ្រាវបានសម្គាល់ឃើញថា ប្រសិទ្ធភាពនៃថ្នាំប្រឆាំងវីរុស (ដូចជាសារធាតុប្រឆាំងនឹងប្រូតេអ៊ីន) ក្នុងការបន្ថយហានិភ័យនៃការឆ្លងមេរោគ SARS-CoV-2 និងការស្លាប់ដោយជំងឺកូវីដ១៩ លើអ្នកផ្ទុកមេរោគអេដស៍ នៅតែមិនមានលក្ខណៈគ្រប់គ្រាន់៕