មនុស្សគ្រប់រូបសុទ្ធតែសង្ឃឹមចង់ទទួលបានថ្លើមដែលមានសុខភាពល្អជានិច្ច គ្មាននរណាចង់ឲ្យវាមានជំងឺឡើយ ដូចនេះអ្នកអាចធ្វើតាមវិធីមួយចំនួនខាងក្រោមដែលយើងខ្ញុំនឹងប្រាប់អ្នក វាជាវិធីដែលជួយការពារថ្លើមរបស់អ្នកបាន។ តើមានវិធីការពារបែបណាខ្លះទៅ?
បន្ធូរសម្ពាធ
មនុស្សនៅពេលដែលមានសម្ពាធ វានឹងអាចប៉ះពាល់ដល់គ្រប់ផ្នែកនៃរាងកាយ ជាពិសេសគឺថ្លើមតែម្តង ដូចនេះនៅពេលដែលអ្នកមានអារម្មណ៍ស្មុគស្មាញ អ្នកត្រូវតែចេះរកវិធីបន្ធូរអារម្មណ៍ ទើបថ្លើមអ្នកអាចមានសុខភាពល្អ។
កាហ្វេមួយថ្ងៃមួយកែវ
នៅក្នុងកាហ្វេមានជាតិកាហ្វេអ៊ីនដែលអាចប៉ះពាល់ដល់សុខភាពអ្នកនៅពេលដែលអ្នកផឹកច្រើន ប៉ុន្តែបើក្នុងមួយថ្ងៃ អ្នកផឹកបានមួយកែវ នោះវានឹងជួយថ្លើមអ្នកឲ្យមានសុខភាពល្អជាមិនខានឡើយ។
ពិសារអាហារដែលមានជាតិស្ករទាប
នៅពេលដែលអ្នកទិញអាហារកំប៉ុង ឬអាហារផ្សេងៗ អ្នកត្រូវតែជ្រើសរើសអាហារដែលមានជាតិស្ករទាប ទើបវាមិនធ្វើឲ្យថ្លើមមានសម្ពាធ ហើយថែមទាំងមានសុខភាពល្អទៀតផង។
ពិសារអាហារដែលមានវីតាមីន
អ្នកអាចបរិភោគអាហារដែលមានវីតាមីនB និងC ព្រោះវាសុទ្ធតែជាវីតាមីនដែលអាចធ្វើឲ្យថ្លើមអ្នកគ្មានបញ្ហាឡើយ វានឹងជួយធ្វើឲ្យវាដំណើរការល្អ ហើយគ្មានជំងឺទៀតផង។
ប្រើថ្នាំត្រូវតែប្រយ័ត្ន
នៅពេលដែលអ្នកប្រើថ្នាំផ្តាសាយ និងថ្នាំបំបាត់ការឈឺចុកចាប់អ្នកត្រូវតែប្រយ័ត្ន ព្រោះវាមានសារធាតុដែលអាចប៉ះពាល់ដល់ថ្លើមអ្នកបាន ជាពិសេសនៅពេលដែលអ្នកប្រើថ្នាំ អ្នកមិនត្រូវផឹកគ្រឿងស្រវឹងទេ។
ប្រយ័ត្នពេលប្រើសារធាតុសម្អាតបន្ទប់ទឹក
នៅពេលដែលអ្នកសម្អាតបន្ទប់ទឹក អ្នកនឹងប្រើទឹកសាប៊ូម្យ៉ាងដែលអាចកាត់ឲ្យវាសបាន ដូចនេះពេលដែលអ្នកប្រើផលិតផលនោះ អ្នកត្រូវតែពាក់ម៉ាស ព្រោះបើអ្នកហឹតសារធាតុទាំងនោះច្រើន វាអាចធ្វើឲ្យថ្លើមអ្នកមានបញ្ហាបាន។
កាត់បន្ថយការផឹកស្រា
អ្នកមិនត្រូវផឹកស្រាច្រើននោះទេប្រសិនជាអ្នកចង់ទទួលបានថ្លើមដែលមានសុខភាពល្អ ដូចនេះអ្នកត្រូវតែកាត់បន្ថយកុំផឹកច្រើនពេកទើបអ្នកមិនប្រឈមមុខនឹងជំងឺថ្លើម៕